Tit. 3 - Yus Papí: Shuarja̱i̱ Yus Yamaram Chicham Najanamu

Yus shuarti túratin

¹ Titiú, ju̱ enentáimtikrarta. Ashí akupin ainia nusha tura chíkich úunt akupena nusha anturkar umirkartin áiniawai. Núnisaṉ péṉkeran túratin ana nuna páchitsuk umiktiniaiti.

² Tsanumtsuk kajernaitsuk antsu shiir enentáimtunaistiniaiti. Naṉkamantu enentáimtumatsuk ashí shuar péṉker awajsatarum tusam tu jintintrarta.

³ Warí, Yuska umirtsuk iisha núnisrik Yus shuar ajatsuk náṉkamsar wekaimji. Tura íwianch emetamu pempée wekaimji. Tura ii aya̱shi̱ wakeramu tuke túriniuyaji. Tunaasha túriniuyaji. Chíkich atankittsar wakeriniuyaji. Chíkich shuar kajerkar tura nuamtaksha kajernainiuyaji.

⁴ Túrasha Yus iin uwemtikkiartin ana nu, aneṉkratin asa ni aneṉkrattairi̱n ashí aentsun iniaktus iin uwemtikrampramiaji.

⁵ Yus iin waitnentrama asa iikia jú̱kesha péṉker túrachma ai̱ṉ uwemtikrampramiaji. ¿Itiurak uwemtikrampramiajⁱ? Ii tunaari̱n asakátrampramiaji nijiaktinia áintsaṉ. Tura Yusa Wakaní̱ pujurtamkurin ii iwiaakmari̱n yamarman amasmaji.

⁶ Jesukrístu jakamuja̱i̱ Yus iin ementúrmatsuk ni Wakaní̱n suramsamiaji.

⁷ Waitnentramu asar péṉker awajsámuitji. Nui̱ṉkia iisha yamaram awajsamu asar tuke iwiaaku átin ti wakerimiaj nu íiniuiti.

⁸ Nuka ti nekasaiti. Tuma asamtai Yusan umirkarmia nu, péṉker túratniun tuke wakerukarat tusam tuke jintinki̱ wetá. Wi tímiajna nu, péṉker asamtai ashí aents nuna nekaatniun atsumainiawai.

⁹ Shuar netse áujmatainiakui ameja pachisaip. Tura “aya winia úuntruk péṉker áiniawai” tu chichasaip. Tura Israer shuara akupkámuri̱ itiurkit tusa shuar ti áujmatainiakui nusha pachisaip. Ántraiti nuka. Péṉker wekasatniun yaya̱tsui.

¹⁰ Shuar tsanumprur yajauch enentáimtunaimtikiana nu chicharkata. Ántachkuiṉkia ataksha chicharkata. Tura peṉké tujintkiamka ji̱i̱ki̱ akupkata.

¹¹ Nuja̱i̱ ju̱na nekaamniaitme, nuna tura asa awajiruiti. Tura ni tunaari̱ni̱ṉ jakattui.

Papru wakeramu

¹² Wisha Artemasan akatran akuptúkchatjameash. Nin akupeachkunka Tíkikiun akuptúktatjame. Ni jeamtai amesha Nekapurisnum wari winitritia. Ju̱i̱ Nekapurisnum yumí nantu asamtai seturan pujuttajai.

¹³ Senas, chichaman ti unuimiáru pujana nu, amikiur Apurusja̱i̱ jeamtai ni atsumtsuk shiir wéarti tusam ame túratin jeamna nu yaiṉtá.

¹⁴ Iiní̱ Yus shuar ainia nusha péṉker túratniun tura atsumainia nunasha yáiṉtinian nekaawarti. Ántar pujusára̱i̱ṉ tusan nuna tajai.

¹⁵ Ashí wiji̱a̱i̱ pujuinia nu amikmátmainiawai. Tura ii amikri̱ Yus shuar ainia nu amikmatruata. Atumniasha Yus shiir yaintmakat tusan wakerajrume. Nuke atí.