Tan. 3 - Yus Papí: Shuarja̱i̱ Yus Yamaram Chicham Najanamu

Yus kuriji̱a̱i̱ najanamu tikishmátratin akupkámu

¹ Tura úunt akupin Napukutunusúr ántar yusan aya kúriji̱a̱i̱ṉ náyari̱ṉkia traintia mitru jeá nuyá̱ waṉkantí̱ṉkia menaintiú mitru jeá najanamiayi. Nuna tura Papirúnia nuṉkanam Tuura pakanam awajaimiayi.

² Nuya̱ṉka úunt akupin Napukutunusúr sátrapasha suntara úuntri̱sha nuṉká úuntri̱sha tura chicharniuri̱sha nuyá̱ kuitia wáinin armia nusha sumamtikniusha tura akupniu yáintri̱sha nuyá̱ nuṉka tesarmánum akupin ainia nusha iruntrar wi yusan najanan awajaij ju̱na enentáimtuiniak tikishmátrar shiir awajaiwiarti tusa úunt akupin Napukutunusúr akupkámiayi.

³ Kame sátrapasha suntara úuntri̱sha nuṉká úuntri̱sha tura chicharniuri̱sha nuyá̱ kuitia wáinin armia nusha sumamtikniusha tura akupniu yáintri̱sha núnisaṉ nuṉka tesarmánum akupin ainia nusha úunt akupin Napukutunusúr kuriji̱a̱i̱ najana awajaimia nú yusan enentáimtuiniak tikishmátrar shiir awajsatai tusar irunturarmiayi. Tura nui̱ irunturar wajainiakui

⁴ chichama iniaṉkain kakantar chichaak “Pai, yamaikia ashí aentstiram núnisaṉ mátsatkamu uunt nuṉkanmaya̱tirmesha tura chíkich chíkich chichamtin árumna nútirmesha

⁵ kachun tura ashí umputai̱ ainia nuna umpuiniakui núnisaṉ ashí tuntuitiai̱ ainia nuna túntuiniakui antukrum úunt akupin Napukutunusúr kuriji̱a̱i̱ najanamu tikishmátrarum tsuntsumpruárum shiir awajsatarum.

⁶ Tura nuna tikishmátainiachuka nu chichamaik ji keamunam apenáwartatui” tímiayi.

⁷ Tura ashí nuṉkanmaya̱ aents iruntrarmia nuka kachun tura ashí umputai̱ ainia nuna umpuiniakui núnisaṉ ashí tuntuitiai̱ ainia nuna túntuiniakui úunt akupin Napukutunusúr kuriji̱a̱i̱ najana awajaimia nuna tikishmátar tsuntsumpruá ti shiir awajsarmiayi.

Shatraak, Mishaak, Awitníkiu akupniun umirkacharma

⁸ Tuma asamtai nu tsawantin Kartíu aents káunkar Israer shuaran tsanumprurar peṉké yajauch chicharkarmiayi.

⁹ Tura úunt akupin Napukutunusúran chicharainiak “Akupniu, tuke iwiaaku atá.

¹⁰ Uunt akupniu, ashí umputai̱n umpuiniakui tura tuntuitiai̱ncha túntuiniakui ame kuriji̱a̱i̱ najanamun ashí aents tikishmátrar shiir enentáimtusarti tusam akupkámamna núnaka umikcharai.

¹¹ Tura nuna tikishmátar shiir enentáimtachuka ji keamunam apenáwartatui ¿chichamkam?

¹² Úunt akupniu, Israernumia̱ shuar Papirúnia nuṉkanmaya̱ uuntri̱ ainia nu wáinkiarta tusam Shatraaksha, Mishaaksha, Awitníkiusha apujsarmamna nuka ame yúsrumnia̱sha tura aya kúriji̱a̱i̱n najanam awajaimiamna nunasha shiir awajénatsui” tiármiayi.

¹³ Tuíniakui úunt akupin Napukutunusúr ti kajek chichaak “Shatraaksha, Mishaaksha, Awitníkiusha wárik itiatárum” tutai nuya̱i̱k nu natsa armia nuna akupniúnam itiarmiayi.

¹⁴ Nuyá̱ Napukutunusúr Shatraakan, Mishaakan, Awitníkiuncha anintruiniak “¿Nekasaṉ winia yusur tura kuriji̱a̱i̱ najanan awajaimiaj nu shiir awajtsuram?

¹⁵ Antsu yamaikia kachun tura ashí umputai̱ ainia nuna umpuiniakui núnisaṉ ashí tuntuitiai̱ ainia nuna túntuiniakui antukrum kuriji̱a̱i̱ najanaj nu ¿nekas tikishmátrattarmek? Nu túrachkurmeka nu chichamtaik uunt ji keamunam apenáttarme. Nuya̱sha ¿warí yusak atumniasha winia kakarmarui̱ya̱sha uwemtikrampratarum?” tímiayi.

¹⁶ Nuyá̱ Shatraaksha, Mishaaksha, Awitníkiusha úunt akupniun chicharainiak “Napukutunusúrá, iisha támena nu ái̱ktinkia atsumatsji.

¹⁷ Túmaitkiuisha ii umiriajnia nú Yus ji keamunmaya̱ṉka uwemtikrampramniaitji. Tura úunt akupniu, aminí̱ya̱ṉka nekas uwemtikramprattaji.

¹⁸ Túrasha úunt akupniu, ju̱sha nekaata. Uwemtikramprashtatkurnisha ame yúsrumka peṉké umirkashtatji tura ame najana awajaimiusha shiir enentáimtuschartatji” tiármiayi.

Menaintiú natsa jinium pujuiniamu

¹⁹ Nuiṉkia úunt akupin Napukutunusúr Shatraakan, Mishaakan, Awitníkiuncha ti kajerkar ni suntari̱n akupénak “Ji tuke ikiapátaiji̱a̱i̱sha iniaṉkakrum ikiapárum siati awena utsuetarum” tímiayi.

²⁰ Nuna túrawarmatai suntar ti kakaram armia nuna chicharainiak “Shatraak, Mishaak, Awitníkiu achikrum jiṉkiarum jinium aju̱a̱tarum” tusa akupkarmiayi.

²¹ Nuya̱ṉka nu natsach armia núnaka pushirtiuk, sapatri̱ntiuk ni warirí̱n takaku armia núurtiuk jiṉkiarar ji keamunam aju̱a̱warmiayi.

²² Tura úunt akupin takui̱ jikia ti ikiapárma asa Shatraakan, Mishaakan tura Awitníkiun apeáwarmia núnaka áesawarmiayi.

²³ Kame menaintiú áishmaṉ Shatraak, Mishaak, Awitníkiusha jiṉkiararma ji keamunam apenáwarmiayi.

Jinium kuatru aents wajainia wainma

²⁴ Nuiṉkia úunt akupin Napukutunusúr ti sapijmiak wajaki̱ yaintri̱ úuntri̱ncha tura ni suntari̱ncha chicharainiak “¿Menaintiú áishmaṉchak ji keamunam aju̱a̱maj?” takui̱ nisha áiniak “¡Ausha úunt akupniu nekaschak tame!” tiármiayi.

²⁵ Nuyá̱ ni chichaak “Wisha yamái kuatru áishmaṉkan ji keamunam ajapén jiṉkiarcharma tura ishichkisha esatsuk wekainian wainjiai. Tura kuatrua nú aishmaṉnumia̱ chikichik yusa uchirí̱ áiniana nuní̱ íiran wainjiai” tímiayi.

²⁶ Nuiṉkia úunt akupin Napukutunusúr ji keamu wáitiri̱n weantuk untsuiniak “Shatraaká, Mishaaká, Awitníkiu Ashí Naṉkamantu Yusa takarniúri̱tiram jiinkí̱ winitiárum” tutai Shatraak, Mishaak, Awitníkiusha jiniumia̱ jíinkiarmiayi.

²⁷ Túrunawarmatai sátrapasha suntara úuntri̱sha nuṉká úuntri̱sha nuyá̱ ashí akupin armia nusha itiura imiau ji keamunmasha ishichkisha tura intiashí̱ṉsha weṉkaantrachara íisarmi tusar irunturarmiayi. Túrasha ni entsarmari̱sha tímiatrusaṉ tura ishichkisha jí jiksha meje̱ncharmiayi.

Napukutunusúr Yusan shiir awajma

²⁸ Nui̱kia Napukutunusúr kaka̱a̱r chichaak “Shatraak, Mishaak, Awitníkiu Yusri̱ nekas naṉkamantu shiir awajsamu atí. Warí, Nin takarin ásar enentáimtuiniam suntari̱n akuptuk uwemtikrarai. Tura akupin umiktin chicham najanamuncha umirkatniun núnisaṉ ántar yusan tikishmátratniuncha ti nakitrar antsu nekas ní Yusri̱niak umirkatniun ti wakeruiniak jinium apenátniuncha tsaṉkamakarai.

²⁹ Tura yamaikia ju̱ chichaman nájanjai ‘Ashí aents núnisaṉ mátsatkamu uunt nuṉkanmaya̱ tura chíkich chíkich chichamtin áiniana nusha Shatraaka, Mishaaka tura Awitníkiu Yusri̱n yajauch chicharainiaka asantrartatui nuyá̱ ni je̱e̱sha emestukarma ártatui.’ Warí, chíkich yus Niji̱a̱i̱ métek uwemtikkiartinkia peṉké atsawai” tímiayi.

³⁰ Nuna ti, úunt akupin menaintiú natsa armia nuna Shatraakan, Mishaakan tura Awitníkiun Papirúnianam péṉker takatan súsarmiayi.