Tan. 6 - Yus Papí: Shuarja̱i̱ Yus Yamaram Chicham Najanamu

Taniar úunt ya̱wa̱ matsamtai̱niam aju̱a̱mu

¹ Kame úunt akupin Taríuka enentáimiuk wi akupeamunmaṉka siantu painti sátrapan anaikiartatjai tusa shiir enentáimsamiayi.

² Tura sátrapa anairamu armia nuna túramuri̱n nekaawartinian nuna úuntri̱n menaintiun anaikiarmiayi. Núnaka úunt akupin itiurchat awajnaka̱i̱ tusa túramiayi. Nu menaintiunam Taniarsha páchitkiauyayi.

³ Kame ti shiir wakaní̱ takaku asa ashí uuntri̱ tura sátrapa armia nui̱sha aya Taniarak nekaska páantniuyayi. Tuma asamtai Taniarnaka ashí ni akupeamuri̱n uuntri̱ awajsataj tusa úunt akupniuka wakerimiayi.

⁴ Tuma asamtai uuntri̱ armia nu tura sátrapa armia nusha itiurak Taniar ni akupeamuri̱ya̱ itiurchat awajsaintiaj tu enentáimsarmiayi. Túrasha nekas péṉker wekaak umin asamtai yajauch túramuncha núnisaṉ itiurchatri̱ncha peṉké wáitkiacharmiayi.

⁵ Nuya̱ṉka nu áishmaṉ chichainiak “Ni Yusri̱ akupeamuri̱n awajirma wáitchakrikia Taniara awajirmari̱sha peṉké wáitkiashtatji” tiármiayi.

⁶ Nuyá̱ uuntri̱ armia nusha tura sátrapa armia nusha iruntrar chichama júsar akupin pujamunam wéar chicharainiak “Uunt akupin Taríuwá tuke iwiaaku atá.

⁷ Tuma asamtai ashí uuntri̱ ainia nu tura nuna uuntri̱ núnisaṉ sátrapasha iruntrarai. Tura áujmatsar traintia tsawantin aya amiiniak seatmatsuk chíkich yúsnaksha núja̱i̱nchuka aentsnaksha seakka, úunt akupniu, úunt ya̱wa̱ matsamtai̱ wá̱a̱nam aju̱a̱mu atí tusa akupin chichaman najanati.

⁸ Tuma asamtai úunt akupniu, yamaikia umiktin chicham najanam yapajniáshti tusam kuesmakta. Kame Mítianam tura Pírsianmasha akupkámu yapajchatai̱ asamtai nui̱ túrutai̱ya nuja̱i̱ métek túrata” tiármiayi.

⁹ Nuiṉkia úunt akupin Taríu umiktin chicham najanamun ni naari̱ aar kuesmakmiayi.

¹⁰ Kame Taniarsha umiktin chicham najanar papí kuesmakman nekaamiayi. Tura ni je̱e̱n wayá̱ ni kanutairi̱n Jerusaréṉnumaani̱ áaṉkamun urái tikishmar ni Uunt Yusri̱n shiir enentáimtus yúmiṉkiak tuke túriniuya núnisaṉ chikichkí tsawantai̱ menaintiú seá wémiayi.

¹¹ Nuya̱ṉka nu áishmaṉsha iruntrar Taniarsha ni Yusri̱n yaintkiat tusa seak pujan wáinkiarmiayi.

¹² Tura úunt akupniun weriar chicharainiak “Chícham nájankum traintia tsawantin aya áminiak seatmatsuk chíkich yúsnaksha núja̱i̱nchuka aentsnaksha seakka, úunt akupniu, úunt ya̱wa̱ matsamtai̱ wá̱a̱nam aju̱a̱mu atí tusam papí ¿kuesmakchamkum?” tuíniakui akupin aya̱k “Nuka nekasaiti. Kame Mítianam tura Pírsianmasha akupkámu yapajchatai̱ asamtai nui̱ túrutai̱ya nuja̱i̱ métek túramuiti” tímiayi.

¹³ Nuya̱ṉka nisha akupniun chicharainiak “Úunt akupniu, Jutanmaya̱ achirar ikiankamuya̱ nuyá̱ Taniarka peṉké anturtamkachai. Tura umiktin chicham najanam ame náarmiji̱a̱i̱ kuésmarmancha umitsuk antsu chikichik tsawantai̱ ni Yusri̱n menaintiú seawai” tiármiayi.

¹⁴ Kame úunt akupniusha nu chichaman antuk tí kuntuts enentáimiar Taniaran tuinia nuyá̱ itiurak uwemtikraintiaj tusa etsa̱ akaamam ti enentáimias pujusmiayi.

¹⁵ Nuyá̱ ataksha nú aentsuk irunturar akupniun chicharainiak “Úunt akupniu, amek nékame Mítianam tura Pírsianam umiktin chicham najanamun akupin ni náari̱ji̱a̱i̱ kuesmarma nuka peṉké yapaji̱áchminiaiti” tiármiayi.

¹⁶ Nuiṉkia úunt akupin chichaak “Taniar itiatárum” tutai itiarmatai akupin Taniaran chicharuk “Ame Yúsrum tuke tsawant iniaitsuk enentáimtamna nu uwemtikramprati” tímiayi. Takui̱ úunt ya̱wa̱ matsamtai̱ wá̱a̱nam aju̱a̱warmiayi.

¹⁷ Túrawar kayan itiariar wa̱a̱n apujtuawar uranchati tura Taniar chícham najatamusha yapajniáshti tusar úunt akupniusha tura peṉkeri̱sha kaya apujtuamunam ni aniyuri̱ji̱a̱i̱ apujtua asaka iniaisarmiayi.

¹⁸ Nuna tura úunt akupniusha akupin pujutai̱ je̱a̱nam waketki̱ káshisha yurumtsuk pujumiayi. Núnisaṉ warastinniasha nakitiar kanartinniasha tujintkiamiayi.

¹⁹ Nuya̱ṉka úunt akupniusha kashin káshik etsa̱ wákuk kapant ajasmanum úunt ya̱wa̱ matsamtai̱ wá̱a̱nam wárichik wémiayi.

²⁰ Tura wá̱a̱nam jeá kúntuts enentáiji̱a̱i̱ úunt akupin Taniaran kakantar untsúak “Iwiaaku Yusa takarin Taniará, tuke tsawant iniaitsuk enentáimtamna nú Yus úunt ya̱wa̱nmaya̱ ¿uwemtikramprayik?” tímiayi.

²¹ Tutai Taniar akupniúja̱i̱ chichaak “Maa úunt akupniu, tuke iwiaaku atá.

²² Winia Yusur ni suntari̱n akuptúrkai tura yajauch awajtúsara̱i̱ṉ tusa úunt ya̱wa̱ wene̱ncha epetkarai. Warí, Ni iismasha péṉkeraitjiai núnisaṉ uuntá, ámiji̱a̱i̱sha yajauchinkia peṉké túrachuitjiai” tímiayi.

²³ Nuja̱i̱ úunt akupin ti waras yamaikia Taniar wá̱a̱nmaya̱ ji̱i̱ktiarum tusa akupkámiayi. Tura ni Yusri̱n nekas enentáimtusu asa ji̱i̱ki̱ iismasha wariṉkish itiurkachmauyayi.

²⁴ Nuya̱ṉka Taniaran chichaman najatawarua nú aents ikiankatarum tusa úunt akupin akuprámiayi. Tura nú aentsun ikiankar nua̱rtiuk uchirtiuk úunt ya̱wa̱ matsamtai̱ wá̱a̱nam aju̱a̱warmayi. Tura nuṉkaṉka iniainiachunak úunt ya̱wa̱ esái achia̱rar ukunchí̱ncha tsai̱ tsai̱ awajtúsarmiayi.

Taniara Yusri̱n Taríu shiir awajma

²⁵ Nui̱ṉkia úunt akupin Taríu ashí aentsun tura mátsatkamu uunt nuṉka ainia nuya̱ncha núnisaṉ chíkich chíkich chichamtin ainia nuna papin áatainiak “Atumsha tuke aṉkant matsamsatarum.

²⁶ Ashí nuṉka wi akupeamunmaṉka Taniara Yusri̱ ashamakrum Ni enentáimtustarum tusan umiktin chichaman nájanjai. Warí, Nisha tuke iwiaaku pujú Yusaiti. Tura peṉké náṉkatkachuiti. Núnisaṉ Ni akupeamuri̱sha emesnarchattawai tura amuukatin tsawanta tímianaisha tuke átatui.

²⁷ Warí, Niṉkia uwemtikiar aṉkant awajkartiniaiti. Nayaimpinmasha tura nuṉkasha aentsti túrachminia nuna iniakmawiti. Tuma asa Niṉki Taniarnasha úunt ya̱wa̱numia̱ uwemtikraiti” tu áatrarmai.

²⁸ Kame Taríu akupkámia nui̱sha núnisaṉ Pírsianmaya̱ Siru akupeamunmasha Taniarka páantin awajnas péṉker takatnum apujnasmiayi.