Tan. 11 - Yus Papí: Shuarja̱i̱ Yus Yamaram Chicham Najanamu

¹ Tura Mítianmaya̱ Taríu akupin ajasmia nú uwitin yaiṉkian tura ikiaká̱rtaj tusan pujursamjai.

Nuṉkaani̱a̱ akupin ti kakaram ajasárma

^2-4 “Nekaata. Menaintiú úunt akupin Pírsianmaya̱ jíintrartatui nuyá̱ úunt akupin chikichik amúamu jiinkittiana nu timiá nekaska kuítrintin ajastatui. Nuna túruna umik ashí aentsun irur Krésian kajerkattawai. Nuya̱ṉka chíkich úunt akupin kakaram jiinkí̱ ashí nupetmar ni wakeramun túrattawai. Túrasha ashí nupetmarmatai ni akupeamuri̱sha kuatru nakanar chíkich aents sunasartatui.

^5-6 Nuṉkaani̱a̱ úunt akupin timiá kakaram átatui túrasha uchirí̱ṉkia nuna naṉkaamas kakaram ajas níji̱a̱i̱ṉkia naṉkaamas ashí nupetmartatui. Tura uwí naṉkaamarmatai chichaman najanawartatui. Túrunamtai nuṉkaani̱a̱ úunt akupniu nawantri̱ araki̱a̱ úunt akupniun papí najanatai tusa werittiawai. Túrasha núnaka túrutsuk ashí ní shuari̱ntiuk surunkartatui.

^7-12 Túrunamtaisha nu nuwa̱ aentsri̱ya̱ chíkich jiinkí̱ ni suntari̱n irur araki̱a̱ úunt akupniun werí nupetak ni wakeramun túrattawai. Túrawar nu nuṉkanmaya̱ yusan tura nakumkar najankamu ainia nunasha núnisaṉ piniṉ kuitji̱a̱i̱ nuyá̱ kuriji̱a̱i̱ najankamu ainia nuna Ejiptunam yaruakartatui. Túruna araki̱a̱ úunt akupniunmaya̱ṉka untsurí uwí arant pujustatui. Nuya̱ṉka araki̱a̱ úunt akupin nuṉkaani̱a̱ úunt akupniu nuṉke̱n utsantuattawai. Túrasha ni nuṉke̱ni̱ṉ ataksha waketrattawai. Túrunamtai ni uchirí̱ ti untsurí suntara irur meseta najatattsa úunt akupniu nupetkachmin je̱a̱mkamua tímianai kautkattawai. Nuṉkaani̱a̱ akupin nuna wainiak ti kajek araki̱a̱ akupniuja̱i̱ mániattsa jiinkittiawai. Nuja̱i̱ araki̱a̱ úunt akupin ni suntari̱n irur ti untsurí ajas mániattsa nisha jiintrattawai. Túrasha nú aentsnaka ashí amukártatui. Tura nuṉkaani̱a̱ úunt akupin tí untsurí aentsun achir yarumeak naṉkamantu enentáimtumartatui. Túrasha untsurí aentsun kajeṉkíataṉ nupetmakchattawai.

Uunt akupin araki̱a̱ armia nu

^13-17 Araki̱a̱ úunt akupniusha untsurí uwí naṉkaamasmatai emka irurmia núna nukap suntari̱ntin ajas tura ni mánitiairi̱ áiniana nunasha ti untsurín ikiankattawai. Nu tsawantai̱kia untsurí aents nuṉkaani̱a̱ úunt akupniun kajerkartatui. Núnisaṉ ímiaja̱i̱k wainkiamun umiiniak kakaram aents wajarártatui. Túrasha peṉké ántar túrunawartatui. Túrasha araki̱a̱ úunt akupin taa pepru iwiarkar utúachmin awajsamua nuna nérentin ajastatui. Nuṉkaani̱a̱ suntar kakaram juurma áiniana nusha nupetkatniun peṉké tujintkiartatui. Niji̱a̱i̱ wénaka yaaksha nupetkachmin ásar ni wakeramun túrawartatui. Túmak tí peṉker naṉkamantu nuṉkanam waya̱war nunasha emeskartatui. Túruna ashí naṉkamantu ajas nu aentsja̱i̱ chichaman najanawartatui. Tura emeskatai tusar nawantri̱n susattawai tura núja̱i̱sha itiurkachartatui.

^18-19 Nuya̱ṉka nayantsa yantamén pujuinia nuna weriar nupetkartatui. Túrasha chíkich akupin nupetkattawai. Túram ni nuṉke̱ni̱n wáketeaj tukamá jintiá tukumak iniartatui. Nuya̱ṉka atakka peṉké wainniakchattawai.

²⁰ Túrunamtai chíkich akupin pujustatui tura ashí nu akupeamunam kuítian juun akupkáttawai. Túrasha untsurí tsawantka pujutsuk emesnartatui. Nusha kajernatsuk núnisaṉ mesetja̱i̱nchu túrunattawai.

^21-25 Nuya̱ṉka netse áishmaṉ akupniuchuitiat nu aentsun péṉker matsatáiniakui anaṉkawar akupeamun nérentin ajastatui. Túrak ti untsurí suntar nin nakitiáiniaṉka tura chícham najanamua nuna úuntri̱ncha mash emeskattawai. Niji̱a̱i̱ chichaman najanawariat umitsuk anaṉka yúpichuch awakmáktatui. Tura yamaikia itiurchat atsawai tu enentáimainiakui tí peṉker nuṉka ainia nui̱ nu áishmaṉ wayá̱ ti yajauchin túruiniak yáunchusha túrachman túrattawai. Ni suntari̱ncha nuyá̱ ata̱a̱rman suíniak pepru iwiarkar nupetkachmin awajsamu áiniana nuna chichaman najatattawai. Túrasha ishichik tsawantak núnaka túrattawai. Tura nuya̱ṉka untsurí suntarja̱i̱ nuṉkaani̱a̱ úunt akupniun mesetan najatattawai. Túram nuṉkaani̱a̱ úunt akupniusha ti untsurí suntaran kakaram ainia nuna irur mesetan jiintiuktiatui. Túrasha anaṉkawartatui túramu asa nupetmakchattawai.

^26-27 Ni suntari̱ncha untsurí kajeṉkar ashí emestukartatui. Ju̱ úunt akupin ainia nuka aya yájauchiniak túratniun mai̱ wakeriartatui. Núnisaṉ nú awa̱sa áatai̱nmaṉ wáitian chicharnais pujusártatui. Túrasha tsawant tesamu jeachu asamtai wariṉkísha itiurkachartatui.

²⁸ Tura araki̱a̱ úunt akupin tí kuitrintin ajas ni nuṉke̱n waketkittiawai. Núnisaṉ tunaarincha chícham najanamua nuna nakitiak ni wakeramun túruki̱ nuṉke̱n waketkittiawai.

²⁹ Nuya̱ṉka tsawant tesamu jeamtai nuṉkaani̱ wétatui. Túrasha emka túramiania nútikiataj tukamá atakka tujintkiattawai.

³⁰ Warí, uunt kanú Kitimnumia̱ nin warurártatui túram sapijmiak waketkittiawai. Nuya̱ṉka tunaarincha chícham najanamua nuna kajerak ni wakeramun túrattawai. Tura waketkiṉkia tunaarincha chícham najanamun nakitiar iniaisaru ainia núja̱i̱ṉkia anturnaikiartatui.

Yusa Uunt Je̱e̱n mui̱jmiai̱ awajnástin

³¹ Nuya̱ṉka ni suntarí̱sha Yusa Uunt Je̱e̱ utúachminia nuna ti yajauch awajsártatui. Nuyá̱ tuke tsawant taṉku maar áestutai̱ncha suritkiartatui. Ántsaṉ ni wakeramun túrak peṉké mui̱jmiai̱ awajnásar tuke emesnartinian nui̱ ikiusártatui. Tan. 12:11; Mat. 24:15; 2 Tis. 2:3-9

³² Núnisaṉ chícham najanamun nakitiáinia núnaka ti shiir chicharás tunaanum aju̱a̱rartatui. Túrasha ni wakeramu umirka̱i̱j tusar aents ni Yusri̱ wakeramun umirainiak kakaram ajasár nu arant takasártatui.

³³ Nuyá̱ nú shuarnumia̱ neka ainia nusha untsurí aentsun nekatai̱n jintintiáwartatui. Túrasha ishichik tsawantak máamuksha tura áesamuksha ártatui. Túrutskesha achirar yaruakmasha núja̱i̱nchuka aya jú̱nik ujukamuksha ártatui.

³⁴ Nu túramu áiniakuisha ishichik aents waitnentrartatui. Túrasha anaṉkatai tusar ti untsurí aents ti shiir chicharás niji̱a̱i̱ iruntrartatui.

³⁵ Tura neka ainia nuya̱sha chíkichkia iniarartatui. Nu nekapsamuja̱i̱ tsawant jeamam nijiatkar imiatkincha puju awajsamu ártatui. Kame nu túrunatin tsawantka jeatsui.

³⁶ Tura úunt akupniuka ní wakeramun túrattawai. Núnisaṉ naṉkamantu enentáimtumak ju̱ nuṉkanmaya̱ yus áiniana núja̱i̱sha naṉkaamas uunta tímianu nekaprattawai. Túmak iwiaaku Yusan tíchamnia nunasha náṉkamas chicharkattawai. Túrasha Yusa kajetáiri̱ uminkiatin jeamam ní wakeramunka ashí umiktatui. Warí ni túrunatniua nuka ashí uminkiattawai.

³⁷ Tuma asa ni aparí̱ yusri̱ncha tura najankamu yusan nuwa̱ ti enentáimtiarmia nunasha peṉké enentáimtuschattawai. Warí, niṉki naṉkamantu ajas chíkich yúsnaka peṉké pachischattawai.

³⁸ Tura wenuir utúachmin awajsamu ainia nuna ni we̱a̱trí̱sha nekaacharman yusa núnis shiir enentáimtin átatui. Núnisaṉ kuriji̱a̱i̱ kuitji̱a̱i̱ tura tí shiirmach kaya núnisaṉ wariṉkish núkap kuit ainia nuna suíniak nú yusan shiir awajsattawai.

³⁹ Tura nékashtai̱ yusja̱i̱ tsaniṉ wenuir utúachmin awajsamu ti kakaram ainia nuna nupetkattsa werittiawai. Tura nin shiir enentáimtuinia núnaka nisha íksaṉ páantin naṉkamantu awajsártatui. Núnisaṉ untsurí aentsnum akupkatniun susattawai tura nuṉkancha nakar kuitji̱a̱i̱ suruktatui.

Uunt akupin araki̱a̱ amúamu

⁴⁰ Tura nuna tsawantri̱ jeamtai nuṉkaani̱a̱ akupin niji̱a̱i̱ mániattsa utsantuattawai. Túram araki̱a̱ akupniúsha káruja̱i̱ tura aents kawainium eketáiniaja̱i̱sha núnisaṉ untsurí uunt kanuja̱i̱ úunt nasea tímiatrus niji̱a̱i̱ mánaiktinian juárkittiawai. Tura nuṉke̱n utsantuawar áma̱a̱ya ánis ashí enetkar naṉkaamarartatui.

⁴¹ Nuya̱ṉka tí peṉker nuṉkanam wayá̱ tí nukap aentsun amukártatui. Antsu Etumka, Muapsha nuyá̱ Amun shuar timiá untsurí pisarar uwemprartatui.

⁴² Núnisaṉ chíkich nuṉkancha nupetkartatui. Nui̱ṉkia Ejiptusha peṉké uwemprashtatui.

⁴³ Tura kurincha kuítniasha núnisaṉ tí shiirmach Ejiptunam irunainia nunasha ata̱a̱r nérentin ajastatui. Nuya̱ṉka Ríwiancha tura Itiupíancha núnisaṉ túrattawai.

⁴⁴ Túrasha etsa̱ tatainmaani̱ya̱n tura araki̱a̱ chichaman anturmamak sapijmiaktatui. Túrunayat ti kajek ashí emesak untsurí aentsun amuktajtsa jiinkittiawai.

⁴⁵ Nuya̱ṉka nayantsanmaya̱ tura Yusna akantúkma náintri̱n ti shiira nuna ajapéri̱n ni pujustintri̱ jutai̱ je̱a̱n je̱a̱mkattawai. Nui̱ṉkia amukatin tsawantri̱ jeá asamtai nin yáiṉtinkia peṉké atsuttawai.