Tur. 19 - Yus Papí: Shuarja̱i̱ Yus Yamaram Chicham Najanamu

Papru Ipisiunam jeamu

¹ Tura Apuruska Kurintiunam pujái̱ Pápruka náinniumaani̱ wekaráktak Ipisiunam jeamiayi. Tura nui̱sha Yus shuaran wainkiamiayi.

² Tura aniasmiayi “Atumsha Kristu enentáimtusrum Yus shuar ajasmarmena nui̱, ¿Yusa Shiir Wakaní̱ atumí enentái̱n eṉkemturmakaitrum?” tutai nisha “Atsá. Iikia Yusa Shiir Wakaní̱ awai támaka peṉké ántichuitji” tiármiayi.

³ Tutai Papru aniasmiayi “Enta, ¿nuikia atumsha warí enentáimsarmea imiantmiarum?” Tutai nisha aya̱k “Juaṉ jintintramamiaj nu iisha enentáimsar imiantmiaji” tiármiayi.

⁴ Tutai Papru chichaak “Juaṉsha tunaaruminia̱ enentáimprarum imiantiarum tíchamka. Nuyá̱ tíchamka winia ukurui̱ winittiana nu nekas enentáimtustarum. Nisha Jesus Yusa anaikiamuri̱nti, tu ujatmákchamka” tímiayi Papru.

⁵ Nuna antukar nisha Uunt Jesusa náari̱n enentáimtusar ataksháa imianiarmiayi.

⁶ Tura Papru ni uwejé̱ja̱i̱ nin antiṉ Yusa Wakaní̱ tarurarmiayi. Túram chíkich chichamja̱i̱ chichasarmiayi. Túrunawar Yus Chichaman etseriarmiayi.

⁷ Nusha tuse áishmaṉ ármiayi.

⁸ Tura nui̱sha menaintiú nantu Papru Israer shuar iruntai̱ je̱a̱nam werí Yusa akupeamuri̱n pachis arantutsuk etsermiayi. Túrak nú aentsun ujaak Yúsnan nekasaiti tu enentáimtikrarmiayi.

⁹ Tura chíkichka ni enentái̱n ti ikiatsuárarmiayi. Túrunawar umiktinian peṉké nakitiáinia ásar aents ántamunam Yusa jinti̱n peṉké yajauch chicharkarmiayi. Tuma asamtai Papru Yus shuarnaka akaṉkí̱ yaruak Tiranu unuimiátainium tuke tsawant Yus Chichaman ujaarmiayi.

¹⁰ Nuna túruki̱ jimiará uwí etserkamiayi. Túramu asamtai ashí Ásianmaya̱ aents Israer shuar tura Israer shuarcha Uunt Jesusa túramuri̱n antukarmiayi.

¹¹ Tura aentsti túrachminian túrat tusa Yuska ni kakarmari̱n Páprun susamiayi.

¹² Jáanchniasha pushincha Papru antiṉman júkiar náṉkamas jaa shuar ejeetim, nú jaa shuar nuna antiṉkiar péṉker ajaarmiayi. Iwianchrukusha nuna antiṉkiar íwianch jiinkimtai aṉkant ajaarmiayi.

¹³ Tura chíkich Israer shuar uwishin ármiayi. Tura nisha chíkich chíkich péprunam wéar iwianchrukun iwianchri̱n ji̱i̱rki̱ akuptin ármiayi. Tuma asa nisha Jesusa náari̱ji̱a̱i̱ iwianchin ji̱i̱ktiai tusar iwianchin chicharainiak “Nu Jesus Papru ujaana nuna náari̱ji̱a̱i̱ jíinkitiarum tájarme” tiármiayi.

¹⁴ Tura Yúsnan pujurniu uuntri̱ Esewia náartin, siati uchirí̱ armia nu, nuna túriarmiayi.

¹⁵ Túrasha Jesusa náari̱ji̱a̱i̱ jiinkitia tuíniakui iwianchcha chichaak “Jesusnaka nékajai. Tura Pápruncha nékajai. Tura atumsha ¿yátsukaitrum?” tímiayi.

¹⁶ Nuna tinia iwianchruku áishmaṉ tsékeṉtki̱ nú aishmaṉkan kakaram katsumak nupetkarmiayi. Túram ti katsumam nisha misú tura numpamnawar jíinkiar pisararmiayi.

¹⁷ Nusha Ipisiunam túrunamiayi. Túrunamtai Ipisiunmaya̱ Israer shuarsha tura Israer shuarchasha nuna túrunamun nekaawar ti ashamkarmiayi. Tura Uunt Jesusa náari̱n shiir awajsarmiayi.

¹⁸ Túmainiai̱ untsurí shuar Kristu nekas Yusa uchirí̱nti nekas tu enentáimtusar tunáa túramuri̱n nuna paant ujakármiayi.

¹⁹ Tura untsurí uwishniumawarmia nu, wawekrattai papí armia nuna itiarmiayi. Itiar ju̱ka iniaiyaji tusar ashí iimiainiai̱ṉ áesawarmiayi. Nú papí áesawarmia nuna kuítri̱sha seṉkuintia mir naṉkaamasauyayi.

²⁰ Tu túrunamtai Uunt Yusa Chichame̱ pampaṉki̱ tura nupetmaki̱ wémiayi.

²¹ Tuma asamtai nuya̱sha Pápruka Masetúnianam tura Akayanmasha irautjai tu enentáimsamiayi. Tura nuya̱sha Jerusaréṉnum waketkitjiai, tímiayi. Tura nuyá̱ ukunam Rúmanmasha wetajai, tu enentáimsamiayi.

²² Masetúnia wétin asa Papru ni tsaníakmari̱n Masetúnianam emka akupkámiayi. Timiutéun Erastuja̱i̱ akupkarmiayi. Tura niṉkia Ásianam seturmiayi.

Ipisiunam charaatum ajamu

²³ Pápruka Ipisiunam tuke pujái̱ nuyá̱ aents Yus Chichaman nakitiáiniak charaatum ajarmiayi.

²⁴ Iis, nui̱ Ipisiunam kaya yusa je̱e̱ ámiayi. Nu yus núwa̱uyayi, Tiana náartin. Tura áishmaṉ, Timitriu náartin, kuitji̱a̱i̱ nakumak nú je̱a̱n uchichin najanniuyayi. Tura nisha nú takatja̱i̱ ti kuítrintin ajasmiayi. Tura chíkich áishmaṉ nú takatan takarmia nunasha ti kuítrintin awajsarmiayi.

²⁵ Timitriusha niji̱a̱i̱ takarmia nuna ikiaanak chikichnasha niji̱a̱i̱ métektaku takarmia nunasha ikiaanak niji̱a̱i̱ charaatum ajarmiayi. Timitriusha chichaak “Winia írutramutiram antuktarum. Iisha ju̱ takat takaajnia ju̱ja̱i̱ ti kuit achíatsjik.

²⁶ Tura atumsha ju̱ Papru wáintrumna nu tura ántarmena nu chichaak ‘Ashí aents najanamu yuska ántar áiniawai’ tátsuk. Nuna tau asa ju̱i̱ Ipisiunam tura arant ashí Ásianam ni yusri̱n iniaisarat tusa enentáimtikrarai. Tuma asamtai untsurí aents, ii yusri̱ Tiánan ikiuiniak, Papru tana nuna umirainiatsuk.

²⁷ Papru tu étserkui iisha itiurchat pujuschattajik. Kuit ii achíaj nuka meṉkakashtatuak. Tura nú arantcha ii yusri̱ Tiana je̱e̱n shuar iniaisachartatuak. Tura nuyá̱ Ásianmaya̱sha tura ashí nuṉkanmaya̱ aentssha ii yusri̱ Tiana shiir awajainia nuna yapaji̱áwar aun nakitrachartatuak” tímiayi Timitriu.

²⁸ Nuna antukar aentssha ti kajekar charaatum ajarmiayi. Túmainiak “Ipisiu aentstikia aya Tianak wakeraji” tu untsumiarmiayi.

²⁹ Nuiṉkia aents páchim enentáimprarmiayi. Túmainiak Masetúnianmaya̱ Kayuncha Aristárkuncha Páprun nemari̱n armia nuna achikiar japirkutak iruntai̱ je̱a̱nam júkiarmiayi.

³⁰ Tura Pápruka iruntai̱ je̱a̱nam wayá̱ chichastaj taun nuyá̱ Yus shuar armia nu, nuna suritkiarmiayi.

³¹ Tura Ásianmaya̱ uuntri̱, Páprun amikri̱ ásar, ai̱ṉkia waya̱wa̱i̱ṉ tusar chichaman akuptúkarmiayi.

³² Túrasha irunar pujuarmia nu, páchim enentáimprar chíkichka nusháa untsumiarmiayi. Tura chikitcha nútiksaraṉ aushá untsumiarmiayi. Tura chíkichkia ti untsurí nekaachar “wariniak irunturara” tiármiayi.

³³ Chíkich nui̱ wajarmia nu charaatum ajarmia nuna Israer shuaran Arejántrun jintintrar eem shitiawarmiayi. Arejántrusha Kayun tura Aristárkuncha ayamprúktinian wakerak takamátsatarum tusa uwejé̱n takuimiayi.

³⁴ Túrasha aents iruntrarmia nu ju̱ka Israer shuaraiti tusa nekaawar nú arant charaatum ajainiak “Ipisiu aentstikia aya Tianak wakeraji” ímia imiatainiakua tí nukap pujursarmiayi.

³⁵ Ipisiunmaya̱ papí áintri̱sha aentsun itiatmamtik chichaak “Ipisiu shuartiram antuktarum. Ii uunt yusri̱ Tiana je̱e̱ íistinkia íichukaitiajⁱ. Tura ni nakumkamuri̱sha nayaimpinmaya̱ iniarmiania nusha íischatniukaitiajⁱ. Tura nunasha ashí aents paant nékainiatsuk.

³⁶ Warí, núnaka ashí aents nékainia asamtai atumsha itiatkatarum. Túrarum enentáimtsuk yajauch túrawairap.

³⁷ Íimiatarum. Ju̱ áishmaṉ átum itiarumna nu ii yusri̱n yajauch chicharkacharai. Tura ni je̱e̱nka yajauch awajsacharai.

³⁸ Wats, Timitriu tura niji̱a̱i̱ takainiana nu tunáa túramun ujaktai tusar wakeruiniakka pepru peṉkeri̱n werishtinkiait. Nuiṉkia mái̱mtek iwiainiakarti.

³⁹ Tura chíkich chicham ákuiṉkia péṉker iruntrarum iwiaratarum.

⁴⁰ Kame ju̱ yamái túrunamun nekaawar Rúmanmaya̱ akupin ‘Ii uuntri̱ yajauch awajsatai tusarum túrachurmeash’ turamchatjiash. Warí, nisha ‘¿Urukamtai charaatum ajarum?’ takui̱sha áimkiatin peṉké tujintkiattaji” tímiayi.

⁴¹ Tura papí aint nuna tuasua amik “Áukete. Wetarum” tímiayi.