Tur. 13 - Yus Papí: Shuarja̱i̱ Yus Yamaram Chicham Najanamu

Pirnapí Sáuruja̱i̱ etserkarat tusa akupénamu

¹ Antiukíanmaya̱ Yus shuarnum Yúsnan etserin páchitra ármiayi. Nútiksaṉ Yus Chichaman jintinniuri̱sha ármiayi. Pirnapísha tura Mukusa Semiuṉsha, nuyá̱ chíkich Serinianmaya̱ Rúsiusha tura akupin Irutisa tsakatke̱sha, ni naari̱ Manaen, Sáurusha tímianu ármiayi.

² Tura chíkich tsawantai̱ nisha yurumtsuk Yusan áujeak pujuiniai̱ Yusa Wakaní̱ chichaak “Pirnapísha, Sáurusha akantúrkitiarum. Wi takatan súsaitjiana nuna takasarat tusarum túratarum” tímiayi.

³ Tutai ijiarma Yusan áujsua amikiar shiir wetarum tusar ni uwejé̱n Sáurun Pirnapíncha awantkarmiayi. Túrawar Antiukíanmaya̱ akupkarmiayi.

Chípriniam jeamu

⁴ Tura nuya̱ṉka Yusa Wakaní̱ akupkam Pirnapísha Sáurusha jíinkiar Serusia péprunam jeawarmiayi. Nuyá̱ uunt kanunam eṉkemprar Chípriniam jeawarmiayi.

⁵ Juaṉsha yáiṉtaj tusa némarkauyayi. Nui̱ Saraminia péprunam jeawar Israer shuar iruntai̱ je̱a̱nam waya̱war Yus Chichaman etseriarmiayi.

⁶ Tura Chípriniam pepru ainia nui̱ wá̱i̱rkutak Pápusnum jeawarmiayi. Nui̱ jeawar Israer shuar uwishin ni naari̱ Parjesúsan wáinkiarmiayi. Ni chíkich náari̱ṉkia Erimiasauyayi. Nisha uwishniuitiat Yúsnan étsereajai, tíniuyayi.

⁷ Akupin Serjiu Páuruja̱i̱ pujuyayi. Nu akupniúsha tí peṉker enentáimniuyayi. Tura Pirnapín Sáuruncha táarat tusa chichaman akuptúkmiayi. Kame Yus Chichaman antuktaj tusa wakerak untsukmiayi.

⁸ Tura uwishin Erimias nuna nakitiak “Auka péṉkerchaiti” tímiayi. Akupniúsha Yusan umirka̱i̱ṉ tusa nuna tímiayi.

⁹ Nuya̱ṉka Sauru, chíkich naari̱ Papru, Yusa Wakaní̱ pimiutkamu asa nu uwishniun émamkemas iis chicharuk

¹⁰ “Ámeka wáitiaitme. Anaṉkartiniaitme. Yajauchitme. Maaj, iwianchitme. Tura ashí péṉker ana nuka nakitniuitme. Tsej, ¿urukamtai Yusa jinti̱ naka ana nu emeskim wéam?

¹¹ Pai, yamaikia Uunt Yus asutiámattawai. Yamaikia amesha ji̱mi kusurmatai untsurí tsawant tsáapnin wáintsuk pujustatme” tímiayi. Tura nú chichamaik ji̱ kusurmatai kirit íimiuk eṉkeki̱ jurukit tusa chikichan e̱a̱miayi.

¹² Nu túrunamtai akupin nuna wainiak ti enentáimpramiayi. Túruna Uunt Yusa Chichame̱n enentáimtur umikmiayi.

Chíkich Antiukíanam etserkamu

¹³ Nuyá̱ Juaṉ waketki̱ Jerusaréṉnum wémiayi. Tura antsu Pápruka ni tsaníakmari̱ji̱a̱i̱ kanunam eṉkemprar Pápusnumka ikiukiar Pirji péprunam jeawarmiayi. Nusha amaini̱ Pampirianam pujawai.

¹⁴ Nuyá̱ Pirjinium naṉkaikiar Antiukíanam jeawarmiayi. Nú Antiukíasha Pisitia nuṉkanam pujawai. Nui̱ jeawar Israer shuar ayampratin tsawantin, nuka sáwartin, Israer shuar iruntai̱ je̱a̱nam waya̱war pujusármiayi.

¹⁵ Tura nui̱ Yus Papinium yaunchu áarman áujas aminkiamtai Israer shuar iruntai̱ je̱a̱nam íirniuri̱ Páprun tiármiayi “Yatsuru, jintíatin chicham takakkurmeka yamaik titiarum. Antukarmi” tiármiayi.

¹⁶ Tutai Papru wajaki̱ uweje̱ takuimiayi. Tura chichaak “Israer shuartiram tura Yusan umirkataj tusa wakerarmena nu antuktarum.

¹⁷ Ii Yusri̱ ii yaunchu úuntri̱n Israer shuartin achikmiayi. Tura nisha írara núnik Ejiptunam matsatainiai̱ Yuska nin páchiniak uunt awajsarmiayi. Yus ni kakarmari̱ji̱a̱i̱ nú nuṉkanmaya̱ ii yaunchu úuntri̱n uwemtikrarmiayi.

¹⁸ Túrasha atsamunam ii úuntri̱n kuaraintia uwí Yuska katsuntramiayi.

¹⁹ Nuya̱ṉka Kanaannum uunt nuṉka mátsatkamun siati amuk ni nuṉké̱ armia nuna nérentin ajastarum tusa súsarmiayi.

²⁰ Nuna tura Yúsnan etserin Samuirai̱ jeamam kuatrusiántu seṉkuintia uwí chichamprinian anaitiukarmiayi.

²¹ Túrasha úunt akupniun seawarmiayi. Túmainiakui Piṉjiamín shuar Kisha uchirí̱ Saur anaitiukaram kuaraintia uwí akupkarmiayi.

²² Tura Sáuran anaikiayat ataksha Yus awaṉtukmiayi. Tura nuyá̱ íksaṉ nú nuṉkanam úunt akupin atí tusa Tawitian anaikiamiayi. Tura Yuska Tawitnian chichaak ‘Isái uchirí̱n Tawitian winia enentái̱r jeamtai achirmákjai. Tura Winia umirtin átatui’ 1 Sam. 13:14; 1 Akup. 15:5 tímiayi.

²³ Wats, Tawit weanmaya̱ Jesusaiti. Tura Yuska Israer shuaran Uwemtikrartinian Jesusan anaitiukmiayi, yaunchu timia uminkiat tusa.

²⁴ Jesuska táatsa̱i̱ṉ Juaṉ ashí Israer shuaran tunaarí̱nia̱ enentáimtumar imiantinian ujakmiayi.

²⁵ Tura Juaṉsha ni jákatniuri̱ jeatémamtai chichaak ‘Átum enentáimtarmena núchaitjiai. Wikia Yusa anaikiamuri̱, Kristu tutai nákarmena núchaitjiai. Antsu Niṉkia winia ukunmarui̱ winittiawai. Tura Nisha wíji̱a̱i̱ṉkia tí naṉkamantu asamtai wikia sapatri̱ncha atitrataj tíchamniaitjiai’ tímiayi.

²⁶ Pai, yatsurtiram, Aprajám weatiram tura ashí Yus ashamkarum umirkaitrumna nu, antuktarum. Ju̱ uwempratin chichamka íiniuiti.

²⁷ Iis, Jesusa túrunatniuri̱n Yuska yaunchu ni etserniuri̱n áamtikrachmakia. Tura ukunam Jerusaréṉnumia̱ shuar ni akupniúri̱ji̱a̱i̱ tuke ayampratin tsawantai̱ nuna áujenayatkesha peṉké nekaacharmiayi. Tuma ásar Jesuska Yusa Uchirí̱nti tícharmiayi. Tura jakati tiarmia nui̱ Jesusa túrunatniuri̱n, Yus yaunchu chichakmia nuna tímiatrusaraṉ umikiarmiayi.

²⁸ Jesuska peṉké tunaamkachunak yamaikia mantamnati tusar Piratun seawarmiayi.

²⁹ Tura Yusa Papirí̱i̱n ashí Jesusnan timia nuna tímiannak umikiarmiayi. Tura nuyá̱ krúsnumia̱ itiarar iwiarsarmiayi.

³⁰ Túramunak Yus jakamunmaya̱n iniantkímiayi.

³¹ Jesuska jakamunmaya̱ nantaki̱ yaunchu Kariréanmaya̱ Jerusaréṉnum Niji̱a̱i̱ írutka wéarmia nuna núkap tsawantin pujus wantintiukmiayi. Nú shuaraiti yamaikia Jesusa túrunamuri̱n etserainia nu.

³² Iisha núnisrik shiir chichaman Yus yaunchu ii apachrí̱n tiarmia nu étsereaji.

³³ Iisha Israer wea asakrin Yuska Jesusan iniantkímia nuja̱i̱ ii apachrí̱n anajmatramia nuna yamái uminkiaiti. Kame Yus Kanta papinium jímiar ju̱ áarmaiti, ‘Ámeka winia Uchiruitme. Túmaitkiui yamaikia winia iwiaakmar susamuitme.’ YKan. 2:7

³⁴ Tura Yuska Jesusa nantakmiari̱n jintintiak tura ni aya̱shi̱ káurchatniun jintintiak chíkich Yus Kanta papinium ju̱na áamtikramiayi, ‘Nekas péṉkeran Tawitian anajmatramaj nuna atumín amastatjai.’ Isa. 55:3

³⁵ Tura nú arant, nú paant atí tusa chíkich Yus Kanta papinium ju̱ aarma awai, ‘Yusa, ame Uchiram aneamna nuna aya̱shi̱ káurtincha tsaṉkatkashtatme.’ YKan. 16:10

³⁶ Yatsurtiram nekaatarum, Yuska Tawitia aya̱shí̱n tíchamiayi nuna. Tawitkia Yus timian amuk jakamiayi. Túrasha ni aya̱shí̱ṉkia káurmiayi.

³⁷ Tura antsu Yus iniantkímia nuna aya̱shí̱ṉkia peṉké káurchamiayi.

³⁸ Tuma asamtai yatsurtiram nekaatarum. Jesusja̱i̱ṉkete tunáa asakártin.

³⁹ Tura Muisais yaunchu akupkámia nuja̱i̱ tunáa tsaṉkurnarchamnia nu, yamaikia Jesusja̱i̱ tsaṉkurnartiniaiti.

^40-41 Yúsnan etserin ju̱na áarmiayi ‘Enentáimpratarum wishikiartintiram. Ashamkatarum. Túrarum meṉkatumpratarum. Wi Yus asan átum pujarmena nui̱ aents túrachminian túrattajna nusha peṉkesh nekaashtatrume, chíkich ujatmainiakuisha.’ Isa. 29:14; Awa. 1:5 Tuma asamtai yatsurtiram, aneartarum atumín nuna túrutmawa̱i̱rum, Yúsnan etserin aarma tana nútiksaṉ.” Nuna chichaak amukmiayi Papru.

⁴² Tura nuyá̱ Papru Pirnapíji̱a̱i̱ jiinkí̱ wénakui aents chichainiak “Chíkich ayampratin tsawantai̱sha jú̱tiksarmek etserkatarum” tiármiayi.

⁴³ Tura nuyá̱ iruntsua tseṉkeenak Israer shuar ii uuntri̱ yaunchu tiarmia nuna yawe̱tsuk umiktiniasha tura chíkichkia Israer ajasárusha Yusan umirkatajtsa wakeriarmia nuka Páprun Pirnapíncha nemarsarmiayi. Nisha nu aentsun chicharuk “Yusa aneṉkrattairi̱ enentáimtusrum kaka̱rtarum” tiármiayi.

⁴⁴ Tura chíkich ayampratin tsawantinkia Yus Chicham antuktai tusar nu péprunmaya̱ aentska ti untsurí tu̱á̱karmiayi.

⁴⁵ Tura Israer shuarka ti untsurí aentsun tu̱á̱karun wáinkiar suir íiniak ti kajerkarmiayi. Tuma asamtai Páprun katsekkar “Ju̱ chichaana ju̱ka ántar tawai” tiármiayi.

⁴⁶ Támaitiat Pápruka Pirnapíji̱a̱i̱ arantutsuk chichainiak “Israer shuartirmin, atumín emka Yus Chicham ujaktiniuji. Túrasha átum támaitiatrum nakitramarme. Tura atumsha nakitia asarum Yusai̱ tuke iwiaaku pujuschamnia ajasurme. Tuma asamtai iikia yamaikia Israer shuarcha ujaktai tusar weraji.

⁴⁷ Nu túratarum tusa Uunt Yus akuptamtsujik. Iis, ni Papiri̱i̱n ju̱na tawai ‘Israer shuarcha Winia nekarawarat tusan anaitiukjame. Tura ashí nuṉkanmaya̱ aents uwemprarat tusan akupeajme’” tímiayi.Isa. 42:6; 49:6

⁴⁸ Nú chichaman antukar Israer shuarcha ti wararsar “Uunt Yus tana nuka imiá péṉkeraiti” tiármiayi. Tura ashí tuke iwiaaku pujusmin achikma armia nu Krístun enentáimtusar Yus shuar ajasármiayi.

⁴⁹ Tú túmaki̱ Yus Chicham nú nuṉkanam ashí jamarmiayi.

⁵⁰ Túrasha nuwa̱n Yusan péṉker enentáimtuinian tura péṉker wekainian Israer shuarka yajauch enentáimtikrarmiayi. Áishmaṉ peṉkeri̱ armia nunasha yajauch enentáimtikrarmiayi. Túram Páprun Pirnapíncha katsekkar chichaman irunturar najatawarmiayi. Tú turukiar ni nuṉke̱ya̱ ji̱i̱ki̱ awemarmiayi.

⁵¹ Túram Papru Pirnapíji̱a̱i̱ ju̱ aentska yajauchiti tusar wénak nawe̱ya̱n nuṉkan akakekiar ikiukiarmiayi. Túrawar Ikiuniu péprunam wéarmiayi.

⁵² Yusa Wakaní̱sha pimiutkamu ásar Yus shuarka ti warasarmiayi.