Ukan. 3 - Yus Papí: Shuarja̱i̱ Yus Yamaram Chicham Najanamu

Jirimías Yus ikiukmia núnis nekapeamu

¹ Ní kajek asutiár wáitkiatai̱n wáinkiaitjiana nu áishmaṉnaka witjiai.

² Uunt jurukmiai tura kiritniunam ewekáttsamai tsápninniumcha.

³ Nekas tsawant takamtsuk itiurchat naṉkaamatsat tusa tsaṉkatrukmai.

⁴ Winia namaṉkruncha, nuapruncha weamtikrurmai tura ukunchruncha kupirturarmai.

⁵ Wíniaka árentak wáitsatin yapá umartinia nuja̱i̱ métek takatja̱i̱ téntatrukmai.

⁶ Yaunchu jakáa nútikrua kiritniunam ikiurkimiai.

⁷ Wenukja̱i̱ téntak eṉketayi, tuma asan peṉké jiinkichminiaitjiai. Jirú chapikrusha kijin ajatrúsai.

⁸ Wi seakun untsuamsha nú kakantran untsuamsha kuishi̱nkia epenkayi.

⁹ Jintiarnasha kaya pakamámuja̱i̱ árentruk tura wekatairnasha utuntiurayi.

¹⁰ Wi íismaka chai̱ tsékeṉki̱ peemprutkataj tana núnisauyi. Tura riun nákamak pujana tímianuyi.

¹¹ Winia jintiarnasha utuntiur tura kupir muchitkiachmin najata ikiurkimiai.

¹² Tíshimkiuri̱ji̱a̱i̱ iwiar tsentsakri̱ji̱a̱i̱ tukurtiaj tusa aya awajtúrsamai.

¹³ Tura tséntsakri̱ji̱a̱i̱ eketruk tantantrui̱ akutruámai.

¹⁴ Ashí winia shuarui̱ṉkia tuke tsawant wikia wishiktai̱ ajasmajai.

¹⁵ Uuntka ti waittsatniun surusuiti tura umartinniaka ti yapan surusuiti.

¹⁶ Nai̱rnasha kaya puunaruja̱i̱ purarmai tura yúṉkunmik amutamai.

¹⁷ Wini̱ṉkia aṉkant pujutai̱ṉkia arant ajatrúsmai. Tura péṉkernaka kajinmátkimjiai.

¹⁸ Nui̱ “Winia kakarmarsha tura Jiuwá nákastin enentái̱rsha amutúrkayi” tímiajai.

Yusa waitnenkartutairi̱ji̱a̱i̱ aṉkant átin nákamu

¹⁹ Winia kúntuts enentáimkiur wáittsamur yapá tura tsaṉkea tímianua nu enentáimturta.

²⁰ Jú̱naka peṉké kajinmátkishtiniaitjiai winia enentái̱r init wáitias pujá asamtai.

²¹ Túrasha winia enentái̱rui̱ awaiṉkin enentáimsan tuke nákastatjai.

²² Jiuwaka waitnenkartiniaiti tuma asamtaikia amukchamuitji, warí, ni waitnenkartutairi̱ṉkia peṉké menakchaiti.

²³ Nekas péṉker túrutairmeka ti úuntaiti, tuke káshiksha yámarmak túrame.

²⁴ Wi takamtsuk enentáimtamurka aya Jiuwayaiti timiai wakantruka tuma asan Níniak nákastatjai.

²⁵ Yaaksha Niin nákainiak e̱a̱iniana núnaka Jiuwaka ti péṉker enentáimtawai.

²⁶ Jiuwá uwemtikkiartutairi̱ṉkia takamat pujusár nákastin péṉkeraiti.

²⁷ Shuarka pukutai̱n kijin netuamua júkitniun nátsanmaya̱n nekaatin péṉkeraiti.

²⁸ Yus jú̱naka susa asamtai tákamtak niiṉki pujus enentáimsatniuiti.

²⁹ Wene̱ nuṉká ushusha waitnentrurainti tusa nákasminiaiti.

³⁰ Awattámainiakuisha chíkich yapimsha tsaṉkatkata túram páchitsuk natsanmai̱ ajakta.

³¹ Warí Yuska túkeka nakitraṉka iniaiyatsui.

³² Antsu wáittsatniun tsaṉkatramkayat Niṉkia tí naṉkaamas aneṉkrattairi̱ji̱a̱i̱ waitnentramaji.

³³ Warí, aentsnaka peṉké ántraṉka Ni wakerakka wáitkiattsui tura kúntutska enentáimtiktsui.

³⁴ Ashí nuṉkanmaya̱ sepunam eṉketáinia itiurchat awajénmunka

³⁵ tura Ashí Naṉkamantu Yus íimmianum aents túratin tsaṉkatkamun suritkianiuncha

³⁶ núnisaṉ nekasa nuja̱i̱ métek sumamtikchamuncha ¿Uuntka peṉkek nékatsu?

³⁷ ¿Yaki wariṉkish naṉkaama nuna Yuska jú̱naka akupkachuiti tíminiait?

³⁸ Warí, itiurchatcha tura péṉker ainia nusha Naṉkamantu tsaṉkamkamtaik naṉkamawai.

³⁹ Aentska tunaaitiat iwiaaku pujayatcha ¿urukamtai wáitiajai tíminiait aentscha?

⁴⁰ Antsu ii túramuri̱ péṉker íimiasartai túrar Jiuwá e̱a̱kar ataksha waketkiartai.

⁴¹ Tura ii enentáisha nuyá̱ ii uwejé̱sha nayaimpinmaya̱ Yusai̱ni̱ takuitiai.

⁴² Iikia umiktin nakitrar kajekmaji túrar Ame chichaakmasha tímiatrusrikkia umikchamji tuma asaakrin Ámeka iinkia tsaṉkurachmame.

Israer shuara wáitiamuri̱

⁴³ Kajetáirmin eṉkekratam iincha apapékratkam tsaṉkurkartutsuk maṉkartimiame.

⁴⁴ Ii seamu antuktin nakitiakum tusam yuraṉminiam ajamakmame.

⁴⁵ Antsu ashí nuṉkanmaya̱ aents iismasha wishiktai̱ tura mui̱jtiai̱ awajkartusmame.

⁴⁶ Ashí ii nemasri̱ṉkia yajauch chichartamkarmaji.

⁴⁷ Túmak tsuumai̱ íi ashamtai̱ amukratin tura jiṉkiakratin ajasármai.

⁴⁸ Winia pépruru nawantri̱ wáitiainiakui ji̱rui̱ṉkia nea̱jkirka entsa tímianu jiiniainiawai.

⁴⁹ Péṉker enentáimpratin atsá asamtai winia jí̱ruka nea̱jkinkia iniaṉnatsuk tuke papar ajá pujawai.

⁵⁰ Núnaka Jiuwá nayaimpinmaya̱ íiras wáitmam túmajai.

⁵¹ Áintsanak ashí winia pépruru nawantri̱n iisan kúntuts enentáimjiai.

⁵² Peṉké ántar winia nemasruka chiṉki matniua nútikias apapétkarmai.

⁵³ Túrutawar entsa pajamtainiam aju̱ntkar kayaja̱i̱ akirtuawarmai.

⁵⁴ Entsa mash muukarua tímianai amutamtai amuwajapi tímiajai.

⁵⁵ Nui̱ sepunam init eṉkemsan Jiuwáa Ame náarmin pachisan untsukmajme.

⁵⁶ Tura winia chichampruka antukmame «Wi seamma antuktin nakitiakum kuishim epenkaip».

⁵⁷ Wi untsukmajmena nu tsawantini̱ṉ tarutim chichartakum «Sapijmiakaip» turutmiame.

⁵⁸ Yusá yáintkiam winia enentái̱rui̱ wáitiamusha iwiaakmarsha uwemtikrurmame.

⁵⁹ Jiuwáa, winia wáitiamur wainkiame tuma asam winia itiurchatur ayamprutkata.

⁶⁰ Winia yajauch awajtústaj tusa enentáimiainiak suir iirainia nusha mashⁱ wainkiame.

⁶¹ Maaj, Jiuwáa Ámeka ni katsekruinia nusha antukuitme tura chichaman jurutainiak áujmatainia nusha nékame.

⁶² Winia nemasrusha tuke tsawant wíniaka yajauch awajtústai tusar áujmatruiniawai.

⁶³ ¡Íisarta! Ashí ni túruiniana nui̱ṉkia kantamáiniak winia áujmatrusar wishikruiniawai.

⁶⁴ Maaj Jiuwáa, ni túramuja̱i̱ métek akikiártiniaitmena nuka tímiatrusmek súsarta.

⁶⁵ Yajauch yumiṉji̱a̱i̱ yumiṉkrarta túram enentáisha ikiatsuátrarta

⁶⁶ Jiuwáa kajekmármiji̱a̱i̱ apapékarta túram ju̱ nuṉkanmaṉka amukáram peṉké atsá awajsarta.