Tur. 24 - Yus Papí: Shuarja̱i̱ Yus Yamaram Chicham Najanamu

Papru Píriksja̱i̱ chichaamu

¹ Tura seṉku tsawant naṉkaamasai̱ Yúsnan pujurniu uuntri̱ Ananías, Sesarianam támiayi. Tura Israer shuara uuntri̱ tura tí unuimiaru chichamtincha, ni naari̱ Térturu nuja̱i̱ táarmiayi. Ju̱ aents Páprun kajerainia ásar akupniúnam wéarmiayi.

² Nui̱ Páprun itiarmatai Térturu chichatan juármiayi. “Uunt akupin Píriks, amesha yaimiu asakmin iisha shiir matsatainiaji. Tura imiá neka asakmin ashí aents tímiatrusrik matsatainiaji.

³ Tuma asakmin iisha ashí matsatmanum tuke tsawant ti shiir yumiṉsamajme, uuntá.

⁴ Tura amesha tí nukap chicham antuktin nakitiatspash. Tuma asamtai antsu ishichik waitneasam anturtukta.

⁵ Jú̱ aishmaṉ Papru, suṉkura utsukratniua núniniaiti. Nisha ashí nuṉkanam mesetan najanatniun Israer shuaran ikiakáiniaiti. Tura Jesusa aentsri̱, nasaréu tuinia nuna úuntri̱nti.

⁶ Nú arantcha Yusa Uunt Je̱e̱n yajauch awajsataj tusa pujuru wáinkiar achikmaji. Ii uuntri̱ tana nuja̱i̱ métek asutiátai tusar wakerimji.

⁷ Túrarin nuya̱ṉka kapitián Rísias taa tapit achik jurutrámkimiaji.

⁸ Tura atumek akupin Píriksai̱ werum nui̱ aujmatkatarum turamaji. Tuma asamtai amesha Píriks, Papru aniasta. Nuiṉkia ii tájinia nu nekasaiti, nu nekaattame” tímiayi Térturu.

⁹ Tura Israer shuar pujuarmia nu “Nekasaiti ashí ni tana nu” tiármiayi.

¹⁰ Nuyá̱ Píriks uwejé̱ja̱i̱ Papru chichasat tusa iniaktusmiayi. Túram Papru chichaak “Amesha uuntá, ju̱ aentsu akupniúri̱ ti untsurí uwitin pujusuitme. Tuma asamtai nuikia shiir enentáimsan páchitsuk chichastatjai.

¹¹ Wats, wi túramur nekartuata. Yusan áujsataj tusan Jerusaréṉnum wi wémajna nu tuse tsawant naṉkaamasai.

¹² Nui̱sha yajauch áujmatki̱ weai̱ wáitkiacharmai. Yusa Uunt Je̱e̱ncha tura Israer shuara aujtai̱ je̱e̱ncha tura pepru jintianmasha aentsnum charáa charáa ajá wekái̱ peṉké wáitkiacharmai.

¹³ Ju̱ aents ju̱i̱ matsatainia nu wíniaka peṉké turutchamnia áiniawai.

¹⁴ Túrasha ju̱na paant ujajme. Jesus yamarman jintíana nuna umíajai. Kame Israer shuarka wáitiaiti tuinia nuna wikia umíajai. Túrasha nuna túran ii uuntri̱ Yusri̱ akupkámia nunak umiktasan pujajai. Ashí Muisais aar akupkámia nuna tura ashí Yúsnan yaunchu etserin aar akupkarmia nunak uminiaitjiai.

¹⁵ Tura jakaasha nantaktin átatui, tajai. Warí, péṉker aents nútiksaṉ yajauch aentssha nantakiartatui imia Israer shuar tuíniatsuk. Tura wisha nútiksanak túrunatniuiti tajai.

¹⁶ Tura wisha tiniu asan wikia winia enentái̱rui̱ Yus íimmianum makuumatsuk wekasataj tajai. Tura aentsnumsha nútiksanak peṉké makuumatsuk wekaajai.

¹⁷ Tura uunta, untsurí uwitin chíkich chíkich nuṉkanam wekaasuan amikian winia shuarui̱ támajai. Kuítrinchan kuítian susataj tusan tura Yusa kuítri̱ncha nin susataj tusan támajai.

¹⁸ Túran wisha, Muisais jintinmia nútiksanak nijiaamaran Yusa Uunt Je̱e̱n pujumiajai. Untsurí aents charaatum ajainiasha atsumiayi. Nui̱ wiki pujái̱ Ásianmaya̱ Israer shuar wáitkiarmiayi.

¹⁹ Tura wi yajauch túraitkuiṉkia winia wáitkiarainia nu táchatniukait ámin ujatmáktasa.

²⁰ Túrachkuiṉkia ju̱i̱ pujuinia nu, Yúsnan pujurniu náamkari̱ matsatmanum wi pujumajna nui̱ yajauch túramun nékainiakka turutiarti.

²¹ Kame jakamunmaya̱ nantakminiaiti tau asamtai makurtiajtsarum pujarme matsatmanum tímiaj nuja̱i̱ turutchartimpiash. Nú arantka yajauch túramun peṉké nekartuacharmai” tímiayi Papru.

²² Táman antuk Píriks, Kristu shuari̱ túramun paant nekáa ánik iniaisámiayi. “Antsu kapitián Rísias támatai nuiṉkia nu chichaman nekaatjai” tímiayi.

²³ Tura nuyá̱ suntara úuntri̱n chichaak “Ju̱ Pápruka tuke emetnati. Tura ishichkikia aṉkant apujsatarum. Tura nuyá̱ ni amikri̱ taa yáiṉtaj takui̱ suritkiairap” tímiayi.

²⁴ Tura nuyá̱ chíkich tsawantai̱ ataksha Píriks ni nuwe̱ja̱i̱ Tursiraja̱i̱ támiayi. Núwe̱nka Israer shuarauyayi. Pírikska “Papru itiatárum” tímiayi. Papru Jesukrístunun étserkui antimiayi.

²⁵ Tura Pápruka yajauchiniam wekasashtincha naka wekasatniuncha tura ukunam Yus tunáa aentsnaka asutiátniuiti takui̱ Pírikska ashamak chichaak “Antsu yamaikia máakete. Tura ataksha wi aṉkant pujakun untsukmijiam” tímiayi.

²⁶ Tura aṉkant ajastaj tusa Papru kuítian akirkashtimpiash, tu enentáimias, chichastai tusa Píriks tuke untsúu wémiayi.

²⁷ Tura nuya̱ṉka jimiará uwí naṉkaamasmatai Píriks akupin náamkamu ajapnamiayi. Tura chíkich aents, ni naari̱ Pursiu Jistu akupin náamkamiayi. Tura Pírikska, Israer shuar péṉker enentáimtursarat tusa wakerak Páprun sepunam tuke ikiukmiayi.