Tan. 9 - Yus Papí: Shuarja̱i̱ Yus Yamaram Chicham Najanamu

Taniar ni shuari̱n Yusan seatmia

^1-2 Kame Mítianmaya̱ aents Asueru uchirí̱ Taríu, Kartíu aentsnum úunt akupin ajasmia nú uwitin, wi Taniar, Uunt Yus ni takarniúri̱ Jirimíasan áamtikramia nuna émamkesan iisan Jerusaréṉka sataintia uwí emeskamu pujustatna nuna nekaamjai.

³ Nuyá̱ ijiarmán kúntuts nekapkur entsatái̱ pushin entsaran, yukú ukatmamkan Ashí Aentsu Úuntri̱n Yusan áujtusan ti seamjai.

⁴ Tura Uunt Yusan kame winia Yúsrun tunaarun ujakan seakun jú̱nisan tímiajai “Uunt Yusru Ameketme Úuntam tura ashamkamniam Ámeka aentsja̱i̱ chícham najanamusha uminiaitme. Núnisaṉ ámin umirtamak tura akupkámurmincha uminia nuka waitnenniuitme.

⁵ Antsu iikia tunaasha tura mui̱jmiai̱ áiniana nu túrakur Yusan enentáimtichu ainia nuja̱i̱ métek kajekar ii wakeramu túraitji. Núnisrik ame akupkámu chichamprumsha iniaisaitji.

⁶ Núnisaṉ Yúsnan etserin ii úunt akupniuri̱n, ii úuntri̱ncha, ii aparí̱ncha, ántsaṉ ashí aents ju̱ nuṉkanam pujuinia nuna Ame náarmiji̱a̱i̱ chicharkarua nusha umirkachuitji.

⁷ Maa, Uuntru, naka péṉker túratniuka áminiuiti. Tura ashí Israernumia̱ tura Jutá shuar núnisaṉ Jerusaréṉnum pujuiniana nusha nuyá̱ Ámin nakitramainiakui ji̱i̱ra akuprarma tíjiu̱chisha núnisaṉ yajá pujuiniasha yamái urukainiawa núnisaṉ natsa̱a̱rtinkia íiniuiti.

⁸ Maa, Uuntru, Aminí̱sha tunáa tura asar ii akupniúri̱ji̱a̱i̱, ii úuntri̱ji̱a̱i̱ tura ii aparí̱ji̱a̱i̱ métek natsanmai̱ ajainiaji.

⁹ Kame ii kajekar nakitrámsha waitnentramar tsaṉkurtámpratniuka ii Úunt Yusri̱niuiti.

¹⁰ Tura Uunt Yus, ii Yusri̱ péṉker matsamsarat tusa umiktin chichaman ni takarniúri̱ Yúsnan etserin ainia nuja̱i̱ akupkarmasha umirkacharuitji.

¹¹ Tura ashí Israer shuar Ame chichamin antuktinian nakitiáiniak Ame akupkámu umiktin chichamnasha iniaisar kanakiarai. Tuma asar yumiṉnaruitji. Núnisrik tunáa tura asar umíachkurmeka ju̱ní̱ asutniáttarme táman Yusa takarniúri̱ Muisais aarma nuja̱i̱ métek asutiámuitji.

¹² Warí, yaunchu ii akuptámin uuntri̱ armia nunasha nuyá̱ iincha turammiaj núnaka nekas umiktatjai tíniuiti. Tuma asa ti yajauch awajtámkaji. Kame Jerusaréṉ túrunania timianú yajauchikia yáunchusha ju̱ nuṉkanmaṉka túrunachuiti.

¹³ Kame Muisais akupkámu chicham aarma ana nuja̱i̱ métek ashí ju̱ itiurchat tarutramji. Túmayatrik ii Uunt Yusri̱sha tsaṉkurturta tusar seachji. Warí, ii tunaarí̱sha iniaisachji. Tura Ame nekas chichammesha enentáimturchaji.

¹⁴ Tuma asamtai Uunt Yussha nuna ashí iis yajauchiji̱a̱i̱ wáitsatniun tsaṉkatramkaji. Warí, ii Uunt Yusri̱ṉkia ashí Ni túrana núnaka ímiatrusaṉ uminiaiti. Tuma ai̱ṉ Ni chichame̱sha umirkachji.

¹⁵ Nu asamtai Uuntá, ii Yusri̱yá, Ame kakarmarmiji̱a̱i̱ Ejiptunmaya̱ Amé shuar ji̱i̱ram naṉkamantu páantin awajmámsamame tura yamaisha núnisketme. Túrasha Yusan enentáimtichu aents ainia nuja̱i̱ métek tunáa túraitji.

¹⁶ Uuntru, Ámeka nekasa nuja̱i̱ métek túrin asam yamaikia Ame pépruram Yusna akantúkma naint Jerusaréṉ suir kaje̱ntukma tsaṉkurata. Warí, ii tunaari̱n tura ii aparí̱ yajauch túrutainiam Jerusaréṉsha tura amé aentssha ashí aents ayamach matsatainia nu wishiktai̱ ajasárai.

¹⁷ Pai, yamaikia ii Uunt Yusri̱ya ame takartámin seatmana nu antukta. Yusru, aneṉkratin asam Amek enentáimtumasam ame Shiir Awajtai̱ Je̱e̱m emeskar emeṉkákma nui̱ ataksha ame wincharam paant awajsata.

¹⁸ Winia Yusru, émamkesam antukta. Tura ii nuṉké̱ emeskar jú̱nik awajsarma ainia nusha núnisam ame náaram shiir awajtai̱ péprusha íisarta. Warí, ii péṉker túramu enentáimtusar seatsji antsu Ame naṉkaamas waitnenkartin asakmin seaji.

¹⁹ Uuntá, péṉker antukam tsaṉkurturta. Uuntru, aneṉkratin asam túrata. Warí, winia Yusru ju̱ péprusha tura amé shuarsha ame náarmiji̱a̱i̱ anaikiamu áiniawai” tu seamiayi Taniar.

Sataintia tumiṉtin naṉkaamastatna nu étserma

²⁰ Tura wikia winia Yusur akantúkma náintri̱n pachisan winia tunaaruncha núnisaṉ Israer shuara tunaarí̱ncha Uunt Yusa ujakun chicháa pujai̱ṉ

²¹ Kapriar yámankamtaik áishmaṉka núnis ímiaja̱i̱k wainkiamaj nuka ki̱arai̱ Yus áestutai̱ jeatemámunam nanaak wárik taa winia antintkiamai.

²² Tura taruti chichartak “Taniará yamaikia ame nekaachman paant awajtústajam tusan tarijme.

²³ Ame emka seamum nu sunasti tuname. Warí, ámeka ti aneamu asakmin jintintrattsan tarijme. Ju̱ tamasha antukta núnisaṉ ímiaja̱i̱k wainkiam nusha péṉker esettsam nekaata.

²⁴ Áme shuarumka tura Yus akantúkma péprurmesha sataintia tumiṉ iwiarturmaiti. Nuja̱i̱ ashí tunáa tura yajauch túrutai̱sha amukáttawai. Núnisaṉ ashí tunáa túramuja̱i̱ métek akinkiartatui. Túrunamtai aya nekasa nuja̱i̱ métek túratin átatui. Núnisaṉ ímiaja̱i̱k wainkiamusha tura ukunam túrunatin etserkamusha uminkiattawai. Nuya̱ṉka Ti Shiir Tesamusha asuitiji̱a̱i̱ ukatnáktatui.

²⁵ Tura péṉker antukam paant nekaata. Jerusaréṉsha iwiarkar ataksha je̱a̱mkatin chicham etsernaktatna nuyá̱ Úunt Akupniu Uchirí̱ Misías táamam siati tumiṉ tura sasaintitús tumiṉ naṉkaamastatui. Núnisaṉ ti wáitsatin ámanum Jerusaréṉsha á̱a̱ri̱ntiuk tura wenukri̱ntiuk ataksha iwiarnaktatui.

²⁶ Nuyá̱ sasaintitús tumiṉ naṉkaamasmatai Misíaska junaktiatui. Túram wariṉkísha takuschattawai. Tura akupin tátatna nuna shuari̱ pépruncha nuyá̱ Yus Shiir Awajtai̱ Je̱e̱ncha emeskartatui. Túrasha amukatniuka entsa ama̱a̱ra núnis amukáttawai. Tura meset amuumam ashí amuktinia nu tunattawai.

²⁷ Nuya̱ṉka umiktatjai tusa chikichik tumiṉkiuk untsurí aentsja̱i̱ chichaman najankattawai. Túrasha tumiṉkia jeatsa̱i̱ṉ ajapéni̱ṉ Yus súsatniuncha nuyá̱ taṉku maar áestuatniuncha surimkiattawai. Túrasha nu akupniu amukatniuri̱ chícham najatamu umintsa̱i̱ṉ émesmaaka ti yajauchin mui̱jmiainian tuke túrattawai” tímiayi Kapriar. Mat. 24:15