Suma. 20 - Yus Papí: Shuarja̱i̱ Yus Yamaram Chicham Najanamu

^1-7 Israer shuar ashí weanmaya̱ suntara úuntri̱sha tura kuatrusiántu mir suntar Míspanam iruntrarmiayi. Antsu Piṉjiamín shuarka káunkacharmiayi. Tura Piṉjiamín shuarsha nuna nekaawarmiayi. Tura Riwí shuarka Piṉjiamín shuar ni nua̱ri̱ya núnis amia nuna itiurká máwarma nuna ataksha awaiṉki̱ ashí ujakar urukamtai nuwá̱ aya̱shí̱n tsupir akupkáma nunasha ashí ujakármiayi.

^8-16 Tura ashí weanmaya̱ iruntrar je̱e̱nka wakettsuk Piṉjiamín shuar meset najatatai tiármiayi. Tusar ashí iwiarnatkarmiayi. Tiásnumia̱ chikichik aentsuk nuiwi mánaiya̱ nuna atsumamuri̱n súsatin ármiayi. Túrawar Piṉjiamín shuaran akuptuiniak Kawaanmaya̱ yajauch áishmaṉ ainia nuna achir amasárti tu chichaman akuptúkarmiayi. Túrasha peṉké anturkacharmiayi. Antsu nisha iruntrar ashikia paintisáis mir suntar tura Kawaanmaya̱ṉka siatisiántu suntar iwiarnakarmiayi.

(2) Piṉjiamín shuar mesetnum amukárma

^17-21 Israer shuarnumka kuatru siantu mir suntar kakaram irunmiayi. Tura Pitirnum ashiṉkiar yayá̱ Piṉjiamín shuarja̱i̱ mesetan juárkitiai tusar Yusan aniasarmiayi. Núnaka Yusna Eṉketai̱ Pitirnum pujá asamtai túrawarmiayi. Tura Yus chicharainiak “Émkaka Jutá shuar naṉkamawartiniaiti” tiármiayi. Tutai Jutá shuar mesetnaka naṉkamawarmiayi túrasha nu tsawantka Piṉjiamín shuar awakmakar paintitús míran Israer suntaran máwarmiayi.

^22-25 Nuyá̱ Israer shuarka tí kuntuts enentáimprar Piṉjiamín shuarja̱i̱ ataksha mániktajiash tusar ataksha Yusan aniasarmiayi. Tutai ataksha Yuska chicharainiak “Mánaiktarum” tiármiayi. Nu tsawantincha ataksha mánaikiarmiayi. Tura nu tsawantai̱sha Piṉjiamín shuar awakmainiak ataksha tiasiúchu mir suntaran Israernumia̱n máwarmiayi.

^26-48 Túrunamtai Israer shuarka tí kuntuts enentáimprar útkiar ataksha Pitirnum wéarmiayi. Tura Yusan áestuawar Piṉjiamín shuarja̱i̱ ataksha mánaiktatjik tusar ataksha Yusan aniasarmiayi. Tutai Yuska ataksha chicharainiak “Yamaikia awakmáktatrume. Tuma asamtai mánaiktarum” tiármiayi. Tutai tsawant menaint tsawa̱rmataikia mániatai tusar nuṉkaani̱ Kawaanam wéarmiayi. Tura Israer shuarnumia̱ṉka untsurí suntar ú̱mprar péprun téntakarmiayi. Nuya̱ṉka Piṉjiamín shuar jíintiurar Israer shuar ú̱mpracharu armia nuja̱i̱ mesetan naṉkamawarmiayi. Tura Israer shuarka pisainiawai tusar Piṉjiamín shuar pataatukar traintia suntaran máwarmiayi. Kame Piṉjiamín shuarka Israer shuaran pataatukiar ashintiuiniai̱ Israer shuar ú̱mar matsatáinia jíintiurar Kawáa péprun jatekar péprunam utsanawar aentsnaka ashí kajeṉkar pépruncha ekemákarmiayi. Nuyá̱ Israer shuar pisarmia nuka mukuintiu wáinkiar Piṉjiamín shuarja̱i̱ kakantar mánitian naṉkamawarmiayi. Túrunawarmatai Piṉjiamín shuarka urukamtai túmawara nuna nekamawar nuya̱ṉka pisatan naṉkamawarmiayi. Tura Piṉjiamín shuara pépruri̱n taṉku tura aents írununka ashí kajeṉkarmiayi. Túrasha Piṉjiamín shuarnaka paintiséṉku mir sian suntara kajeṉkármiayi. Túram aya saisiantuchik pisarar Rimiun kayanam ú̱mkarmiayi.