Tan. 1 - Yus Papí: Shuarja̱i̱ Yus Yamaram Chicham Najanamu

Taniar ni amikrí̱ji̱a̱i̱ Papirúnianam pujuinia

¹ Kame Juasim Jutanam úunt akupin ajas menaintiú uwí pujái̱ Papirúnianmaya̱ úunt akupin Napukutunusúr Jerusaréṉ péprun werí ni suntari̱n ikiatkar téntakar matsamtúkarmiayi.

² Nuyá̱ Jutá úunt akupniuri̱ Juasimian tura Yusa Je̱e̱n takatai̱ shíirmach najankamu irunmia nunasha yaruak Senar nuṉkanam ni yusri̱ je̱e̱n ikianak ni yusri̱ kuit ikiutai̱ je̱a̱nam ikiusti tusa Uunt Yus Napukutunusúran tsaṉkatkamiayi.

³ Nuya̱ṉka úunt akupin ni yaintri̱ uuntri̱ Aspiniásan chicharuk “Israer shuarnumia̱ úunt akupin ainia nuyá̱ tura peṉkeri̱ ainia nuya̱sha,

⁴ natsa péṉkera nu shíiram iirka unuimiáru nekaamnia nu wárichik unuimiármin tura akupniu je̱e̱n pujusár takakmasmin ainia nu itiatárum. Tura Kartíu chicham áartincha núnisaṉ chichastincha unuiniartarum” tímiayi.

⁵ Tura tuke tsawant ayuratarum tusa úunt akupniu yurumkari̱nian tura ni umutairi̱niancha tesarawarmiayi. Núnisaṉ menaintiú uwí unuiniartarum tura nu naṉkaamasmatai winí̱ itiatárum takakmasarat tú tinia akupkámiayi.

Taniar amikrí̱ji̱a̱i̱ akupniuí̱ takakmastin anaikiamu

⁶ Kame Israernumia̱ mash achirar ikiankamuya̱ nuya̱ntka Taniar, Ananías, Misaír, Asarías nuka Jutá shuarnumia̱ ármiayi.

⁷ Tura akupniú yaintri̱ armia nuna uuntri̱ Aspiniás ni náari̱n yapajtiuiniak Taniarnaka Pirtisasár, Ananíasan Shatraak, Misaíran Mishaak nuyá̱ Asaríasan Awitníkiu tu anaikiarmiayi.

⁸ Túrasha Taniarka nekas enentáinkia Muisais yúatniun tura umartinian surimkiamia nuja̱i̱ úunt akupniu yurumke̱ja̱i̱ tura umutairi̱ji̱a̱i̱ wiki yajauch awajmamsa̱i̱j tusan nekas túrashtatjai tu enentáimsamai. Tuma asa akupniu yaintri̱ úuntri̱n chicharuk “Nu yurumkan yuanka yajauchin utsumaka̱i̱j tusam útsutkaip” tu seamiayi.

⁹ Nuyá̱ akupniu yaintri̱ armia nuna úuntri̱n Taniaran waitnentrat tusa Yus ni enentái̱n niisháa awajtúsam,

¹⁰ akupniu yaintri̱ uuntri̱ Taniaran chicharuk “Maa, wisha winia úuntrun úunt akupniun atumín nu yurumkan yuáwarti tura umartinniasha umararti tau asamtai ashamajai. Kame chíkich natsan iisar atumí yapi̱ncha íirmasar niji̱a̱i̱ métekcha antsu watsaruitkiurminkia wi mantamnattajai.”

¹¹ Nuyá̱ akupniu takarniúri̱ úuntri̱n Taniar, Ananías, Misaír, tura Asarías, wáinkiarta tusa apujsamuya nuna Taniar chicharuk

¹² “Waitneasam ámin takarin ájinia nuka áyatik yurumak namaṉja̱i̱nchu tura entsaja̱i̱ tias tsawant sukartusam nekapkartusta.

¹³ Nuyá̱ tsawant jeamtai úunt akupin yurumna nu yurumkan yuinia nu aentsja̱i̱ apatkarum íikrattsatarum. Túrarum átum iin warí itiurkatniua wakerarum nuja̱i̱ métek túratarum” tusa seamiayi.

¹⁴ Tura Taniar seamia nuna tímiatrusaṉ anturak tias tsawant nekapsarmiayi.

¹⁵ Nuyá̱ tias tsawant naṉkaamasmatai chíkich natsa úunt akupniuja̱i̱ péṉker yurumkan namaṉja̱i̱ yurumiarmia nuja̱i̱ apatkar iismasha nuna naṉkaamas nuéram tsamapkari̱n péṉker iira ajasármiayi.

¹⁶ Kame péṉker yurumak iwiaramunka tura winiuncha wáinkiarta tusar anaitiukma nu núnaka juak aya árak yurumkanak suármiayi.

¹⁷ Tuma asamtai Yus kuatru natsa armia nuna nekatai̱n tura enentáimtai̱n nuyá̱ áakmaun áujas júujut enentáimniun tura ashí unuimiakan susamiayi. Nu arantcha Taniarka ímiaja̱i̱k wainkiamuncha tura mesekrampramuncha nékauyayi.

¹⁸ Tura ashí nu naṉkaamasu ai̱ úunt akupin Napukutunusúr tsawant jeamtai itiatárum timia nu tsawantin ni takarniúri̱ uuntri̱ Napukutunusúrai̱ ataksha júkiarmiayi.

¹⁹ Nuyá̱ ashí nu natsan úunt akupniui̱ ikiatkarmiayi. Nui̱ úunt akupin aujsa iismasha chíkich armia núja̱i̱ṉkia naṉkaamas Taniar, Ananías, Misaír, Asarías péṉker iisma ármiayi. Tuma asar úunt akupniu yaintri̱ ajasármiayi.

²⁰ Tura úunt akupin inintrúsar iismasha nui̱ uwishin tura nekamin pujuarmia núja̱i̱sha naṉkaamas tí peṉker ashí anintramun ni nekatairi̱ji̱a̱i̱ ái̱kiarmiayi.

²¹ Nuyá̱ Taniarka Siru akupta juárkimia tímianaisha pujumiayi.