Suma. 7 - Yus Papí: Shuarja̱i̱ Yus Yamaram Chicham Najanamu

Jeteun 300 suntar juurma

¹ Jirupáar (támaka Jeteun támaiti) ashí aents niji̱a̱i̱ pujuarmia nuja̱i̱ tí kashik wéar Aruuta púkuniri̱n matsamkarmiayi. Kame Israer shuar matsatmanumia̱ṉka Matiana matsamkamuri̱ṉkia arakaani̱ ai̱ Murái naintia pakari̱n tíjiu̱ch matsamármiayi.

² Nuyá̱ Uunt Yus Jeteunan chicharuk “Ámiji̱a̱i̱ pujuinia nuka ti untsurí asamtai Matian aentsnaka mániar nupetkatniun tsaṉkatkachminiaitjiame. Nuna túramtaikia Israer shuar chichainiak ‘Ii kakarmari̱ji̱a̱i̱ṉ nupetmakji’ tusar naṉkamantu enentáimtumararchattuak.

³ Tuma asamtai yamaikia ámiji̱a̱i̱ pujuinia nu chicharainiakum ‘Ya mesetnum wétinian sapijmiainiak kurainia nuka waketkitiarum’ tiartá” tímiayi. Yus takui̱ Jeteun ímiatrusaṉ nekapes íismiayi. Nui̱ paintitús mir aents waketainiakui aya tias mírchik juákarmiayi.

⁴ Túrasha Uunt Yus Jeteunan chicharuk “Áentsrum tuke untsurí áiniawai. Tuma asamtai entsá yaruakarta. Nui̱ ámiji̱a̱i̱ wéartatna tura wéchartatna nunasha paant iniaktustatjame” tímiayi.

⁵ Nuiṉkia Jeteuncha aentsun entsá yaruakmatai nui̱ Uunt Yus Jeteunan chicharuk “Ya̱wá̱ ánis entsan úmuiniasha tura núnisaṉ tikishmarar úmuiniana nusháa akantrarta” tímiayi.

⁶ Kame entsan uwejé̱ja̱i̱ weṉkukar umararmia nuka traisiantu ármiayi. Antsu chíkichkia ashí tikishmarar umararmiayi.

⁷ Nuiṉkia Uunt Yus Jeteunan chicharuk “Jú̱ traisiantu áishmaṉ entsan uwejé̱ja̱i̱ weṉkukar umarara jú̱ja̱i̱ṉ aṉkant awajsattajrume. Tura Matian aents nupetkatniun tsaṉkatkattajrume. Antsu chíkichkia aṉkant aṉkant ni pujutái̱ri̱ni̱ṉ waketrarti” tímiayi.

⁸ Tura juwarmia nu ni írutramuri̱ súsarman yurumkancha tura kachuncha mash ujutukarmiayi. Tura Jeteunka chíkich Israer áishmaṉ armia núnaka aṉkant aṉkant je̱e̱n awakenak aya traisiantu áishmaṉkan juámtikiamiayi. Tura Matian aentska pakanam matsamkarmiayi.

Matian matsatman Jeteun mamikmamu

⁹ Kame nu kashi Uunt Yus Jeteunan chicharuk “Pai, yamaikia Matian aents matsatainia nu akatuktia. Warí nupetmaktinniaka Wi tsaṉkatkájme.

^10-11 Nui̱ akatúktin sapijmiakmeka ame yaintmau Juraja̱i̱ matsatainia nui̱ weme waritiak áujmatainia nu anturkata. Nu antukam kakaram ajasam matsamkamunam akatúktiatme” tímiayi. Tura Jeteuncha ni yaintri̱ Juraja̱i̱ ni nemasri̱ kakaram mesetan iwiarnatkaru nékatka matsatainian jeariármiayi.

¹² Matiancha nuyá̱ Amarík aentssha tura etsa̱ jintiainmaani̱ pakanam pujuarmia nu ti untsurí titikriátsja̱i̱ métek ásar pakan enetkar matsamiayi. Tura kamiyuri̱sha nayantsa yantamén náikmiji̱a̱i̱ métek ti untsurí ásar nekapmarchamnia ármiayi.

¹³ Kame Jeteun ni nemasri̱n weantúk pujurai̱ Matian aents tsaníakmari̱n chicharuk “Nekaata. Urukamtaitsuk mesekranam paṉ sewataja̱i̱ najanamu kaṉkek Matian aents mátsatkamun uunt nuap je̱a̱n atumtuk upukúr mash amukma tepetar ajainian wáiniaj” tu ujamiayi.

¹⁴ Takui̱ ni ai̱ chicharuk “¡Ame mesekrampramna nuka ántrachuiti! ¡Israer shuaran Juasa uchirí̱n Jeteunan Uunt Yus Matian aents matsamkamu puya̱rumji̱a̱i̱ mash amukta tusa tsaṉkatkayi!” tímiayi.

¹⁵ Tura Jeteuncha mesekrampramu áujmatman nuyá̱ tu túrunattawai táman antuk nu chichamaik Yusan shiir yumiṉsamiayi. Tura Israer matsatainiamunam waketki̱ jeá chichaak “Iwiarnartarum. Yamaikia Matian aents amuktinian Uunt Yus tsaṉkatramkarme” tímiayi.

Jeteun Matian aentsun nupetkamu

¹⁶ Tura Jeteun traisiantu áishmaṉ armia nuna menaintiú akantrámu awajsámiayi. Tura kachun núnisaṉ ichiṉnanam shirikip ekemákar eṉkeamun aṉkant aṉkant ashí atakramiayi.

¹⁷ Nuyá̱ chicharainiak “Ii nemasri̱ matsamkamu á̱a̱ri̱n jean nekaatarum wi túrattajna nu íisrum atumsha nútiksarmek túrattarme.

¹⁸ Tura wi kachun umpuakui wiji̱a̱i̱ pujuinia nusha umpuarartatui. Túruiniakui atumsha matsamkamu téntakrum pujurumna nútirmesha kachu umpuakrum ‘Uunt Yusa náari̱ji̱a̱i̱ Jeteun mesetan juarui’ tákuram charaatum ajatarum” tímiayi.

¹⁹ Kame Jeteun sian akanar yaruakmia nuja̱i̱ némas winiá wáinkiatin awajtúsma yapají̱tiai jeamunam kashi ajapéṉ jeariármiayi. Túrawar kachun umpuiniak ichiṉna takaru armia nuna intiakrarmiayi.

²⁰ Núnisaṉ menaint akantrámu armia nusha kachun umpuiniak ichiṉnan intiakkar menaari̱ji̱a̱i̱ṉkia shirikip kean takusar untsuuri̱ji̱a̱i̱ṉkia kachun umpuiniak “Ju̱ mesetka Uunt Yusna tura Jeteunnaiti” tuíniak charaatum ajarmiayi.

²¹ Kame nu matsamkamun téntakarmia nuka aṉkant aṉkant nuiṉ tee ajatas wajatiármiayi. Túmainiai̱ Matian aentsu suntari̱nkia pisainiak charaatum ajarmiayi.

²² Tura traisiantu áishmaṉ kachun umpuiniakui Uunt Yus Matian aentsun nuamtak puya̱ja̱i̱ mámtikiawarmiayi. Tura chíkich suntarka pisarar Pitsitia péprunam Sereranmaani̱ Apirmiúra nuṉke̱ náṉkatkamunam Tawat péprunam jeawarmiayi.

²³ Kame Neptarínmaya̱ tura Asernumia̱ núnisaṉ Manasésnumia̱ Israer shuar armia nuka irunturar Matian aentsun apapékarmiayi.

²⁴ Núnisaṉ Jeteun ashí Eprain naintiar naintranmaani̱ matsamármia nuna chichaman akuptak “Pitpiara wajá katitiaiya̱ nui̱ nuyá̱ Jurtan entsa jeainiachuk nákaktarum” tutai Eprain shuarka ujanairar Pitpiara wajá katitiaiya̱ nui̱ juárkiar Jurtan entsa ímianai jintiá akirtuawarmiayi.

²⁵ Nui̱ Matian aentsu úuntri̱n Urepan Seepja̱i̱ achikiármiayi. Tura Urepnaka Urep nainnium máwarmiayi. Nuyá̱ Seepnaka Seepa uwa yumiri̱ jutai̱niam máwarmiayi. Túrawar Matian aentsnaka apapékiar Jeteunan Jurtan entsa amaini̱ pujan Urepa muuke̱n tura Seepa muuke̱ncha tsupikman itiariármiayi.