Tur. 14 - Yus Papí: Shuarja̱i̱ Yus Yamaram Chicham Najanamu

Ikiuniunam túrunamu

¹ Ikiuniu péprunam Papru Pirnapíji̱a̱i̱ jeawar Israer shuar iruntai̱ je̱a̱nam waya̱warmiayi. Túrunawar Yus Chichaman ti paant etserkarmatai ti untsurí Israer shuarsha tura Kriaku shuarsha Yusan nekas enentáimtusarmiayi.

² Tura chíkich Israer shuar, Yusan umirkacharu armia nu, Yus shuaran kajerkarat tusar Israer shuarchan yajauch enentáimtikrarmiayi.

³ Tuma asamtai Papru Pirnapíji̱a̱i̱ nú nuṉkanam tí nukap tsawant pujusármiayi. Tura Uunt Yusan enentáimtuinia ásar arantutsuk Yusa waitneṉkratairi̱n etserkarmiayi. Tura etserinia nu winia kakarmarja̱i̱nti tusa Yuska aents túrachminian najanmamtikiawarmiayi.

⁴ Tura Ikiuniunmaya̱ aentska jímiar kanakarmiayi. Chíkichkia Israer shuar tuinia nu nekasaiti tura chíkichkia Jesusa akatrámuri̱ tuinia nu nekasaiti, tiármiayi.

⁵ Tura nuyá̱ Israer shuarchaja̱i̱ Israer shuarka chichasar pepru úuntri̱ji̱a̱i̱ chichasarmiayi. Tura Papru Pirnapíji̱a̱i̱ katsekkar tura kayaja̱i̱ tukurar yajauch awajsatniun naṉkamawarmiayi.

⁶ Túrasha Papru Pirnapíji̱a̱i̱ nuna anturmamkar Rístranam wéarmiayi. Nuya̱ṉka Tírpiniam wéarmiayi. Nu pépruka mai̱ Rikiaunia nuṉkanmaiti.

⁷ Tura Yus Chichaman etserkarmiayi.

Rístranam Papru kayaja̱i̱ tukurma

⁸ Rístranam áishmaṉ tunamáru pujumiayi. Akiiniamuri̱ya̱ṉ wekaichauyayi.

⁹ Nú aishmaṉ Papru chichaamun antúu pujumiayi. Túman Papru émamkemas íismiayi. Nisha Yusa kakarmari̱ji̱a̱i̱ tsuamartatjai tu enentáimiun Papru nekaamiayi.

¹⁰ Tura Pápruka kakantar chicharuk “Wajakím wewe ajasam wajasta” tímiayi. Tutai áishmaṉ wiut kutsua̱r wajaki̱ wekaimiayi.

¹¹ Papru túramia nuna aents wáinkiar Rikiaunia chichamja̱i̱ untsumainiak “Yuska áishmaṉka ánin ajasáru iin tarutramarji” tiármiayi.

¹² Pirnapínkia, Júpitir yúsaiti. Tura Páprunka, Mirkuriu yúsaiti, tiármiayi. Pápruka tí chicháu asamtai tu anaikiarmiayi.

¹³ Nú pepru jeamunam Júpitir náartin yusa je̱e̱n pujumiayi. Tura Júpitir najankamu yusa pujurniu kuku̱jín iwiarkamun, waakaja̱i̱ itiamiayi. Tura nisha ni aentsri̱ji̱a̱i̱ waakan maatai tusar pujuarmiayi. Tura tikishmátrar ajamsatai, tiármiayi.

¹⁴ Tura Jesusa akatrámuri̱ Pirnapísha Páprusha nuna nekaawar auka nakitiaji tusar, ni pushiri̱n ja̱a̱rarmiayi. Túrawar aents írunmanum pachiniawarmiayi.

¹⁵ Tura chicharainiak “Shuara, ¿urukamtai áitkiarum? Iisha yúschaitji. Átumea ánkitji. Peṉké ántrarum túrarmena nu ikiukrum nekas Yus nemarsatarum tusar iisha taji. Nekas Yuska nayaimpincha, nuṉkancha, nayantsancha tura ashí nui̱ írunna nunasha najanaiti.YKan. 146:6

¹⁶ Iis, aents ni enentáimmiari̱ji̱a̱i̱ṉ wekasarat tusa Yuska yaunchu tsaṉkatkamiayi.

¹⁷ Tuma ai̱ṉ shuaran péṉker awajsámuja̱i̱ Witjiai Nekas Yus tusa paant awajmámsamiayi. Kame yumi yutuktinian nayaimpinmaya̱ akuptúrmaji. Tura ejemarar warasarmi tusa yurumak nerektinniasha súramji” tímiayi.

¹⁸ Túrasha Pápruka tímianu támaitiat nuna anturtsuk waakan máwar nin tikishmátrar ajamsataitsa wakeriarma nuna suritkiachminniak suritkiarmiayi nu aentsun.

¹⁹ Tura nuyá̱ Antiukíanmaya̱ Ikiuniunmaya̱sha Israer shuar táarmiayi. Taar nuyá̱ aentsun Páprun yajauch awajsatniun enentáimtikrarmiayi. Tú tutai Páprun kayaja̱i̱ tukurarmiayi. Tura jakayi tiar péprunmaya̱ japiki̱ júkiar arant áepsarmiayi.

²⁰ Túrasha Yus shuar Páprun tariar téntakarmiayi. Túram nuiṉkia Papru wajaki̱ we ataksha péprunam waya̱miayi. Tura kashin tsawa̱rar Papru Pirnapíji̱a̱i̱ Tírpinium wéarmiayi.

²¹ Tírpinium pujusár uwempratin chichaman etserkarmatai untsurí shuar Yusan umirkarmiayi. Nú shuaran Yus Chichaman jintintiá amukar Rístranam, Ikiuniunam, Antiukíanmasha waketkiarmiayi.

²² Waketainiak “ashí Yus tana nu tímiatrusrumek tuke umirkatarum” tuíniak Yus shuaran ikiaká̱rarmiayi. Tura nin tiármiayi “Yusa akupeamuri̱i̱n pachinkiataj tákurkia ti wáitsatniuitji.”

²³ Tura Yus shuar írunmanum Yus shuaran wáinniun anaikiarmiayi. Yurumtsuk Yusan áujenak “Kristu enentáimtusurmena nútirmin Yus iirmasarti” tiar ikiukiarmiayi.

Antiukíanam waketkiarma

²⁴ Nuyá̱ Pisitianam naṉkamakiar Pampirianam jeawarmiayi.

²⁵ Nui̱ jeawar Pirjinium Yus Chichaman etserkar nuyá̱ Ataria péprunam wéarmiayi.

²⁶ Nui̱ kanunam eṉkemprar yaunchu jíinkiarmia nú Antiukíanam waketkiarmiayi. Páprusha Pirnapísha tuke jíintsa̱i̱ṉ nú Antiukíanmaya̱ Yus shuar chichainiak “Yusa takatri̱ túrattarmena nuna Yus waitnentramak yainmakarti” tiar akupkarmiayi nuikⁱ.

²⁷ Nú Antiukíanam jeawar Yus shuaran irurar ashí Yus nin yaiṉkiarmia nuna ujakármiayi. Tura nútiksaṉ Israer shuarchan Uunt Yus uwemtikrataj tusa untsukmia nunasha ujakármiayi.

²⁸ Tura nuyá̱ Yus shuarja̱i̱ Papru Pirnapíji̱a̱i̱ núkap tsawant pujusármiayi.