Tan. 5 - Yus Papí: Shuarja̱i̱ Yus Yamaram Chicham Najanamu

Tanishnium áantramu

¹ Kame úunt akupin Pirsasár ni yaintri̱ mir armia nuna ipiaawar uunt namperan nájanuk wíniun umimiayi.

² Nui̱ úunt akupin Pirsasár wíniun nampek Yusa Uunt Je̱e̱ya̱n piniṉ kuriji̱a̱i̱ tura kuitji̱a̱i̱ najankamun ni aparí̱ Napukutunusúr Jerusaréṉnumia̱n ikiankauya nuna akupniúsha peṉkeri̱sha tura nuwe̱sha núnisaṉ nua̱ri̱ya ánis armia nusha winiu nuja̱i̱ umararmi utitiarum tusa akupkarmiayi.

³ Nuya̱ṉka Jerusaréṉnumia̱ Yusa Je̱e̱n Shiir Tesamunmaya̱ kurí piniṉ jukí̱ ikiusárman ikiankarmiayi. Tura úunt akupniusha peṉkeri̱sha tura nuwe̱sha núnisaṉ nua̱ri̱ya ánis armia nusha nuja̱i̱ wíniun umararmiayi.

⁴ Nui̱ wíniun úmuiniak ashí ni yusri̱ kuriji̱a̱i̱ kuitji̱a̱i̱ yaṉkú jiruja̱i̱ tura namincha jiruja̱i̱ ántsaṉ numiji̱a̱i̱ nuyá̱ kayaja̱i̱sha najankamu armia nuna shiir awajsarmiayi.

⁵ Nuna turú pujuiniai̱ aentsu uwejé̱ nuya̱i̱k wantiniak úunt akupniu je̱e̱ tanishri̱n shirikip keamunam naka áakmamiayi. Tura úunt akupniusha uwej áakmanka wáinmiayi.

⁶ Nuya̱ṉka úunt akupniusha nuna wainiak ashamak tí kuntuts enentáimiar puju we takamtsuk kurak máminkiuri̱sha kuenaar tikishi̱ṉkia ínkiumtik ínkiumtik awajmiayi.

⁷ Tímiatmak úunt akupin kakantar untsumuk “Uwishniusha tura nekamin Kartíusha nuyá̱ ashí nekamin ainia nusha wárik untsukrum ikiatruktarum” tímiayi. Tura ashí nekamin Papirúnianmaya̱ káunkarmatai chicharainiak “Yaaksha ju̱ aarma áujas nekáa ujatkata. Núnaka akupin entsatái̱ pushí áentsran tura nuṉkutai̱ kúriji̱a̱i̱n najanamun unuṉkran akupeamunam úunt akupin pátatka nuyá̱ patatka úuntaiti tusa akupin awajsattajai” tímiayi.

⁸ Tura úunt akupniu takarniúri̱ neka armia nu je̱a̱ waya̱war nu áarman áujsatniuncha nuyá̱ neka paant awajsatniuncha peṉké tujintkiarmiayi.

⁹ Nuna nekaacharmatai úunt akupin Pirsasársha ti sapijmiak jakamnia nekapeak nú arant puju ajasmiayi. Núnisaṉ uuntri̱ pujuarmia nusha itiurkatjik tusar aya énentaimsarmiayi.

¹⁰ Nuyá̱ úunt akupniusha tura uuntri̱ armia nu tu chichainian akupniu nukurí̱ antuk yurumáiniamunam wayá̱ chichaak “Maaj úunt akupniu, tuke iwiaaku atá. Núnismek ti yajauchisha enentáimsaip tura puju ajasumna nusha áinkiaip.

¹¹ Warí, ame akupeamurmin ashí tunaarincha yusa wakaní̱ pimiutkamu áishmaṉ awai. Ame apa akupniuya̱ nui̱sha Yusa nekatairi̱ya̱ núnis nekatai̱ wainniakmai. Tuma asamtai ame apa Napukutunusúr ashí neka ainia nusha uwishniuncha tura nekamin Kartíu núnisaṉ ashí nekamin áiniana nuna uuntri̱ awajsámiayi.

¹² Warí, Taniarka péṉker enentáimin asa nekaatniuncha enentáimsatniuncha tura mesekrampramuncha nekáa nuyá̱ nekaachminia nunasha paant awajin núnisaṉ itiurchatnasha nékauyayi. Nuna akupniuka Pirtisasár anaikiamiayi. Tuma asamtai Taniar untsunkati. Túramka warinia taa nuna ujatmáktatui” tímiayi.

¹³ Nuya̱ṉka Taniaran úunt akupin pujamunam júkiarmiayi. Tura úunt akupin Taniaran chicharuk “Winia apar úunt akupin asa Jutanmaya̱n achirar ikiankamia ¿nú Taniarchakaitiam?

¹⁴ Kame aminí̱ ashí yusa wakaní̱ pimiutkamu asa yusa nekatairi̱ya̱ núnis nekatai̱n takakui táman anturkajme.

¹⁵ Tura wi pujamunam nekaancha tura nekamniuncha ju̱ áarman áujas nekáa ujatkarat tusan ikiankamsha áujsatniuncha tura nekaatniuncha tujintkiarai.

¹⁶ Kame mesekrampramun nekáa warí tawa nuna ujakratniuiti tura itiurchata nunasha nékawiti táman anturkajme. Tuma asamtai yamaikia jú̱ aarma áujsam waritia áarmait nu ujatkákminkia tí peṉker pushí yamakáimpramun áentsran nuyá̱ nuṉkutai̱ kúriji̱a̱i̱ṉ najanamun unuṉkrattajme. Nuya̱ṉka akupin pátatka nuyá̱ patatka winia akupeamurui̱ pujustatme.”

¹⁷ Nuyá̱ Taniar úunt akupniun chicharuk “Ame támena nuka áminiuk atí tura surustaj támena nusha chíkich súsarta. Túrasha úunt akupniu, áarmanka áujtusan warí tawa núnaka paant ujaktatjame.

¹⁸ Arantutai úunt akupniu, Ashí Naṉkamantu Yus ame apan Napukutunusúran páantin awajás úunt akupin átinian susamiayi.

¹⁹ Tura naṉkamantu awajsamu asamtai ashí aents tura mátsatkamu uunt nuṉka ainia nuya̱sha núnisaṉ chíkich chíkich chichamtin ainia nusha ashamainiak kurainiarmiayi. Kame wakerakka máimiayi tura wakerakka iwiaaku atí tusa tsaṉkatmiayi. Núnisaṉ wakerakka naṉkamantu awajeak chikichnaka péejchach awajmiayi.

²⁰ Túrasha naṉkamantu enentáimtumak ni wakaní̱sha nuna yajauch ajasmiayi. Túrunamtai akupin ajasár pujutái̱nmaya̱ṉka ji̱i̱ki̱ páantniuchu awajsámiayi.

²¹ Nuyá̱ aentsnumia̱ṉka jí̱i̱kiarmiayi. Tura enentáimtairi̱sha yajasma núnis ajas kampunniunmaya̱ yajasmaja̱i̱ irunar pujumiayi. Tura waaká núnis sa̱a̱kin ayuriarmiayi nuyá̱ sanasha iniji̱á̱i̱miayi. Kame Ashí Naṉkamantu Yuska akupin ainia nuna Úuntri̱nti tura ¿yana wakera? nuna apujniuiti tu enentáimmiam túmasan pujusmiayi.

²² Tura Pirsasárá, amesha nuna uchirí̱ntiatmek tura nusha ashí nékayatmek péejchach enentáimtumaschame.

²³ Antsu nayaimpiniam Uunt Yus pujana nu ti yajauch enentáimturume. Túram Ni je̱e̱ya̱ piniṉ ikiankam amesha tura peṉkeri̱sha núnisaṉ nua̱rmiji̱a̱i̱ nuyá̱ ashí nua̱rmea núnis ainia nuja̱i̱ winiu umarurme. Nu arant ántar yus kuriji̱a̱i̱, kuitji̱a̱i̱, yaṉkú jiruja̱i̱ tura namincha jiruja̱i̱ ántsaṉ numiji̱a̱i̱ nuyá̱ kayaja̱i̱ najankamu wáinmachu, ántichu tura nékachu ainia nu shiir awajsarme. Túrasha ame iwiaakmarmin nuyá̱ ame wekaamna nuna nérenniuri̱ya̱ nu Yuska peṉké enentáimturchame.

²⁴ Tuma asamtai Niya̱ áarat tusa uwejka akupnákai.

²⁵ Nu áarmasha jú̱nis tawai ‘MENE, MENE, TEKER, UPARSIN.’

²⁶ Kame nekaatin wakeram nuka ju̱i̱ti ‘MENE’ tana nuka Yus akupeamurmin nekapmaruiti tura ame tsawantrum tesamu amukái tawai.

²⁷ Núnisaṉ ‘TEKER’ tana nusha kijin nekapmatai̱nmasha nekapmamuitme túrasha táasuitme.

²⁸ Nuyá̱ ‘PARSIN’ tana nuka ame akupeamurmesha nakakar Mitia Pirsia nuṉka sunastatui tawai” tímiayi.

²⁹ Nuya̱ṉka úunt akupin Pirsasár chichaku asamtai Taniaran tí peṉker pushí yamakáimpramun áentsrar nuṉkutai̱ kúriji̱a̱i̱ṉ najanamuncha unuṉkrarmiayi. Nuya̱ṉka akupeamunam úunt akupin pátatka nuyá̱ patatka úuntaiti tusa etserarmiayi.

³⁰ Kame nu kashi Kartíu aentsu akupniúri̱ Pirsasárnaka máwarmiayi.

³¹ Túrawarmatai Mítianmaya̱ Taríu sasaintitús uwí takaku úunt akupin ajasmiayi.