Tur. 25 - Yus Papí: Shuarja̱i̱ Yus Yamaram Chicham Najanamu

Papru Jístuja̱i̱ áujmatsamu

¹ Jístusha akupkatin takatan naṉkamataj tusa Sesarianam támiayi. Tura menaintiú tsawant naṉkaamasmatai nuyá̱ we Jerusaréṉnum jeamiayi.

² Nui̱sha Yúsnan pujurniu peṉkeri̱ tura Israer shuara úuntri̱sha Páprun tsanumprurtai tusar Jístun weriarmiayi.

³ Tura chicharainiak “Waitneasam Páprusha Jerusaréṉnum akupkata” tiármiayi. Jintiá maatai tusar wakeruiniak nuna tiármiayi.

⁴ Tutai Jistu chichaak “Atsá. Páprusha Sesarianam sepunam eṉkeamu pujawai. Tura wikia nui̱ wárik waketkittiajai” tímiayi.

⁵ Nuyá̱ nin chicharainiak “Atumsha peṉkeri̱ árumna nu wiji̱a̱i̱ Sesarianam wétiniaitrume. Tura nú áishmaṉka tunaarí̱ ákuiṉkia nui̱sha títiniaitrume” tímiayi.

⁶ Jístuka Jerusaréṉnum ishichik tsawant pujusmiayi. Kame uchu tsawant tura tias tsawantcha pujuschiawash. Nuyá̱ ataksha Sesarianam waketkimiayi. Tura nui̱ jeá kashin tsawa̱r akupin pujutai̱nium pujus “Papru itiatárum” tímiayi.

⁷ Tura Papru waya̱mtai Israer shuar Jerusaréṉnumia̱ taarmia nu káunkarmiayi. Túrawar tí nukap chichainiak “Pápruka tunáa túraiti” tiármiayi. Túrasha peṉké uyu̱mamtikiacharmiayi.

⁸ Pápruka chichamprumak chichaak “Wisha tunaan peṉké túrachuitjiai. Israera uuntri̱ áarmari̱ncha umirkaruitjiai. Tura Yusa Uunt Je̱e̱ncha yajauch awajsachuitjiai. Tura akupniu Sésarancha yajauch peṉké chicharkachuitjiai” tímiayi.

⁹ Jístuka Israer shuar péṉker enentáimtursarat tusa wakerak Páprun chicharuk “Wakerakmiṉkia Jerusaréṉnum wemí. Wisha nui̱ ame túramurmin nekaatjai” tímiayi.

¹⁰ Tutai Papru chichaak “Amesha paant nékame, Israer shuaran yajauchin peṉké túrachjai. Tuma asamtai Rúmanmaya̱ akupniu Sésaran wisha winia túramurun nekartuat tusan ujaktiniaitjiai.

¹¹ Wisha jakamnia tímianu yajauchinkia túranka jákatniuncha ashamatsjai. Tura antsu turutainia nu nekaschaitkiuiṉkia wíniaka Israer shuarnum surunkachminiaitjiai tajai. Tuma asamtai seajme, wí túramun akupin Sésar nekartuati” tímiayi.

¹² Tutai nuyá̱ ni írutramuri̱ji̱a̱i̱ chichasua amik Jistu Páprun chicharuk “Akupniuí̱ wétaj tusam seame. Tuma asamtai nui̱ wétatme” tímiayi.

Papru úunt akupniuja̱i̱ áujmatma

¹³ Tura ishichik tsawant naṉkaamasmatai úunt akupin Akripia ni nuwe̱ja̱i̱ Piriníseja̱i̱ Jístun áujsataj tusa Sesarianam wéarmiayi.

¹⁴ Tura untsurí tsawant pujusármiayi. Tura nui̱ pujuiniai̱ Jístuka Papru túrunamun akupniun ujaak chichaak “Ju̱i̱ áishmaṉ pujawai. Píriks nin achik eṉkea ikiukmiayi.

¹⁵ Kame wikia Jerusaréṉnum pujái̱ Yúsnan pujurniu peṉkeri̱ tura Israer shuara úuntri̱sha Papru yajauchin túraiti tusar káutrukarmiayi. Mantamnati tusam akupkata, tu seatiarmiayi.

¹⁶ Takui̱ wi chicharkun ‘Iisha Rúmanmaya̱ aentstikia chícham nékatsuk mantamnati tusar akupeatsji. Tsanumpruinia nu emka táartin áiniawai. Tura nuyá̱ chichamprumatsa̱i̱ṉ mantamnati tusar akupeatsji iisha’ tímiajai.

¹⁷ Tiniu asan táarmatai wikia nákatsuk kashin tsawa̱ran akupin pujutai̱nium pujusan Papru itiatárum tusan akupkámjai.

¹⁸ Tura Páprun tsanumprurtai tusar taar chichainiaksha wi enentáimmiajna núnaka tícharmiayi.

¹⁹ Antsu áyatik Yus umirkar túmatairi̱n Papru nuna túrachai tiármiayi. Tura nuya̱sha áishmaṉ Jesus nantaki̱ iwiaakui tawai Pápruka, tiármiayi. Nunak tiármiayi.

²⁰ Tura wikia nú chichaman túratniun nékachu asan Páprun aniasmajai ‘¿Amesha Jerusaréṉnum wétaj tusam wakeramek? Nui̱ nu chichaman nekartamawarti’ tímiajai.

²¹ Túrasha ‘Atsá. Ju̱i̱ṉ pujustájai. Rúmanmaya̱ akupin Akustu Sésar nekartuati’ tímiayi Papru. Takui̱ ‘Nuiṉkia tuke sepunam pujusta. Tura wi ukunam akupniu Sésaran akuptúktatjame’ tímiajai” tímiayi Jistu.

²² Nuyá̱ Akripia chichaak “Wisha itiursanak nu áishmaṉ chichaamun anturkaj” tímiayi. Tutai Jistu chichaak “Amesha kashinkia anturkattame” tímiayi.

²³ Tura kashin tsawa̱r Akripia Piriníseja̱i̱ taar iwiáa iwiarmamu ajas waya̱warmiayi. Suntara úuntri̱ji̱a̱i̱ tura nú péprunmaya̱ úuntri̱ji̱a̱i̱ waya̱warmiayi. Tura nui̱ Jistu “Papru itiatárum” tímiayi.

²⁴ Tura Papru támatai Jistu chichaak “Uunt Akripia tura ashí aentstiram matsatrumna nu, pai, jú̱ aishmaṉ iistarum. Ti untsurí Israer shuar Jerusaréṉnumsha tura ju̱i̱ Sesarianmasha jú̱ aishmaṉkan Páprun kajerainiak yajauch chichartuiniawai. Tura tuke iniaitsuk mantamnatniuiti, turutainiawai.

²⁵ Túrasha wíji̱a̱i̱ṉkia tunáa jakamnianka túrachuiti. Kame nisha ‘akupin Akustu Sésar nekartuati’ takui̱ wisha nin akupkataj tusan wakerajai.

²⁶ Tura wariniak akupniun áatrataj nuna nékachu asan Páprun atumín itiarjarme. Tura nekaska Akripiá, ame iniasta tusan itiarjiame. Túrawakmin wi wariniak áartaj nuna nekaatjai.

²⁷ Warí wisha ni yajauch túramuri̱n áattsuk akupniúnam akupkashtiniaitjiai” tímiayi.