Suma. 4 - Yus Papí: Shuarja̱i̱ Yus Yamaram Chicham Najanamu

Típura Parakja̱i̱ Sésaran nupetkamu

¹ Nuyá̱ Ejut jakamtai Israer shuarka Uunt Yus íimmianum ataksha ti yajauchin túrawarmiayi.

² Nuna túruiniakui Uunt Yus Kanaannumia̱ akupin Japin, Ásur péprunam pujumia nuna íktusmiayi. Tura ni suntara uuntri̱ Sésaraka Arusétkuim nuṉkanam pujumiayi.

³ Tura Japinkia mesetnum eṉkemprar mánitiai kárun áya jiruja̱i̱ṉ najankamun nuiwisiántu takaruyayi. Nuja̱i̱ Israer shuarka painti uwí ti wáitkiasma matsatainiak Uunt Yusan kakaram seawarmiayi.

⁴ Kame nu tsawantinkia nuwa̱ Yúsnan etserin Rapitiuta nua̱rí̱ Típura Israer shuarnum sumamtikin asa chichamprimiayi.

⁵ Tura niṉkia tintiuk wajamunam weanak pujuyayi. Tuma asamtai Típura tintiukri̱ tiniu ármiayi. Nuka Eprainkia naintiar naintra nui̱ Ramá tura Pitirnum ajapéniti. Kame nui̱ wéar Israer shuar ashí ni itiurchatri̱n iwiarin ármiayi.

⁶ Nuyá̱ nu tsawantai̱ Típura Apinuáma uchirí̱ Parakan Káatish péprunam Neptarí wea pujumia nuna untsuk chicharuk “Israer shuara Uunt Yusri̱ chichartamuk ‘Weme Neptarí aents nuyá̱ Sapurún aents tias mir áishmaṉ Tapur nainnium irurarta.

⁷ Túrawakmin akupin Japinia suntari̱ úuntri̱n Sésaran suntari̱ntiuk Kisun ashintsa nui̱ mesetnum mánaitiai̱ kárurtiuk ikiatkan íktustatjame’ túramui” tímiayi.

⁸ Tutai Parak aya̱k “Ame nemartakminkia wétatjai tura nemartachkumni̱ṉkia wéchattajai” tímiayi.

⁹ Nuiṉkia Típura chichaak “Ámiji̱a̱i̱ winittiajai túrasha ámeka nekas imiancha enentáimiu asam páantin awajnáschattame. Antsu Uunt Yus Sésarnaka nuwa̱n íktustatui.” Nuna tinia Típuraka Parakja̱i̱ Káatish nuṉkanam wéarmiayi.

¹⁰ Nuyá̱ Parakka Neptarí aentsja̱i̱ Sapurún aentsun untsukar Káatishnum irurmiayi túram tias mir suntar nemarkarmiayi. Tura Típurasha niji̱a̱i̱ wémiayi.

¹¹ Kame Muisaisa we̱a̱rí̱ aentsri̱ya̱ Jupapa uchirí̱ Jiwirka Kiin áentsuitiat nuya̱ṉka kanakí̱ Káatisha pakarí̱n ápatnik Sanaimia tímianai ní jutai̱ je̱e̱n je̱a̱mkarmiayi.

Sésara suntari̱ nupetkamu

¹² Nui̱ Sésaraka, Apinuáma uchirí̱ Parak Tapur nainnium wakayi táman antuk

¹³ ashí mánitiai karu aya jiruja̱i̱ṉ najankamun nuiwisiántu irur ashí suntari̱ntiuk Arusétkuimniumia̱ juárkiaraṉ Kisun ashintsa tímianai matsamtúkarmiayi.

¹⁴ Nuiṉkia Típura Parakan chicharuk “¡Kakaram ajasta. Yamái Uunt Yus Sésara nupetkatniun tsaṉkatramkayi! ¿Warí Uunt Yus amiiya̱ṉka eem wéatsuk?” tutai Paraksha Tapur náinniumia̱ tias mir suntarja̱i̱ akattúrarmiayi.

¹⁵ Nui̱ Uunt Yus Parakka íimmianumaṉ Sésara káruri̱n emestuk suntari̱nkia puya̱ja̱i̱ ashí amutkam ímia Sésaraka káruri̱ya̱ jiinkí̱ nuṉkak pisarmiayi.

¹⁶ Túrunamtai Paraka suntari̱nkia Sésara suntari̱n pataatuk amukiár Arusétkuimnium ejewarmiayi. Túrawar ashí ni suntari̱n puya̱ja̱i̱ ashí amukar chikichkiṉkisha peṉké ikiukcharmiayi.

¹⁷ Tura Sésaraka pisar Kiin aents Jiwira nuwe̱ Jaer pujamunam jeamiayi. Kame Japinkia Ásur nuṉka akupniúri̱ji̱a̱i̱ tura Jiwira Kiin áentsri̱ji̱a̱i̱ṉkia mániashtai tunaiyaru ásarmatai nui̱ jeamiayi.

¹⁸ Nui̱ jeamtai Jaer chicharuk “Uuntru winitiá sapijmiakaip waya̱ta” tutai ni je̱e̱n waya̱mtai Jaer tarach waṉkarmaja̱i̱ nukukmiayi.

¹⁹ Tura Sésarasha “Kitiamajai. Wait aneasam entsa ajamprusta” tímiayi. Tutai Jaer muntsu nuapnum uwamun uká̱i̱ aar ataksha nukukmiayi.

²⁰ Tura Sésara chichaak “Wáitiniam wajasam aents taa ju̱i̱ aents táchaik tákuiṉkia atsá titiá” tímiayi.

²¹ Túrasha Sésaraka ti pimpikin asa kanar pákea ajasmatai Jaer Jiwira nuwé̱ nuap je̱a̱ je̱a̱mkur ajintrutai̱n jurukí̱ yáitmataik jearí mishanam ajintruá tuke nuṉká iruá mámiayi. Sésaraka nuní̱ mantamnamiayi.

²² Tura Paraksha Sésaran pataatuki̱ Jaerai̱ jeamiayi. Jeamtai chicharuk “Winitiá. Aents e̱a̱m núnaka iniaktustatjame.” Tutai je̱a̱ wayá̱ iyaj tukamá Sésaraka nuap je̱a̱ je̱a̱mkur ajintrutai̱ji̱a̱i̱ mishanam ajintruá maamu tepan wainkiamiayi.

²³ Nu tsawantin Uunt Yus Israer shuar iimiainiamunam Kanaanka úunt akupniuri̱n Japinian péejchach awajsámiayi.

²⁴ Tura nu tsawantiṉkia Israer shuarka Kanaannumia̱ úunt akupin Japinniaka nú naṉkaamas kajerkiar nin amukármiayi.