Suma. 8 - Yus Papí: Shuarja̱i̱ Yus Yamaram Chicham Najanamu

Eprain aents kajekarun Jeteun atsaṉkramu

^1-3 Mesetnum wénak ipiachma asar Eprain shuarka Jeteunan kajerkar tariarmiayi. Túrasha Jeteunan chicharainiak “Átum túraitrumna nuja̱i̱ naṉkaamaska wikia túrachuitjiai” tinia Eprain aentsnaka atsaṉkrarmiayi.

Sukutnumia̱ tura Piniuirnumia̱ aents Jeteunan kajerkarma

^4-9 Jeteunka traisiantu áishmaṉ niji̱a̱i̱ wekarmia nuja̱i̱ Jurtanan katitiar Sukut peprunam jeawarmiayi. Túrasha pimpikiaru asar tsukamainiak nuyá̱ shuaran yurumkan seawarmiayi. Túmaitiat Sukutnumia̱ aentska Matiannumia̱ úunt akupin jímiar juákarua nuna Sepaja̱i̱ Sarmunan Jeteun nupetkachai tu enentáimsar sapijmianiak Jeteunan yáiṉtinian nakitrarmiayi. Núnisaṉ Piniuirnumia̱ aentssha nútiksaṉ Jeteun yáiṉtinniaka nakitrarmiayi. Kame Jeteuna Sukutnumia̱ tura Piniuirnumia̱ aentsnaka chicharainiak “Nupetmakan tana atumniasha nútiksanak yapajkiattajrume” tiármiayi.

Jeteun Matiannumia̱ úunt akupniun achikiárma

^10-14 Jeteunka ni aentsri̱ armia nuja̱i̱ Matiannumia̱ úunt akupniun pataatuki̱ wésar Sepaja̱i̱ Sarmuna núnisaṉ ni suntari̱ kinse mir armia nui̱m kajinmasar matsatainian jatekármiayi. Tura Matiannumia̱ úunt akupin armia núnaka mai̱ achikiármiayi. Núnisaṉ Sukutnumia̱ natsancha chikichkiniak achikiármiayi túram Sukutnumia̱ uuntri̱ sataintisiáti armia nuna náari̱n áatak Jeteunan susamiayi.

Sukutnumia̱ja̱i̱ Piniuirnumia̱ aentsun Jeteun yapajtiúkma

^15-17 Tura Jeteunka Matiannumia̱ úunt akupin Sepaja̱i̱ Sarmunan achik Sukutnum itiá yapajmiák nuyá̱ aentsu úuntri̱n jaṉkiji̱a̱i̱ asutrarmiayi. Antsu Piniuirnumka uunt je̱a̱ yakí̱ je̱a̱mkamu amia nuna yumpuar akatúk aentsnaka ashí amukármiayi.

Matiannumia̱ úunt akupin maamu

^18-21 Nuyá̱ Jeteunka Matiannumia̱ úunt akupniun Sepaja̱i̱ Sarmunan anintruiniak aents mámarumna nusha urukua arma tiármiayi. Tutai nisha aimiainiak ámea ánin armai tiármiayi. Nuna tuíniakui ni yachi̱n máwarua nuna Jeteun nekaamiayi. Nuya̱ṉka Jeteun ni uchirí̱ Jeteran chicharuk “Sepaja̱i̱ Sarmuna máwarta” tímiayi. Túrasha Jeterka tí uchi asa sapijmiak mácharmiayi. Túmakui̱ Jeteun nu úunt akupniunka máwarmiayi.

Israer najanamu yus umirma

²² Tura Israer shuar Jeteunan chicharainiak “Matian aents nupetkamu matsatrin ayamkartuku asam ame tura uchirmesha nuyá̱ tiraṉmisha iin sumamtikin aku tusar wakeraji” tiármiayi.

²³ Tutai Jeteun aya̱k “Wisha tura winia uchirsha atumí úuntri̱ṉkia áchattaji antsu atumí úuntri̱ṉkia Uunt Yusak átatui.”

²⁴ Nu arant tukí̱ wémiayi. “Wi atumín seataj tusa wakeramuka ata̱a̱rmanumia̱ aki̱i̱tiai̱ kúriji̱a̱i̱ṉ najankamu takakrumna nu aṉkant aṉkant surusuk tusan wakerajai” tímiayi. Kame Matian aentska Ismaer wea ásar aki̱i̱tiai̱ kúriji̱a̱i̱ṉ najankamun aki̱i̱n ármiayi.

²⁵ Tutai Israer shuar “Ayu, péṉker enentáiji̱a̱i̱ amastai” tusar tarachin áitkiar ata̱a̱rmanumia̱ aki̱i̱tiai̱n kúriji̱a̱i̱ṉ najankamu takaku armia nuna aṉkant aṉkant matsattsarmiayi.

²⁶ Nuyá̱ Matian aentsu akupniúri̱ yamakáirma entsatái̱ tura nantua ánin kúrik najanamu nuṉkutai̱ núnisaṉ kamiyuri̱ unuṉtai armia núja̱i̱nchu antsu aya aki̱i̱tiai̱ kúriji̱a̱i̱ṉ najankamun súsarmia nuna kijintri̱ṉ nekapmam mir siatisiántu jeamiayi.

²⁷ Nuja̱i̱ Jeteun Yúsnan pujurin entsatái̱n awaṉkéman kúriji̱a̱i̱ṉ najana ni pépruri̱n Úpranam ikiusmiayi. Túramtai ashí Israer shuar aya nunak enentáimtuiniak nú nuṉkanam yajauchin ti túrawarmiayi. Jeteun nuna tura asa ashí ni shuari̱ji̱a̱i̱ yajauch awajmámsamiayi.

Jeteun jakamu

²⁸ Kame jú̱nis Israer shuar Matian aentsun nupetkar péejchach awajsarmiayi. Tuma asamtai Jeteun iwiaakuya nuiṉkia kuaraintia uwí aṉkant pujusármiayi.

²⁹ Kame ashí nuna tura umik Juasa uchirí̱ Jeteun ni je̱e̱ni̱i̱n waketki̱ pujumiayi.

³⁰ Tura Jeteunka untsurí nuwa̱n nuatra asa nekas uchirí̱nkia sataintia ármiayi.

³¹ Núnisaṉ Sekim nuṉkanmasha chíkich nuwe̱ pujumia nui̱ uchin yajutmar Awimirík anaikiauyayi.

³² Kame Jeteunka peṉké weamas jakamtai ni aparí̱ Juas iwiarsamunam Apiasér aentsu nuṉke̱n Upra péprunam iwiarsarmiayi.

³³ Tura Jeteun jakamtai Israer shuarka ataksha najankamu yus armia nuna enentáimtuiniak Paarpirítkia nekas ii yúsri̱nti tiármiayi.

³⁴ Kame Israer shuarka ashí ni nemasri̱ téntakma pujuarmia nuyá̱ ni Uunt Yusri̱ uwemtikramia núnaka peṉké enentáimtuscharmiayi.

³⁵ Núnisaṉ Jirupáar chíkich naari̱ Jeteun Israer shuaran péṉker túramaitiat Israer shuarka Jeteuna shuari̱nkia peṉké waitnentracharmiayi.