Suma. 3 - Yus Papí: Shuarja̱i̱ Yus Yamaram Chicham Najanamu

Kanaannum tuke núṉkentin juákaru

¹ Kame Israer shuaran nekapsamij tusa Kanaannum uunt nuṉka mátsatkamu mesetnum pachinkiacharun Uunt Yus ikiukiarmiayi.

² Núnaka Israer shuara uchirí̱ meseta unuimiátkacharu armia nu ukunam unuimiátkar yaunchu nekaachu armia nuna jintintiáwarmi tusa túramiayi.

³ Kame Jiristíu aentsu uuntri̱ seṉku armia nu tura ashí Kanaan aentssha núnisaṉ Setunja̱i̱ Jep aents Paarirmún náinniumia̱ juárkin Repuamát tímianai naintiar naintiar Ríwianu nuṉkanam matsamármiayi.

⁴ Nuja̱i̱ umiktin chichaman ni úuntri̱n Muisaisai̱ni̱ yaunchu súsarmia nuna Israer shuaran umirtukartimpiash tusa nekapsattsa Uunt Yus túramiayi.

⁵ Tuma ásar Kanaan aents tura Jet aents Amur aents Píris aents núnisaṉ Jep aents nuyá̱ Jípius aents matsatainiamunam Israer shuarka pujuarmiayi.

⁶ Nu arant nawantri̱ncha nuatruiniak nisha núnisaraṉ nawantri̱n ni uchirí̱ji̱a̱i̱ nuatmamtikrar ni yusri̱ ainia nunasha enentáimtusarmiayi.

Kusantrisatáimian Utuniár nupetkamu

⁷ Israer shuarka Uunt Yus íimmianum ti yajauchin túrawarmiayi. Túmainiak ni Uunt Yusri̱nkia kajinmatkiar Páaran tura Aseran ántar yusan umirkarmiayi.

⁸ Nuna túmainiakui Uunt Yussha Israer shuaran kajerkar Misiuputámianam Siria úunt akupniuri̱ Kusantrisatáimia íktus iniaisarmiayi. Nui̱ Israer shuar uchu uwí Kusantrisatáimia iniatairi̱ pujusármiayi.

⁹ Nui̱ Israer shuar Uunt Yusan ataksha kakaram seawarmiayi. Tura Uunt Yus nin uwemtikiartinian Karepa yachí̱ ékechiya nuna Kenasa uchirí̱ Utuniáran iniaitiuk uwemtikrarmiayi.

¹⁰ Tura Uunt Yusa Wakaní̱ Utuniáran tarimiayi. Túramtai Israer shuaran sumamtikin ajas sumamtikmiayi. Nu túram mesetan najanamiayi. Tura Uunt Yus Kusantrisatáimian Misiuputámia Siria úunt akupniuri̱ yúpichu nupetkatniun Utuniáran tsaṉkatkamiayi.

¹¹ Nuní̱ túramtai Israer shuar kuaraintia uwí aṉkant pujusármiayi. Nuya̱ṉka Kenasa uchirí̱ Utuniársha jakamiayi.

Muapa akupniúri̱ Ikrunan Ejut maamu

¹² Nuyá̱ ataksha Israer shuarka Uunt Yus íimmianum ti yajauchin túrawarmiayi. Túmainiakui Uunt Yus Israer shuaran itiurchat awajsarat tusa Muap aentsu akupniúri̱ Ikrunan ikiatkarmiayi.

¹³ Nu túram Ikrunka Amunnasha tura Amarík aentsnasha ipiaawar Israer shuarja̱i̱ mánaikiar nupetkar Kuṉkuk Péprun akintrukarmiayi.

¹⁴ Túrunawar Israer shuarka Muap aentsu akupniúri̱ Ikruna takarin tiasiúchu uwí pujusármiayi.

¹⁵ Túmainiak ataksha Israer shuar Uunt Yusan kakaram seawarmiayi. Túram chikichan aṉkant awajkartinian Jera uchirí̱ Ejut, Piṉjiamín wea menaja̱i̱ takakmauya nuna Uunt Yus anaitiukmiayi. Tura Ejutja̱i̱ Israer shuar Muapa úunt akupniuri̱ Ikrunan kuítian akuptin armia nuna akuptúkarmiayi.

^16-25 Ejut chíkich Israer shuar armia nuja̱i̱ Muápnumia̱ akupniun Ikrunan kuítian ashí uwitin akiktiniuyania nuna susattsa werimiayi. Tura kuítian susa ikiuiniak nuya̱ṉka waketkiarmiayi. Túrasha ántar yus nakumkar najankamu Jirkarnum írunna nuní̱ naṉkaamainiak Muápnumia̱ akupniuja̱i̱ Ikrunja̱i̱ chichastaj tusa Ejutka ataksha waketkimiayi. Tura akupniun jearí chicharuk “Chícham áya amek nekaatniun takurkajme” tímiayi. Tutai akupin Ikrun ni takarniúri̱ nui̱ pujuinian chicharainiak “Jíintratarum” tímiayi. Ejutka puya̱ṉ mai̱ atsakamun esantí̱ṉkia mítruka jeachun najanamun pushiri̱i̱n u̱u̱k takakuyayi. Nuya̱ṉka akupin niji̱a̱i̱ chichastaj tusa weantkamtai puya̱ri̱n jusa Ejutka akupniun tantannum kakantar ijiumiayi. Túram akupniúka tí nueran asamtai puya̱ka ashí meṉkakamiayi. Nuna tura ikiuak Ejutka wáitin péṉker epeni ikiuak nuya̱ṉka jiinkimiayi. Túrasha takarniúri̱ṉkia ni atsumamuri̱n túrak ijiatmatai̱niam pujatsuash tusa akupniúnka pachischarmiayi. Nuya̱ṉka ti meṉkakamtai urukayik tusar wáitin urakmá akupin jaka inian tepan wáinkiarmiayi.

^26-30 Kame akupniu takarniúri̱ṉkia akupniun naká pujuiniai̱ Ejutka Sairatnum pisarmiayi. Nui̱ jeá Israer shuaran untsuiniak kachun Eprainia náintri̱ya̱ umpuarmiayi. Nuya̱ṉka káunkarmatai ashintiukar Israer shuarka Muap aentsja̱i̱ mánaikiarmiayi. Túrawar Muápnumia̱ suntar kakaram sapijmiachu tias mir iniaṉkasaṉ armia núnaka ashí nupetkarmiayi. Tuma asamtai yaaksha peṉké pisarcharmiayi. Nuna túrawarmataiṉkia uchaintia uwí nu nuṉkanam aṉkant matsamsarmiayi.

³¹ Nuya̱ṉka Ejutai̱ya̱ṉka Sámkar sumamtikin ajasmiayi nisha núnisaṉ waaka jaṉke̱ja̱i̱ Jiristíu aentsun saisiantu máwarmiayi. Tura Israer shuaran uwemtikrarmiayi.