Tan. 8 - Yus Papí: Shuarja̱i̱ Yus Yamaram Chicham Najanamu

Murik tura chipiu ímiaja̱i̱k wainma

¹ Pirsasár úunt akupin ajasmaka menaintiú uwí ámanum wi Taniar emka ímiaja̱i̱k wáinmiaj nuna ukunam chikichan wainkiamjai.

² Ju̱na ímiaja̱i̱k wáinmiaj nuiṉkia wikia pepru uuntri̱ Súsanam pujumjai. Nuka nuṉka tesarma Iramnumaiti. Urái entsá yantamén wajasan ju̱na ímiaja̱i̱k wáinmiajai.

³ Tura paṉkái̱ íimiaj tukamán chipiu áishmaṉ entsá eem wajamai. Tura kachurí̱sha émkaka mai̱ esarmaitiat chikichik kachu chikichja̱i̱ naṉkaamas ti esaram kachurauyi túrasha ukunmaṉka tsakartinian juárkimiai.

⁴ Chipiu áishmaṉkauya nu etsa̱ tatainmaani̱ nuyá̱ arakaani̱ tura nuṉkaani̱sha kachuríji̱a̱i̱ awatun wáinmiajai. Tura yajasmaksha niṉkia nákartinkia atsumai tura ni kakarmari̱ya̱ṉka yáakesh ú̱mkatniuka atsumai. Ni wakeramuja̱i̱ métek túrimiai tura nú naṉkaamas uunt ajakí̱ wemai.

⁵ Wi ju̱na enentáimtusan ii wajái̱ chikichík chipiu áishmaṉ etsa̱ akatainmaani̱ yantam ashí nuṉka náṉkatrana ímiania nuṉká ántitsuk winimiai. Tura nu chipiu áishmaṉ chikichík kachuri̱n ii ajamai ni ji̱ya̱ ajapén jiinkí̱ nekas wainkiamjai.

⁶ Tura murik áishmaṉ jímiar kachura entsá ayamach wajan wainkiamaj nu ti kajek kakarmaja̱i̱ tsékeṉtki̱ ijiukmai.

⁷ Chipiu áishmaṉ murik áishmaṉkan jearí winian wainkiamjai. Nuyá̱ kajerak jimiará kachuri̱n awati kupirak akarkámai. Kame murik áishmaṉ kakarmachu ajas chípiun wajattratniun tujintkiamai. Tuma asamtai chípiun nuṉká aju̱a̱nt najarmai. Nuiṉkia yáakesh atsumai chipiu kakarmari̱ya̱ aṉkant awajsatniuka.

⁸ Nuya̱ṉka chipiu áishmaṉ ashí naṉkamantu wemai tura ti kakarman achíaku ajas kachu uunt ama nu kupirnakmai tura nú kachuri̱ kupiniakmaanumia̱ chíkich kuatru kachu ti uunt ii ajamai arakaani̱ya̱ṉ, nuṉkaani̱ya̱ṉ, etsa̱ jintiainmaani̱ya̱ṉ tura akatainmaani̱ya̱ṉ nayaimpinmaya̱ nase tatái kuatru ainia nuja̱i̱ métek tsakarármai.

⁹ Tura nuyá̱ chikichik kachu uchich jiinmiai nuṉkaani̱sha tura etsa̱ tatainmaani̱sha tura péṉker nuṉka ama nunisha núkap tsakarmai.

¹⁰ Nayaimpinmaya̱ suntar írunna ímianai uunt ajasmai tura suntarí̱sha nuyá̱ yaasha irunainia nuya̱ntka ishichik nuṉká aju̱a̱rmai.

¹¹ Nayaimpinmaya̱ suntara úuntri̱ji̱a̱i̱ métek ajastinian awajmámsamai tura taṉku maar tuke áestuinian suritkiamai. Núnisaṉ nu Shiir Awajtai̱ Je̱a̱n emesramai.

¹² Ti waitruá asamtai suntarnasha tura tuke áestuatniua nuna sunasmauyi. Nisha nékaskea nuna nuṉká ajapa iniaisámai. Túrasha ni wakerimia nuna túraitiat tí peṉker pujusmai.

¹³ Nuya̱ṉka tunaarincha chichaan antukmajai tura chíkich tunaarincha nuna chicharuk “¿Urutáik ímiaja̱i̱k wainma ju̱sha amuukat tura taṉkun áestuatniunka tuke túruki wéartata tura yajauch awajkartincha katsua̱rtata nuyá̱ Yusa Je̱e̱sha tura suntarsha amuturmak ártata?”

¹⁴ Tutai áimiuk “Jimiará mir traisiantu kí̱arai̱sha tura káshiksha ártatui. Nuyá̱ Yusa Je̱e̱nka ataksha imiatkincha awajnástatui” tímiayi.

¹⁵ Wi Taniar ímiaja̱i̱k wainkian ii wajái̱ túrunama nuna nekaataj tusan enentáimia wajái̱ aentsua nuní̱ iira wi wajamunam iniaṉka wajasmai.

¹⁶ Nuyá̱ Urái entsa yantamén aentsu chichame̱ya núninian antukmajai. Nuyá̱ untsumuk chichaak “Kapriará ímiaja̱i̱k wainkiamu jintintrata” timiai.

¹⁷ Nuiṉkia wi pujamunam tíjiu̱ch tarutmiai. Tura winiakui wainkian ashamkamjai túran tsuntsumamjai. Tura ni chichartak “Aentsu uchiri̱yá nekaata, ímiaja̱i̱k wainkiamna nuka amúamu tsawantai̱ túrunata nuiti” turutmiai.

¹⁸ Wi niji̱a̱i̱ chicháa wajasan wa̱a̱t ajakin nuṉká tekem inianmajai. Tura ni antintiak awajtúkmiai.

¹⁹ Tura chichartak “Wi kajektin tsawant amúamunam átatna núnaka Wi ujaktatjame. Tura nuka amúamu tsawantai̱ túrunatniuiti.

²⁰ Chipiu jimiará kachurtin wainkiamamna nuka Mítianmaya̱ tura Pírsianmaya̱ úunt akupin ainia nuiti.

²¹ Chipiu áishmaṉkauya̱ nuka Krésianmaya̱ úunt akupniuyi. Tura kachuri̱ jinium úuntan achíakuya nuka emka akupniu nuuyi.

²² Nuyá̱ kachuri̱ kupiniakuya̱ nuka nu nuṉkanam kuatru kachu wantinkiama nuka nú nuṉka mátsatkauya̱ nuna kuatru akupeamunam wajarartatna nuna nakumui. Túrasha núnaka ni kakarmari̱ji̱a̱i̱nchu túrawartatui.

²³ Ju̱na akupeamuri̱ náṉkatkamuri̱nkia yajauchin túrin ainia nu piákmatai nuiṉkia chikichík úunt akupniuk kajen nékashtai̱n nekáa wajaktiatui.

²⁴ Ni kakarmari̱ṉkia tí kakaram ajastatui túrasha ní kakarmari̱ji̱a̱i̱ṉ túrunashtatui. Tí uuntan emeskartatui túrasha ashí péṉkerak jíinkiartatui. Tura aya ni wakeramun túrak kakaram ainia nuna tura Yus achikma ainia nunasha emeskartatui.

²⁵ Ti neka asa núkap anaṉmammaja̱i̱ takastinian nekaattawai. Ni enentái̱mtumaska ti waantu enentáimtumattawai tura aya aneachma untsurín emeskartatui. Nisha akupniu peṉkeri̱ Úuntri̱n kajerak wajatrattawai túrasha niṉki emesnaktatui. Tura nuka aentsu uwejé̱ja̱i̱sh túrunashtatui.

²⁶ Káshiksha tura kí̱arai̱sha ímiaja̱i̱k wainkiamna nuka imiá nekasaiti. Tura ame ímiaja̱i̱k wainkiamna nuka ikiusam wáinkiata. Kame ti ukunam uwir uwir túrunattana nú tsawantaiti nuka” tímiayi Kapriar.

²⁷ Wi Taniar kakarmachu wena wárumchik tsawant jaa pujumjai. Tura ayap ajasmaj nuiṉkia úunt akupniu takatrí̱n takarsamjai. Ímiaja̱i̱k wainkiamaj nuna ashamkamjai túran nekatnasha nekaachmajai.