Use. 10 - Yus Papí: Shuarja̱i̱ Yus Yamaram Chicham Najanamu

Najanamu yus áestutai̱ emestukma

¹ Israer shuarka uwa araam tí peṉker tsapái̱ nuke̱ kanetin nerekua ímiatrusaiti. Túrasha nuja̱i̱ métek najanamu yus áestutai̱ncha ti najankarmiayi. Núnisaṉ nuṉke̱ncha tí peṉker tsapamtikruiniamaitiat ju̱i̱ti ii yusri̱ tusar kayan nuna péṉker iwiarkarmiayi.

² Kame ni enentái̱ji̱a̱i̱ anaṉmainiawai. Tuma ásar yamaikia niṉki makumarartatui. Tura najanamu yus áestutai̱ncha nuyá̱ kayá yusri̱ncha Uunt Yus yumpuntrar tsairartatui.

³ Nui̱ṉkia Israer shuar chichainiak “Uunt Yus kame ashamachu asar akupniúsha takaktsuji. Nu arantcha akupniúsha iincha ¿warí itiurtámkaintjik?” tiártatui.

⁴ Túrasha peṉké ántar chichasar nekas umiktatji tusar chichaman najanawaruitiat uminiachu ásar ti sumamtiknainiak tséas nupa̱ ajan tsaparna núnis ártatui.

⁵ Tura Samarianmaya̱ aentska najankamu yus Pitiawínnium kuriji̱a̱i̱ waaka najanamu ana nuna enentáimtuiniak jurutrámkiartatjiapi tusar ashamainiak núnisaṉ nú yusnan takarniusha ni winchari̱n wararí̱n ainia nusha tí kuntuts enentáimsar úttiartatui.

⁶ Núnisaṉ najankamu yus kuriji̱a̱i̱ waaka najanamuncha Asirianmaya̱ úunt akupin Jarep súsatniun jurukiartatui. Túrunamtai Eprainkia natsanmai̱ ajaktatui tura Israer shuarsha najankamu yusri̱n enentáimtusaru ásar natsantrartatui.

⁷ Tura Samarianmaya̱ aentska akupniúrtiuk sau entsá pátatek nanatu aya méṉkana núnikiartatui.

⁸ Awinkia náintri̱n najankamu yus áestakur enentáimtutai̱ Israer shuar yajauch túrutai̱ ainia nuka mash emesnakartatui. Nui̱sha naraja̱i̱ jaṉki tsapakartatui. Túmainiakui náintian chicharainiak “Yumpunkim yutukratam ú̱kratkata” tiártatui.

⁹ Maa Israer shuartirmeka Kawaanam pujumiarmena nuya̱ṉ tunaaka túruki̱ winiarme. Tura yamaisha nui̱ṉ matsatrume. Kame netse aentsun Kawaanam mesetan najatawarmaj nuka átumka nekachmakarum.

¹⁰ Wikia wakeraj nui̱ asutiáwartatjai tura mui̱jmiai̱ jimiará ajakármanum nin asutíniakui ashí nuṉkanmaya̱ aents kajerkar irunturartatui.