Use. 1 - Yus Papí: Shuarja̱i̱ Yus Yamaram Chicham Najanamu

Useasa nua̱rí̱ uchirí̱ji̱a̱i̱

¹ Tura Jutanmaya̱ṉka Usías núnisaṉ Jutam tura Akaas nuyá̱ Esekías akupin pujuarmia nui̱ tura Israernumsha Juasa uchirí̱ Jirupuám akupin pujamunam Uunt Yus Pirí uchirí̱ Useasja̱i̱ chichasmiayi.

² Kame juáruk Uunt Yus timian Useas etserkamia nuka ju̱i̱ti. Nuyá̱ Uunt Yus Useasan chicharuk “Yamaikia tsanirmatai nuwa̱ nuatkam nui̱ yajutmakta. Warí Israer shuar nui̱ pujuinia nu Uunt Yusan iniaisar aya tsanirmatnak pujurainia núnis áiniawai” tímiayi.

³ Kame Uunt Yus nuatkata tama asa Tipraimia nawantri̱n tsanirmatai nuwa̱n Kúmiran nuatkamiayi. Tura ajapruk uchi áishmaṉchin takusmiayi.

⁴ Nuyá̱ Uunt Yus Useasan chicharuk “Jisriir anaikiata. Warí ishichik tsawant naṉkaamasai̱ Jeú Jisriir péprunam maṉkartua asamtai ní weantka mash amukártatjai. Nuna túran Israernum akupeamunka nuiṉ iniaṉnatkattajai.

⁵ Nu tsawantai̱kia Jisriira pakarí̱n ashí Israer shuara suntari̱nkia nupetnakar amuukartatui” tímiayi.

⁶ Nuyá̱ Useasa nuwe̱ Kumir ataksha ajapruk nuiṉkia nuwa̱n takusmiayi. Tura takusmatai Uunt Yus chicharuk “Ru-rujama anaikiata. Wikia yamaikia Israer shuarnaka peṉké waitnentrachartatjai. Kame waitnentran tsaṉkurú ajachartatjai.

⁷ Antsu Jutanmaya̱ shuarnaka waitnentraran tíshimkiuja̱i̱nchu ántsaṉ puya̱ja̱i̱nchu tura kawaiji̱a̱i̱nchu nu arantcha mesetchaja̱i̱ antsu Ni Uunt Yusri̱ kakarmari̱ji̱a̱i̱ uwemtikrartatjai” tímiayi.

⁸ Nuya̱ṉka Kumir uchin Ru-rujaman utsurak ataksha ajapruk uchin áishmaṉchin takusmiayi.

⁹ Tura Yus chicharuk “Uchiram Ru-ami anaikiata. Warí átumka Wí shuarchaitrume. Tura wisha atumí Yúsri̱nchuitjiai.

¹⁰ Túrasha ukunmaṉka Israer shuarka entsá naikim írunna imianú untsurí nekapmarchamnia ajasártatui. Tura átumka ‘Wí shuarchaitrume’ tunamármena núnaka iniaisar antsu ‘tuke iwiaaku Yusa uchirí̱ntrume’ tunattarme.

¹¹ Nuya̱ṉka Israer shuar Jutá shuarja̱i̱ iruntrar chikichik úuntri̱niak anaikiartatui. Túrawar ashí nuṉkanmaya̱ iruntrartatui. Warí Jisriira tsawantri̱ṉkia ti uunt átatui.