Use. 11 - Yus Papí: Shuarja̱i̱ Yus Yamaram Chicham Najanamu

Yus ni shuari̱n ántichunak anenawai

¹ Israer shuar uchichiya̱ nuiṉ anea asan uchirun Ejiptunmaya̱n untsukmiajai.

² Túrasha chicháa chichareamsha Wini̱ya̱ṉka nu arant kanakiármiayi. Túrunawar najankamu yus Páaran enentáimtuiniak taṉkuncha núnisaṉ kuṉkuinniasha áestiarmiayi.

³ Túmainianak Eprain shuarnaka péṉker eṉkesan ewekámsarmajai túrasha Wi tsuáran wáiniarmaj núnaka peṉké nekamacharmai.

⁴ Wikia nuwa̱ ni uchirí̱n aneak miniakas tura naṉkas áyurea nútiksan ayurawarmiajai. Tura nin anena asan winí̱ winik tusan itiarmiajai.

⁵ Winí̱ waketkitniun nakitraruiti. Tuma ásar Ejiptunmasha waketkichartatui. Antsu ni akupniúri̱ṉkia Asirianmaya̱ṉ átatui.

⁶ Nuyá̱ ni pépruri̱nkia mesetja̱i̱ amukar núnisaṉ ni ejamtairi̱ncha emestukartatui. Kame jú̱nis túratniuitji tu enentáimiainiakui nuka túrunattawai.

⁷ Tumai̱ Wi shuarka ántichu ajasár umiktinniasha nakitiáiniak aya kájertuiniawai. Nuyá̱ Naṉkamantu Yúsaitme turutainiayataṉ ishichkisha páantin awajtuiniatsui.

⁸ Kame Eprainkiá tura Israerá ¿itiurak surukan tura ajapan ikiuktiajrum? ¿Urukamtaik Atma tura Sepuimia nútikiancha ajapan iniaisaintjiarum? Warí imiá aneancha ashí winia enentái̱rja̱i̱ enentáimsan tura waitnentakun yáiṉtinian wakerajrume.

⁹ Wikia áentschaitjiai antsu Úunt Yusaitjiai. Tura Peṉké Tunaarincha asan ju̱ aentsja̱i̱ pujakun péṉker enentáimpramaj nuna umíakun Eprainniaka asuttsuk iniaisattajai.

¹⁰ Uunt Yusan nemarsartatui. Tura niṉkia úunt ya̱wa̱ núnis júruur ajattawai, ee nekas júruur ajattawai. Tura etsa̱ akatainmaya̱ niniu ainia nuka kuraṉkiar tariartatui.

¹¹ Núnisaṉ Ejiptunmaya̱sha chiṉkia ántsar tura Asirianmaya̱ṉka yámpitsa núnisar kuraṉkiar káutkartatui. Túran ni je̱e̱ni̱ṉ matsasártatjai Uunt Yus tíniuiti.

Israera tunaarí̱

¹² Kame Eprainkia waitji̱a̱i̱ tura Israerka anaṉkartutaiji̱a̱i̱ téntatkarai. Tura Jutaka Tunaarincha Yusan anaṉkartutsuk tí peṉker wáinkiartinian nékayat Yusai̱ya̱ kanakiar ní wakeramun túruiniawai.