Ukan. 2 - Yus Papí: Shuarja̱i̱ Yus Yamaram Chicham Najanamu

Jerusaréṉkan Jiuwá asutiámu

¹ Jiuwaka yuraṉmiji̱a̱i̱ ejakua nútikias suíran kae̱ kajentuk Seúna nawantri̱ shíirmari̱nkia tee awajsáyi. Tura Israera páantniuri̱ncha nayaimpinmaya̱ jukí̱ nuṉká ajapaiti. Núnisan suíran ka̱e̱ kaje̱nkamu tsawantinkia tarimsa pujutái̱ri̱ncha peṉké enentáimtuschamai.

² Jiuwá ni kajekmari̱ji̱a̱i̱ tsaṉkurtsuk Jakupa nuap je̱e̱nka ashí emestukmai. Jutá nawantri̱n wenukri̱n sá̱a̱rar nuṉká utsaṉtamiayi. Tura akupeamuri̱nkia uchirí̱miak kakarmachu awajsarmiayi.

³ Ni kajekar suir kajenkamuri̱ji̱a̱i̱ Israer shuara kakarmari̱n ashí jurusmiayi. Tura mesetnum ni nemasri̱ji̱a̱i̱ mániniakui yaimia núnaka iniaisámiayi. Tura Jakupnaka kajerak ji keek aeseana aitkias nui̱ pujuinia nuí̱miak ashí amukármiayi.

⁴ Túrak ni nemasri̱ya̱ áintsaṉ tíshimkiuja̱i̱ mamikmá ni untsuríji̱a̱i̱ iwiarnatar imiá shíirauya nuna emeskamiayi. Seuna nawantri̱ je̱e̱nkia, ji keá áintsaṉ ni kajekmari̱n ukatamiayi.

⁵ Uuntka ni nemasri̱ya̱ áintsaṉ ajasmai túmak Uunt Israernaka emeskamai. Úunt akupin pujutai̱ jeancha emesak wenuke iwiartukar utúachmin awajsamu ainia nunasha akatúrmai. Túrak Jutá nawantri̱ kúntuts pujustintri̱ncha tura waitiakur jakamnia nekapratniuncha nuna nukap awajtúsmiayi.

⁶ Yus Shiir Awajtai̱ Je̱e̱ncha aak ajanam pujá itiurtain nútikias kajerak náṉkamas túraiti. Túrak irunin armia nú je̱a̱ncha emeskamiayi. Namperan ti arantúkmajai tura ayampratin tsawantincha najamin armia núnaka Jiuwaka Seúnnumka kajinmámtikiaruiti. Tura suir kae̱ kajenakamujai úunt akupniuncha tura Yúsnan pujurniuncha ajapa iniaisaiti.

⁷ Uuntka aestutairi̱ncha nakitramiayi Ni Shiir Awajtai̱ Je̱a̱ncha muí̱jkiamiayi. Tura úunt akupin pujutai̱ je̱a̱runcha a̱a̱ya̱ tanishri̱nkia ni nemasri̱n íiktus iniaisarmiayi. Tura nampertin urukin ainia núnisar Jiuwá je̱e̱ncha charaatum ajarmiayi.

⁸ Seuna nawantri̱ wenuke̱n emestuktatjai tu enentáimsamiayi Jiuwaka. Emeskattsa iwiarkamai tura núnaka peṉké iniaisachmai. Tuma asa a̱a̱ya̱ tanishri̱ncha initia̱i̱ tanishri̱ji̱a̱i̱ métek émeseak mái̱ metek atsaku jú̱nik awajsamai.

⁹ Wáitiri̱sha nuṉká utsaṉma tura asaktairi̱sha kupiniar mash mesekarmiayi. Tura nuṉka mátsatkamunam umiktin chicham akupkámu atsana nui̱ úunt akupniusha uchirí̱sha matsatainiawai. Núnisaṉ Yúsnan etserniuri̱ncha Jiuwanun ímiaja̱i̱ksha íimtikracharuiti.

Jirimías utmia

¹⁰ Seuna nawantri̱ tura uuntri̱ armia nusha nuṉká antumprar mitia ajasár pujusármiayi. Tura útkur entsatái̱ pushin entsarar yuṉkunmin muuknumsha ukatmamprarmiayi. Tura Jerusaréṉnumia̱ nuwa̱ch áishmaṉja̱i̱ tsaniṉcha armia nuka natsa̱a̱rar nuṉká tsuntsumá juákarmiayi.

¹¹ Úu útkuan nea̱jkirka kukach ajasmatai kuntuts enentáimkiun jakamnia nekapeajai. Winia péprur ashí emesnaku asamtai ti kúntuts jakamnia nekaajai. Warí, uchisha kuírchich muntsúaku ínianana nusha jáiniak pepru páasarin tepetar ajainiawai.

¹² Warí uchisha nukurí̱n “¿Tríkiusha tura wíniusha tui̱ aa?” túumam ajarmiayi. Tura pepru páasari̱nkia awatmia jaana núnis jáiniak nukurí̱ tiṉkiampri̱n eṉkemsar jákaruiti.

¹³ Jerusaréṉka nawantri̱yá ¿warí tínjiamek? ¿Wariji̱a̱i̱ṉ apatkan iisaintjiam? Maaj Seuna nawantri̱ áishmaṉja̱i̱ tsaniṉcha ¿yaja̱i̱ apatka íisnak atsaṉkraintjiam? Warí ame emesnak maakka nayantsaja̱i̱ métek tí úuntaiti. ¿Yaki tsuármarat?

¹⁴ Atumí Yúsnan etserniuri̱sha nekascha nuna tura wáurtaincha wáinkiaruiti. Tura átum achintrar junaktinian nékainiayat atumí tunaarí̱n nekaartamacharmai. Antsu ujatmákmin áyat wait chichaman imiamtikramprattsa ujatmákarmai.

¹⁵ Nú jintianmaani̱ ashí wekainiaka ámin wishikramainiak uwejé̱n pákea pákea awajkiar naṉkaamarmai. Tura “shui shui” tiar muuke̱ncha péasan naṉkaamarkar ajarmai wishikramainiak tura Jerusaréṉka nawantri̱n enentáimtusar chichainiak “Timiá shíirmaiti tusar ashí nuṉkanmaya̱ ti wararí̱n armia nú pepruchukait?” tiarmai.

¹⁶ Ashí ame nemasrum áujmatramainiak nain kátechichi awajiarmai tura chichartamainiak “¡Emeskar amú amustai. Warí, ju̱ tsawantcha nákasuitji. Tuma asar yamaikia wainkiaji tura ántsarik wainji!”

¹⁷ Jiuwá ieiaramun takaku núnaka túrayi. Yaunchu timia núnaka yamaikia ni chichame̱nka umikiai. Tura tsaṉkurtsuk ashí emeskayi tura nemasmi̱ncha amiin enentáimtikrar waramtiksarai. Tura ame nemasmeka naṉkamantu enentáimtikrarai.

¹⁸ Nisha Yusan yainkiat tusa untsúarmiayi. Seuna nawantri̱yá tsawai̱sha tura káshisha ayamtsuk tura iniaitsuk uu útkuam nea̱jkiram ashints waana tímiatruata.

¹⁹ Kashi iwiáa iwiakar tsawa̱rtin náṉkamkui wajakím untsumkata. Tura entsá ukana áitkiasmek ame enentáim ukaata Yus íimmianum. Tura ashí paasa péprunam wa̱i̱ti̱a̱i̱ ainia nui̱ ame uchiram tsukái kaji̱niak tepenana nuna iwiaakmari̱ enentáimtusam uwejém takuim seatiarta.

²⁰ Jiuwáa ya áitkiam nu iisam waitnentrarta. Warí ¿nukuachisha ni uchirí̱ takusarua nunakek yúawartata? ¿Nuikia Yúsnan pujurniusha tura Yúsnan etserniusha Yus Shiir Awajtai̱ Je̱a̱nmasha mantamnawartatuak?

²¹ Warí uchin tura úuntchin aya̱shí̱sha páasanam nuṉká tepetar ajarmai. Tura nuwa̱ch natsachir áishmaṉja̱i̱ tsaniṉcharusha áishmaṉchir natsachisha puya̱ja̱i̱ kajeṉkma áiniawai. Ame suir kae̱ kaje̱ntkamu trawantrumin kí̱awaetnentsu tsuwé tsupirkam kajeṉkármame.

²² Tuma asamtai ti shiir waratai̱ tsawanta áitkiasam winia sapijrusha ashí nuṉkanmaya̱ ikiatrukume. Tura Jiuwá kajekma tsawantnumia̱ nui̱ṉkia chikichkisha pisartinkia tura iwiaaku átinkia atsumai. Warí wi péṉker wainkia tsakatmakmajna nunasha winia nemasur mash amutrukmai.