Suma. 5 - Yus Papí: Shuarja̱i̱ Yus Yamaram Chicham Najanamu

Típura kantamma

¹ Nu tsawantinkia Típuraka Apinuáma uchirí̱ Parakja̱i̱ jú̱nis kantamáwarmiayi.

^2-13 Kantamáiniak Israer shuar mesetnum wéartinian nakitracharu ásarmatai Yusan shiir enentáimtusarmiayi. Tura yaunchu naṉkaamania nunasha núnisaṉ Etumnum Sair náinniumia̱ Uunt Yus jíiniakui nuṉka muchitkiamia nunasha pachis kantampruáwarmiayi. Núnisaṉ Sámkar Israer shuara sumamtikin pujái̱ péṉkerchan túrawarmia nunasha tura jintiasha aṉkant wekasachmin áiniamunam ni sumamtiktairi̱ naṉkamamia nunasha enentáimias kantamáwarmiayi. Nuya̱ṉka awakmakar kantamtai̱ kanta kantamma ashí antuktarum tusa seawarmiayi.

^14-31 Israer shuar Eprain, Piṉjiamín, Makir, Sapurún, Isakár tura Neptarí weanmaya̱ mesetnum ashinkiaru ásarmatai ti shiir enentáimtuiniak kantampruáwarmiayi. Antsu Israer shuar Ruwin tura Karaat nuyá̱ Tan tura Aser weanmaya̱ṉka yáimkiachu ásarmatai kajerainiawai. Antsu Mikitiunam tíjiu̱ch Tanaknum núnisaṉ yaasha nayaimpiniam ekemsaraṉ itiura Sésaraja̱i̱ mánaikiarma nunasha áujmatainiawai. Tura Israernumia̱ pepru Mirus mesetnum yáimkiacharu ásarmatai ti kakaram yajauchiji̱a̱i̱ yúmiṉkiamuncha etserainiawai. Antsu Jaérnaka núwa̱itiat Sésaran kanú tepan numiji̱a̱i̱ ijiú maa asamtai ti shiir yumiṉkiainiak kantampruiniawai. Tura Sésara nukurí̱nkia uchirí̱n wáinkiashtin asa kúntuts enentáimkiui nuna pachittsar wishikiainiawai. Tura mesetnum awakmakar yaruakarman akantrartin ásar Uunt Yusan ti shiir enentáimtuiniak kantamáwarmiayi. Tura kantamáiniak Yusa nemasri̱ ainia nuna yajauchiniam yumiṉkrar antsu amikri̱ áiniana núnaka péṉkernum yumiṉkrar nemasri̱n amukármiayi. Túrunamtai Israer nuṉkanam kuaraintia uwí aṉkant matsamsarmiayi.