Sup. 2 - Yus Papí: Shuarja̱i̱ Yus Yamaram Chicham Najanamu

Ené enentáimia ajas yapajniáwarat tusar chicharma

¹ Maa, natsantaincha shuara átumka iruntrarum enentáimpratarum.

² Akupkámu uminkiatniua nu tsawant jeatsa̱i̱ṉ tura saepa núnisaṉ tsawantcha naṉkaamatsa̱i̱ṉ nuyá̱ Jiuwá suira ka̱e̱ kaje̱nkamuri̱ atumíin jeartamtsurmini̱ṉ núnisan Jiuwá kajetáiri̱ tsawant atumíin jeachmanumaṉ enentáimpratarum.

³ Nuṉká pujarmena nu ashí wake meseakutiram Yus tana nuke péṉker umirin asarum Jiuwá e̱a̱ktarum. Tura nekas Yus wakeramu nakak túratin e̱a̱ktarum. Péejchach ajastin e̱a̱ktarum. Jiuwá kajetáiri̱ tsawantin waitnentrurainti tusarum umiktarum.

Uunt mátsatka Yusan enentáimtichu asutkiari̱

⁴ Warí Kaasa pépruka ajapamu itiarak awajsamu átatui tura Askarúnka mashiaku itiarak juáktatui. Astutka imiá tsawái̱ jatekar takakmari̱n atantramu ártatui tura Ikrunka nupa̱a̱ uwer ajapamua núnis arant utsaṉkarma ártatui.

⁵ ¡Maa Kiritianmaya̱ aentstiram nayantsa yantamén pujarmena nútiram antuktarum! Maa Jiristíu shuara nuṉke̱ Kanaanka, Jiuwá chichaak Kajerkarjai turamprume. Jatekar emeskar shuari̱sha amukma awajtamsarat tusan tsaṉkamkattajme.

⁶ Tura nayantsa yantamentka aya sá̱a̱kik ajasármatai murikiu wáinin yujatai̱ tura murik matsamtai̱ ajastatui.

⁷ Kame Jutanmaya̱ iwiaaku juákaru nu nuṉkanmaṉka murikri̱n wainiartatui tura kí̱akuinkia Askarún shuar matsamin armia nu je̱a̱nam kániartatui. Warí, achira yaruakma matsatainia nuya̱ṉka Jiuwá ni Yusri̱ ata̱i̱niartatui.

⁸ “Muap aents tura Amun aentscha wi shuaran itit awajénak yajauch chicharainian anturkaitjiai. Maaj nekaajai ni nuṉke̱n tí peṉker uunt awajsaruiti.”

⁹ Kame Jiuwá Nayaimpinmaya̱ Suntara Uuntri̱, Israera Yusri̱ tawai “Wi iwiaakjai tuma asamtai Muapka Sutuma urukamia núniktatui núnisaraṉ Amun aentska Kumura urukamia núnis túrunawartatui. Ni nuṉke̱nka aya nárak wáinkiartatui tura wee jutai̱ ajasártatui tura emeskamu tuke juáktatui. Tura winia shuarui̱ya̱ juákarua nu utuawar kasarartatui tura nuṉke̱ncha akintrurar nui̱ matsamsartatui.”

¹⁰ Kame niṉki tí peṉker awajmamsar waantu enentáimtumainiak Jiuwá Nayaimpinmaya̱ Suntara Uuntri̱ shuari̱n yajauch chicharkaru asar núnaka túrunawartatui.

¹¹ Jiuwaka niṉkia tí tsuumainian iniaktusartatui. Ántar yus ashí nuṉkanam írunna nuna emeskattawai ántsaṉ ashí nuṉkanmaya̱ uunt nuṉka mátsatka ainia nusha mashⁱ Niin tikishmátrartatui.

¹² “Atumsha ántsarmek Itiupíanmaya̱tirmesha Winia uunt puya̱ruja̱i̱ mantamnattarme.”

¹³ Kajek Ni uwejé̱n arakaani̱ takuittiawai tura Asirianka emeskattawai tura Níniwikia tí emeskamu péṉke atsáa ju̱ju̱ptin nímpianpiatak juáktatui.

¹⁴ Ti untsurí waaka tura kampunniunmaya̱ ashí yajasma matsamtai̱ ajastatui. Túmakui̱ waiti wiyaṉke̱nka ampush tura kuru kániartatui tura je̱á̱ áṉkamu íimtai̱ya̱ nui̱ chichartatui. Antsu wáitinmaṉka warinkish atsá ajastatui. Warí, initiaani̱ṉkia sétruja̱i̱ iwiarkamusha a̱a̱ya̱ tanish emestukam numiri̱ paant ajasártatui.

¹⁵ Ju̱i̱ti írutkamu waras pujuya nuka tura nekas enentáiji̱a̱i̱ niṉki enentáimtumas ní enentái̱ji̱a̱i̱ṉ chichaak “Aya wíkitjiai. Wiji̱a̱i̱ naṉkaamaska chíkichkia atsawai” tiniua nuka aya jú̱nik awajnáschaik túruna kajen yajasma matsamtai̱ ajasái. Ashí aents nuní̱ naṉkaamainiaka wíshikiakur uwej iniaktusrik awajtai̱ ajasártatui.