Suma. 21 - Yus Papí: Shuarja̱i̱ Yus Yamaram Chicham Najanamu

(3) Piṉjiamín shuaran enentáimtusar iwiararma

^1-4 Piṉjiamín shuar meset najatatai tusar chichaman juruiniak Míspanam matsamsar nekas umiktatji tuíniak Piṉjiamín shuarka ii nawantri̱nkia súsachartai tusar chichaman najanawarmiayi. Tuma ásar Pitirnum ashí iruntrar Piṉjiamín shuarka atsuartatuapi tusar tí kuntuts enentáimprarmiayi. Nuya̱ṉka útainiak shuarka Yusan áestuawarmiayi.

^5-12 Tura Karaatnumia̱ aents Japis aents Míspanam Piṉjiamín shuaran mesetan najatiarmia nui̱ pachinkiacharu ásarmatai nekaawar asutiáwartai tiármiayi. Nuya̱ṉka Japis aents mesetan najatawarat tusar tuse mir suntaran Karaatnum akupkarmiayi. Túrawar ashí aentsun áishmaṉnasha nuwa̱ncha tura uchincha mash amukármiayi. Antsu áyatik kuatrusiántu nuwa̱ nuatnaikiachu armia nunak mácharmiayi túrawar Sírunam júkiarmiayi.

^13-17 Túrawar Piṉjiamín shuar juákaru saisiantu Rimiu kayanam pujuarmia nuna chichaman akuptúkarmiayi. Tutai Piṉjiamín shuarka káunkar nuatkarmiayi. Túrasha máshikia nuatkacharmiayi. Tuma asamtai Israer shuarka tuke kúntuts pujuarmiayi.

^18-24 Piṉjiamín shuarka ii nawantri̱nkia súsachartai tusa chichaman najanawaru ásar nawantri̱n súsatniunka tujintkiarmiayi. Tuma ásar Yusa namperi̱ Sírunam najanawartinia nuna enentáimturarmiayi. Nuya̱ṉka Sírunam uwa aja írunna nui̱ u̱mkarum nákastarum tusar Piṉjiamín shuar nuatkachu armia nuna chichaman akuptúkarmiayi. Tura chicharainiak “Sírunmaya̱ nuwa̱ch jantsemátniunam pachinkiattsa wininiakui achikrum jurumkitiarum” tiármiayi. Nuyá̱ “Sírunmaya̱ aentska ii chicharainiakur atumí nawantri̱nkia átumka súsachu asarum antsu achikia júkiarma asamtai makunchattarme tiartai” tiármiayi. Nuka tímiatrusaṉ naṉkaamasmiayi tura Piṉjiamín shuar nuatkachu armia nusha nuwá̱ júkiar nuatkarmiayi. Nuya̱ṉka ni pépruri̱ armia nuna ataksha iwiarak je̱a̱mkatai tusar nui̱ yaruakarmiayi. Antsu chíkich Israer shuar armia nuka ni shuari̱ni̱ṉ waketrarmiayi.

²⁵ Kame nu tsawantinkia Israer shuarnumka úunt akupin atsá asamtai aṉkant aṉkant ní wakeramun péṉkeraiti tu enentáimiarmia núnisar túriarmiayi.