Tan. 12 - Yus Papí: Shuarja̱i̱ Yus Yamaram Chicham Najanamu

Amukatin tsawant

¹ Nu tsawant jeamtai amé shuara wáinin Mikiair nayaimpinmaya̱ suntara uuntri̱ naṉkamantua nú tátatui. Nu tsawantai̱ṉkia yaunchu pujuarmia tímianaisha tura yamaiya̱ ju̱i̱sha tuma peṉké wáinchatai naṉkaamas wáitsatin átatui. Túrasha amé shuarka papinium ni naari̱ áatramu ainia nuka ashí uwemprartatui.

² Ántsaṉ ti untsurí jákarusha iwiarsamunmaya̱ nantakiartatui. Chíkichkia tuke iwiaaku pujustinian tura chíkichkia natsanmai̱ ajakar tuke wáitsatniunam wéartinian nantakiartiniaiti.

³ Núnisaṉ aents neka ainia nuka nayaimpiji̱a̱i̱ métek wínchar ajartatui. Tura untsurí aentsun péṉker túratniun jintintiáinia nuka yaaja̱i̱ métek tuke amutsuk keartatui.

⁴ Warí, nekaatniusha tí nukap átatui tura untsurí aents nú nukap nekaatai tusar ju̱ní̱ wéar atuní̱ wéar ajartatui. Tuma asamtai Taniará amukatin tsawant jeamam ju̱ papisha nukukam peṉké urankashti tusam asakam péṉker ikiusta” turutmiai.

⁵ Túrutkui íimiaj tukamán jimiará aents entsá yantam chíkichkia amaini̱ tura chíkichkia ju̱i̱ni̱ wajainian wáinmiajai.

⁶ Nuya̱ṉka áishmaṉ riniu pushí entsaru entsá pátatek wajan chíkich áishmaṉ aníak “Amukatin tsawantai̱ nekaachmin túrunattana nusha ¿urutáiṉ ati?” timiai.

⁷ Tutai áishmaṉ riniu pushí entsaru entsá pátatek wajá untsuurnumaani̱ tura menanmaani̱ mái̱ uwejé̱n nayaimpinmaani̱ takuí nekas tajai tusa tuke iwiaaku pujuwa nuna pachis chichaak “Kame nuka menaintiú uwí nuyá̱ sais nantu túrunas pujustatui. Kame Yusna ajasár tunaarincha ainia nu akupkatniun kakarmachu ajasártatna nui̱ṉ ashí uminkiattawai” tímiayi.

⁸ Ni timianka wisha antukmajai túrasha peṉké nekaachmajai. Tura anintrakun “Winia Uuntru, amukatniusha ¿itiura átata?” tímiajai.

⁹ Tutai nisha chichartak “Taniará wetá. Warí, amukatin tsawant jeamam ju̱ papikia nukukar peṉké urankashti tusar asakar péṉker ikiusmaiti.

¹⁰ Kame untsurí aents nijiatkar imiatkincha puju awajsamu ártatui. Túrasha Yusan enentáimtichu ainia nuka yajauchin túruiniak peṉké nekaachartatui. Antsu neka ainia nuka nekaawartatui.

¹¹ Kame Yus tuke áestutai̱n surimnaktatna nuyá̱ peṉké mui̱jmiai̱ awajnak ashí emesnaktin jeamam mir tusiantu nuwintia tsawant naṉkaamastatui. Mat. 24:15

¹² ¡Aents nákas pujus mir traisiantu traintiséṉku tsawantan ejettana nuka ti shiir warasti!

¹³ Antsu ámeka Taniará takáa takakmakuam tsawantrum jeamtai jakattame. Tura ayampram amukatin tsawant Isa. 57:1-2 jeamtai áminiu iwiaramu ana nu achiktaj tusam nantaktiatme” tímiayi.