Tur. 6 - Yus Papí: Shuarja̱i̱ Yus Yamaram Chicham Najanamu

Yus shuaran yain siati anaikiamu

¹ Nú tsawantin Yusan umirkaru ti kaweṉkar ármiayi. Tura tuke tsawant yurumak súsatin ámiayi. Túmakui̱ Yus shuar Kriaku chichaman chicharmia nu Israer shuaran kajeriarmiayi. “Tuke tsawantin yurumak súarmena nui̱ atumí waje̱ tí nukap suarme. Tura íiniuka ishichik suarme” tiármiayi.

² Túruinian Jesusa tuse akatrámuri̱ ashí Yus shuaran irurar tiármiayi “Iisha Yus Chicham etserkatin iniaisar yurumak súsachminiaitji.

³ Tuma asamtai yatsurtiram atumíiya̱ siati áishmaṉ e̱a̱ktárum yurumkan súsarat tusarum. Péṉker wekainia nu tura neka shuar Yusa Wakaní̱ pimiutkamu ainia nu achiktarum.

⁴ Iikia antsu Yus áujkir unuiniakratkir Yusa Chichame̱ etserkir wétatji” tiármiayi.

⁵ Akatrámu tiarmia nuna ashí aents enentáimsar pujuarmiayi. Túmainiak Estepaṉkan anaikiarmiayi. Estepaṉsha Yusan tuke enentáimtiniuyayi. Tura Yusa Wakaní̱sha pimiutkamuyayi. Chíkich áishmaṉkan anaikiarmiayi, nisha Jirip nuyá̱ Purukuru tura Nikianúrsha nuyá̱ Temun, Parmenassha, Nikiurássha. Nikiurássha Antiukía nuṉkanmaya̱itiat Israernancha ashí umirniuyayi.

⁶ Tura nu siati áishmaṉkan Jesusa akatrámuri̱n itiariármiayi. Táarmatai akatrámusha Yus áujtusar anaikiaji tusar muuknumsha ni uwejé̱n awantsarmiayi.

⁷ Túrasha Yusa Chichame̱nka tuke pampaṉki̱ wémiayi. Nui̱ Jerusaréṉnumsha Yus shuar ti kaweṉkarmiayi. Tura imia Yúsnan pujurniu úuntri̱sha untsurí Yus Chichaman umiriarmiayi.

Estepaṉ Israer shuara úuntri̱i̱n jukimiu

⁸ Estepaṉsha Yusa waitnenkartutairi̱ pimiutkamuyayi. Tura Yusa kakarmari̱sha pimiutkamuyayi. Tuma asa aentsti túrachminian shuar írunmanum túramiayi. Nu shuar Yusa kakarmari̱n nekaawarat tusa túramiayi.

⁹ Israer shuar iruntai̱ je̱a̱ naari̱ Aṉkantin ámiayi. Nuyá̱ áishmaṉsha tura Serini nuṉkanmaya̱ áishmaṉsha tura chíkich nuṉka Arejántrinmaya̱sha, Sirisianmaya̱sha, Ásianmaya̱sha tímian Estepaṉja̱i̱ áujmatsatai tusar káutkarmiayi.

¹⁰ Kame Estepaṉka ni nekatairi̱ji̱a̱i̱ tura Yusa Wakaní̱ nekatairi̱ji̱a̱i̱ tímianak chicháa asamtai nu áishmaṉ Estepaṉja̱i̱ iṉkiunaikiar nupetkataj tukamá tujintkiarmiayi.

¹¹ Tuma asamtai suir enentáimtuiniak chíkich aentsun Estepaṉkan tsanumprurarat tusar e̱a̱karmiayi. Estepaṉ Muisaisnasha Yúsnasha yajauch áujmatui titiarum tusar akikiármiayi.

¹² Peṉké aentsun tura uunt ainia nunasha jintintin armia núja̱i̱sha chichaman júsar yajauch enentáimtikrarmiayi. Tura Estepaṉkan jintiá akirtuawar achikiármiayi. Túrawar Israer shuar naamka matsamármia nui̱ júkiarmiayi.

¹³ Tura wait chichamtinian itiarmiayi. Nisha taar chicharainiak “Yusa Uunt Je̱e̱n ti péṉker ana nu tura Yusa akupkámuri̱ncha ju̱ Estepaṉ tuke yajauch chicharui.

¹⁴ Nú arantcha ju̱ Estepaṉ timia nu antukji. Estepaṉ chichaak ‘Nasarétnumia̱ Jesuska Yusa Uunt Je̱e̱n sá̱a̱ktiatui tura nuyá̱ Muisais iin ikiurtámkimiaj nunasha yapaji̱áttawai’ tímiayi. Nusha Estepaṉ timia nu antukji” tiármiayi. Tura nunasha peṉké ántar tsanumprurarmiayi.

¹⁵ Nuya̱sha ashí Israer shuar naamka iruntramunam pujuarmia nu Estepaṉkan iyaj tukamá ni yapi̱n nayaimpinmaya̱ suntara yapi̱ya nuní̱ íiran wáinkiarmiayi.