Tur. 17 - Yus Papí: Shuarja̱i̱ Yus Yamaram Chicham Najanamu

Tisarúnikianam charaatum ajamu

¹ Papru Sérassha wénak Ampipuris péprunam Apurúnia péprunmasha naṉkaamarkutak Tisarúnikia péprunam jeawarmiayi. Nui̱ Israer shuara iruntai̱ je̱e̱ ámiayi.

² Tura Pápruka nuna tuke túrin asa nu je̱a̱nam wémiayi. Tura nui̱sha menaintiú sáwartin Yus Chichaman paant etsermiayi.

³ Tura Páprusha Yus Chicham tana tímiatrusaṉ jintintiármiayi. Tura Krístusha wáitias jákatniuyi tura nuya̱sha jakanmaya̱ nantaktiniuyi. Tura nuya̱sha chicharuk “Wi Jesusnan atumín ujajrumna nusha Yusa anaikiamuri̱n Kristu tutain tájarme” tímiayi Papru.

⁴ Nuna takui̱ Israer shuar chikishtarchik umikiarmiayi. Túrawar Pápruja̱i̱ Sérasja̱i̱sha tsaniṉkiarmiayi. Tura Kriaku aentssha ti untsurí Yusan umirkarmiayi. Tura nuwa̱ peṉkeri̱ armia nusha nútiksaraṉ umikiarmiayi.

⁵ Tura Israer shuarka Yus shuar ajascharmia nu Páprun Sérasnasha suir íisarmiayi. Túrawar chíkich yajauch áishmaṉ naki yujá armia nuja̱i̱ chichasar nu peprunam charáa charáa ajarmiayi. Tura Páprun Sérasnasha achikiar aentsu úuntri̱n suruktai tusar Jasuna je̱e̱n áreṉkarmiayi.

⁶ Túrasha Páprunka Sérasja̱i̱ awetrar Jasunan tura chíkich Yus shuarnasha achikiar japirkutak júkiarmiayi. Tura pepru úuntri̱i̱n juíniak chicharainiak “Jú̱ aishmaṉsha ashí nuṉkanam charaatum ajá wekarmia nu yamaikia tímiajai tarutramarji.

⁷ Tura ju̱ Jasun ni je̱e̱n itiaarmiayi. Tura nisha ashí mash Rúmanmaya̱ úunt akupniu chichame̱n nakitiáiniawai. Tura iis, chíkich akupin awai, tuíniawai. Nisha Jesusaiti turamainiaji” tiármiayi.

⁸ Nu chichaman antukar aents nui̱ pujuarmia nu, úuntrimiak charaatum ajarmiayi.

⁹ Tura Jasun chíkich Yus shuarja̱i̱ Papru nekas awemattaji tusar “Pai, kuit ikiuaji” tiármiayi. Nuna takui̱ pepru uuntri̱ nin akupkarmiayi.

Piríanam

¹⁰ Nuiṉkia nú kashi Yus shuar Páprun Sérasnasha Piría péprunam akupkarmiayi. Tura nui̱ jeawar Israer shuar iruntai̱ je̱a̱nam wéarmiayi.

¹¹ Piríanmaya̱ aentska Tisarúnikianmaya̱ áentsja̱i̱ṉkia naṉkaamas péṉker enentáimkia ármiayi. Tuke enentáiji̱a̱i̱ Yus Chichaman ántiarmiayi. Túrawar tuke tsawant imia niṉkisha Papru tana nuna nekasashit tusar Yusa papiri̱n íiniak péṉker esetar íisar unuimiármiayi.

¹² Tuma ásar untsurí Israer shuar Krístun enentáimtusar Yus shuar ajasármiayi. Tura Kriaku aents nuwa̱ peṉkeri̱ armia nusha áishmaṉsha nekas enentáimtusarmiayi.

¹³ Túrasha Tisarúnikianmaya̱ Israer shuarka Papru Yus Chichaman Piría péprunam étserun antukar nui̱ weriar charaatum awajiármiayi.

¹⁴ Túmainiakui Yus shuar Páprun árutsuk nayantsanam akupkarmiayi. Tura Séraska Timiutéuja̱i̱ nuiṉ Piríanam juákarmiayi.

¹⁵ Tura Páprun nemariarmia nu Atenas péprunam nin ejeyarmiayi. Tura nisha waketainiakui Papru chichaman akatar akupkámiayi, Sérassha Timiutéusha wárik winiarti tusa.

Atenasnum

¹⁶ Tura Papru Atenas péprunam pujus Sérasnasha Timiutéuncha nákamiayi. Nui̱ nú péprunam najankamu yus ti írunkui Páprusha kúntuts enentáimmiayi.

¹⁷ Tuma asa Israer shuar iruntai̱ je̱a̱nam Israer shuarja̱i̱ tura chíkich aents Yusan enentáimtiarmia nuja̱i̱ chichasmiayi. Tura tuke tsawant pepru ajapén aentsja̱i̱ iṉkiunaikiar chichasarmiayi.

¹⁸ Nuyá̱ chichaman jintin chíkich naari̱, ipikiúriu armia nu tura chíkichkia, ni naari̱ estuikiu armia nusha Páprun áujmatsarmiayi. Chíkichkia tiármiayi “Imiá chichamtincha ju̱sha waritramtajik.” Tura chikitcha tiármiayi “Yajaya̱ yúsnan etserniuchuashit.” Páprusha Jesusa túrunamuri̱n tura aents jakamunmaya̱ nantaktinian étserkui nuna tiármiayi.

¹⁹ Nuya̱ṉka aents iruntai̱niam naari̱ Ariupaku tamanum Páprun júkiarmiayi. Nui̱sha tuke irunin ármiayi. Nui̱ Páprun aniasarmiayi “Iisha ame yamaram támena nu nekaatai tusar wakeraji.

²⁰ Amesha nusháa chicham jintiniaitme. Túmaitkiui ju̱ chichamsha warintiuak tusar nekaatai tusar wakeraji” tiármiayi.

²¹ (Atenasnumia̱ aentssha tura chíkich nuṉkanmaya̱ shuar nui̱ pujuarmia nusha aya yamaram chicham amia nunak ántiarmiayi. Tura aya nunak áujmatiarmiayi.)

²² Nuya̱ṉka Papru Ariupakunam ajapén wajaki̱ chichaak “Atenasnumia̱ áishmaṉtiram wi nékajai, atumsha atumí yusri̱ ainia nuyá̱ tsurakchamniaitrume.

²³ Kame wi nuik atumí yusri̱ enentáimtutai̱niam íistaj tukamán nui̱ je̱a̱chin iwiaramun, JU̱ NEKAACHMA YUSNAITI tu áarman wainkiamjai. Wátsek, ju̱ Yus átum nékachiatrum tikishmátrumna nuna ujaktajrume.

²⁴ Nekaatarum, nu Uunt Yuska ashí nuṉkan tura nui̱ írunna nuna najanaiti. Tura Nisha nayaimpin nuṉkancha nérenniuri̱nti. Tura aents najanamu je̱a̱nam nú Yuska pujuchuiti.

²⁵ Nisha aents yaintkiat tusa atsumatsui. Warí, imia niṉki Nisha ii iwiaakmari̱n, ii mayattairi̱ncha tura ashí írunna nunasha súramtsujik.

²⁶ Nekaatarum. Ashí nuṉkanam matsamsarat tusa nú numpanmaya̱nak ashí aentsun najanamiayi. Tura Yuska ii tsawantri̱n nekapmaiti, ii pujustinniasha nútiksaṉ nakakmiayi.

²⁷ Winia e̱a̱tkar wáitkiarat tusa Yus nuna túrayi. Túrasha Yuska jeashtaka pujurtamtsuji.

²⁸ Iis, iisha Yusja̱i̱ iwiaakji. Yusja̱i̱ muchitiaji. Tura Yusja̱i̱ ii kakarmari̱ takakji. Nútiksaṉ atumí papí aintri̱ tíchamka ‘Ashí iincha Yus najatmaitji.’

²⁹ Tura iisha Yus najatma asakrin kuriji̱a̱i̱ najanamusha, yúsaiti, tu enentáimsashtiniaitji. Tura kuit yussha, kaya yussha aents enentáimsar najanamuka yúsaiti tu enentáimsashtiniaitji.

³⁰ Aents Yusan nékainiachuk túrawarmia nuna Yuska yáunchuka pachischamiayi. Túrasha yamaikia Yus ashí aentsun chicharuk ‘Tunaarum iniaisarum nekas enentáiji̱a̱i̱ enentáimtumasrum iwiarnartarum’ túramji.

³¹ Yuska áishmaṉkan anaikiaiti. Nú áishmaṉ ashí aentsti, yaki péṉkeran túriniait yaki yajauchin túriniait núnaka nekarmattaji. Nú áishmaṉ Yus akupkámun tuke enentáimtakui Yus nin anaikiaiti. Tura tsawant nú túrunatin átatna nuna Yus Niṉki achikiuiti. Túrasha nekas anaikiajai tusa tura ashí aentstiram nekaatarum tusa nú aishmaṉkan jakamunmaya̱ iniantkímiayi” tímiayi Papru.

³² Tura nuna jakamunmaya̱ nantaktinian áujmatun antukar chíkichkia wishikiarmiayi. Tura chíkich “Yamaikia máakete. Antsu chíkich tsawantin antukmi” tiármiayi.

³³ Tutai Papru iniaisámiayi.

³⁴ Tura chíkich aentska Papru táman Krístun nekas enentáiji̱a̱i̱ enentáimtusar nin nemarsarmiayi. Nui̱sha Tiuníseu páchitkiauyayi. Nisha Ariupaku aentsuyayi. Tura nuya̱sha nuwa̱ ni naari̱ Támaris tura chíkich aentssha nútiksaraṉ nemariarmiayi Páprun.