Suma. 6 - Yus Papí: Shuarja̱i̱ Yus Yamaram Chicham Najanamu

Matian aents Israer shuaran waitkiamu

¹ Kame Israer shuarka Uunt Yus iismasha ti yajauch túruiniakui Uunt Yus Matian aentsnum siati uwí Israer shuaran iktua iniaisámiayi.

² Tura Matian aents tí waitkiainiam Israer shuarka sapijmiainiak nainniumsha kayá wá̱a̱nmasha pepru wénuimiunmasha ú̱mprar matsamsarmiayi.

³ Tuma ásar Israer shuar arakmawarmataisha Matian tura Amarík aents nuyá̱ etsa̱ jintiainmaani̱ matsamin armia nusha jaté wéarmiayi.

⁴ Túrawar Israer shuara nuṉke̱n matsamtúkar Kaasa peprua tímianai ni arakri̱nkia emestiarmiayi. Túruiniak ni yurumkari̱nkia peṉké ikiurtsuk murikrí̱ncha waakari̱ncha umpururi̱ncha ashí atantiarmiayi.

⁵ Warí nisha ashí waakartiuk, kamiyurtuk, jé̱e̱ntuk káutkar ti untsurí nekapmarchamnia titikriátsja̱i̱ métek ásar mash emestiarmiayi.

⁶ Nuna túruiniak Matian aents Israer shuarnaka aya jú̱nik awajsarmiayi. Títruiniam Israer shuarka yáimkiata tusar Uunt Yusan seawarmiayi.

⁷ Tura Uunt Yuska Matian aentsnumia̱ ayamkartukai tusar Israer shuar seamainiakui̱

⁸ Uunt Yuska Yúsnan etserniun Israer shuaran akuptúkarmiayi. Túram chicharainiak “Uunt Yus Israera Yusri̱ túramprume Wi Ejiptunmaya̱n íniakur wáitkiatai matsatrumin jí̱i̱rmiajrume.

⁹ Ejiptu aentsnumia̱sha tura ashí atumín kajertamiarmia nuyá̱ aṉkant awajsámiajrume tura atumí nemasri̱ṉkia atumsha íimprumni̱ṉ jí̱i̱rmiajai túran ni nuṉke̱nka atumín amasmajrume.

¹⁰ Wikia Uunt Yus atumí Yúsri̱ntjiai tíchamkajrum tura Amur aentsu nuṉke̱n pujusrumsha ni yusri̱ tikishmátrarum enentáimtusairap tíchamkajrum. Támaitiatrum átumka umirtukchamarme.”

Uunt Yus Jeteunan untsuamu

¹¹ Uunt Yusa suntari̱ Úpranam Juasa ensena numiri̱ ejetari̱n we pujusmiayi. Kame Juas Apiasér shuarauyayi Tura ni uchirí̱ṉkia Jeteunka Matian aentsun u̱mpruktaj tusa winiu najantainiam tríkiun pákak pujumiayi.

¹² Túman Uunt Yusa suntari̱ wantintiuk chicharuk “¡Maa, mesetan unuimiatrá Uunt Yus ámiji̱a̱i̱ pujawai!” tímiayi.

¹³ Tutai Jeteun aya̱k “Maa, winia uuntru Uunt Yus iiji̱a̱i̱ pujasha ¿ju̱sha urukamtai jú̱tikramajⁱ? Aentstikia túrachminian ashí túrimiayi tu ii uuntri̱ yaunchu chichartamainiak ‘Uunt Yus Ejiptunmaya̱ ¿ji̱i̱rmakchamkajⁱ?’ tu ujatmákarmiaj nusha ¿tuit? Yamaikia Uunt Yuska iinkia ayamprutmatsuk Matian aentsnum íkturmas initiamsaitji” tímiayi.

¹⁴ Nuyá̱ Uunt Yus Jeteunan iis chicharuk “Ame kakarmarmiji̱a̱i̱ kakaram ajasam wetá túram Israer shuar Matianai̱ya̱ uwemtikram aṉkant awajsarta. ¿Wi akupeatsjamek?”

¹⁵ Tutai Jeteun áimiuk “Maa, winia Uuntru kame wisha Israer shuarnasha ¿wariji̱a̱i̱n uwemtikraran aṉkant awajsartaj? Wats nekaata. Wínia shuaruka Manasésja̱i̱ naṉkaamas náakmachuiti tura winia aparu shuari̱ya̱ṉka wikia iniaṉnamuitjiai” tímiayi.

¹⁶ Tura Uunt Yus Jeteunan chicharuk “Ti nekas ámiji̱a̱i̱ pujuttajai tura ámeka Matian shuarka chikichik aents núpetua nútikiattame” tímiayi.

^17-24 Túrasha Jeteunka Uunt Yusa suntari̱n chicharuk “Támena nu nekasaitkiuiṉkia warinkish iniaktursata” tímiayi. Nuya̱ṉka Yusa suntari̱n “Nákarsata” ti ikiuak jiinkí̱ Yus súsatniun iwiarturtaj tusa wémiayi. Tura chipiu uchichin tura trikiu nekeṉman nuyá̱ paṉ karin eṉkettsuk najankamun yaruak támiayi. Túramtai Yusa suntari̱ chicharuk “Kayanam áepsarta” tutai tímiatrusaṉ túramiayi. Túramtai Yusa suntari̱ namaṉ áepsarman ni wai̱ri̱ tsakari̱ji̱a̱i̱ antiṉmiayi túram ji kéerak ashí áeskamiayi. Túrunamtai Yusa suntari̱ṉkia meṉkakamiayi. Nuyá̱ Jeteunka Uunt Yusa suntari̱ wainiak nekáa ashamak jákashtatjak tu enentáimpramiayi. Túman Uunt Yus chicharuk “Aṉkant awajsamu atá. Jákashtatme” takui̱ Jeteun Yus áestutai̱n nui̱ṉ najanak “Jiuwá-sharum” anaikiamiayi.

^25-32 Tura nú kashi Uunt Yus Jeteunan chicharuk “Ame apa túrutai̱ Paar áestutai̱ tura Asera enentáimtutai̱ numi emeskaram amukárta túram Yus áestutai̱ najanata” tímiayi. Tutai Jeteun tias áishmaṉja̱i̱ werí ni shuar nekaawara̱i̱ṉ tusa kashi emeskamiayi. Tura aents nuna nekaawar ti kajekar Jeteuna aparí̱n weriar “Jeteun amasta maatai” tiármiayi. Túrasha Jeteuna aparí̱ nu aentsu chicharainiak “Paarsha nekas yúsaitkiuṉka niṉki ayamprumakti” tímiayi. Paar enentáimtutai̱n emestukma asamtai Jeteuna náari̱n yapajtiuiniak Jirupáar anaikiarmiayi. Nuka Israer chichamja̱i̱ṉkia “Paarka niji̱a̱i̱ mánaikti” tamaiti.

³³ Nuiṉkia ashí Matian aents tura Amarík aentssha núnisaṉ etsa̱ jintiainmaani̱ pujuarmia nú shuaraim iruntrar Jurtan entsá katitrar Jisriira pakari̱n matsamkarmiayi.

³⁴ Tura Jeteunnaka Uunt Yusa Wakaní̱ tarur ijiamiayi. Nuya̱ṉka kachun umpuarmatai Apiasér aents nemarsatai tusar káutkarmiayi.

³⁵ Nuyá̱ Manasés shuarsha chícham akuptúkam nisha nemarsatai tusar tariarmiayi. Núnisaṉ Aser tura Sapurún nuyá̱ Neptarí shuarsha chícham akuptúkam nisha iṉkiuṉtai tusar jíintiurarmiayi.

³⁶ Tura Jeteuncha Yusan chicharuk “Nekas támena nútiksamek Israer shuar wiji̱a̱i̱ aṉkant awajsattakmeka

³⁷ trikiu neketai̱niam murikiu nuapé̱ úrentuk ayapá̱ra aepsamun kashin káshik iisan núṉkaka ju̱ju̱ptin ámanumaṉ aya nuape̱k jiniarun sana ajasún wainkianka antsu nuiṉkia turutmiam nútiksamek Israer shuar wiji̱a̱i̱ uwemtikrattamna nuna paant nekaattajai” tímiayi.

³⁸ Nuna tiniu asa kashin káshik nantaki̱ nuap sana ajasún jusa ijiurá chikichik tsapanam aimkiamiayi.

³⁹ Nu arant Jeteun Yusan chicharuk “Kajertutsuk jú̱chiniak chichaktaj ataksha tsaṉkatrukta. Ataksha jú̱chiniak nuapja̱i̱ nekapsattsan wakerajai. Waitneasam aya nuape̱k ju̱ju̱ptin juaktí. Antsu núṉkaka sának ajasti” tímiayi.

⁴⁰ Tutai Yuska nútiksaṉ nu kashi túramiayi. Nuapka ju̱ju̱ptin ai̱ṉ aya núṉkak sana ajasmiayi.