Suma. 2 - Yus Papí: Shuarja̱i̱ Yus Yamaram Chicham Najanamu

Yusa suntari̱ Israer shuaran chicharkarma

¹ Uunt Yusa suntari̱ Jirkarnumia̱ Pukimnum wakamiayi tura chichaak “Ejiptunmaya̱ṉka wi atumniaka jí̱i̱rmajrume tura atumí úuntri̱n nuṉkan amastiniaitjiarme tímiajna nu nuṉkanam ikiankamiajrume. Wi atumji̱a̱i̱ chichaman najanamiaj núnaka peṉké kajinmátkishtiniaitjiai.

² Túrasha átumka ju̱ nuṉkanmaya̱ shuarja̱i̱ṉkia chícham peṉké najanawairap. Antsu átum ni yusri̱ áestutai̱ ainia nuka emestuktarum tímiajrume támaitiatrum átum winia chichamur antukchamiarme. ¿Ausha urukamtai umikchaitrum?

³ Tuma asamtai wisha ju̱na tájarme ‘Jú̱ aentsnaka atumíya̱ ji̱i̱ran akuprashtatjai. Tura nisha atumí nemasri̱ ártatui tura ni yusri̱ ainia nusha atumín anaṉkramattarme’ titiarum” tímiayi.

⁴ Uunt Yusa suntari̱ ashí Israer shuaran tuasua umikmatai ashí aents kakantar útiarmiayi.

⁵ Tuma asamtai nú nuṉkaka Pukim anaikiarmiayi. Nui̱ Uunt Yusan taṉkun áestuawarmiayi.

Jusuiji̱a̱i̱ wekasarmia nú aents amuukarma

⁶ Tura Jusuí aentsun pujutarum tinia ikiukiarmia nui̱ Israer shuarka aṉkant aṉkant ní nuṉke̱nak achik pujustaj tusa wéarmiayi. Jus. 24:1-28

⁷ Kame Jusuí iwiaaku pujumia nuiṉkia Israer shuarka Uunt Yusan umirkarmiayi. Núnisaṉ Jusuí jakamtaisha Israer shuara uuntri̱ Jusuiji̱a̱i̱ takakmasaru Uunt Yusa kakarmari̱ tí uunta nuna wáinkiaru Israer shuaran yáiṉtaj tusa pujuarmia nui̱sha Israer shuarka Uunt Yusan umirkarmiayi.

⁸ Nuuna uchirí̱ Jusuikia Uunt Yusa takarniúri̱ siantu tias uwí takaku jakamiayi.

⁹ Tura naintiar naintiar Eprain nuṉkanam Kaas nainnium arakaani̱ ní nuṉke̱ni̱ṉ Tímnat Seranam iwiarsarmiayi.

¹⁰ Núnisaṉ niji̱a̱i̱ pujuarmia nusha jákarmiayi. Nuyá̱ ukunam akiiniawarmia nuka Úunt Yusnasha enentáimtichu tura Israer shuaran itiur yaiṉkiarmia nunasha nékachu ármiayi.

Israer Uunt Yusan ikiukiar najanamu yusan tikishmátainiamu

¹¹ Tuma asa Israer shuar najanamu yusan Páaran tikishmátainiak Uunt Yus íimmianum ti yajauch túrawarmiayi.

¹² Nuna túruiniak ni aparí̱ Uunt Yusri̱n Ejiptunmaya̱ jí̱i̱kiarmia núnaka iniaisar niin ayaam matsamármia nuna najankamu yusri̱n tikishmátainiak Uunt Yusan akajkarmiayi.

¹³ Úunt Yusnaka iniaisar najankamu yusan Páaran tura Astarten tikishmátiarmiayi.

¹⁴ Nuna túruiniakui Uunt Yus Israer shuaran kajerkar ashí ni wariri̱ irunmia nuna kasarkarti tusa tsaṉkatak nu arantcha ni nemasri̱n suáwarmiayi. Túram nupetmaktinniasha peṉké tujintkiarmiayi.

¹⁵ Tura mesetan najanainiaksha Uunt Yus yaya̱chma ásar peṉké nupetmacharmiayi. Kame yaunchu Uunt Yus nekas túratniuitjiarme timia nuja̱i̱ métek itiurchatja̱i̱ tí waitkiasarmiayi.

Sumamtikin anaikiarma

¹⁶ Nuya̱ṉka Israer shuaran itiurchat awajiarmia nuyá̱ aṉkant awajsartinian sumamtikniun Uunt Yus anaitiukarmiayi.

¹⁷ Túrasha Uunt Yus akupkámu chichaman ni uuntri̱ umiriarmia núnisaṉ túrutsuk núnaka iniaisar nuya̱ṉka wárik kanakiármiayi. Tuma asar najankamu yusan tikishmátainiak tsanirma núniarmiayi. Túmainiak sumamtikniuncha peṉké anturkacharmiayi.

¹⁸ Kame Uunt Yuska sumamtikniun anaitiarmia núnaka Uunt Yus yáimiayi. Tuma asa urutmá tsawanta sumamtikin ajas pujuarmia nuja̱i̱ métek ni nemasri̱ya̱n aṉkant pujuarmiayi. Túrasha tí waitkiainiam útainiakuinkia Uunt Yuska waitnentiarmiayi.

¹⁹ Túmaitiat sumamtikin jakamtaikia ataksha áwakeasaṉ ni úuntri̱ji̱a̱i̱ṉkia naṉkaamas yajauchin túrawarmiayi. Tuma asar chíkich yusan enentáimtuiniak tikishmátiarmiayi. Túrasha yajauchin túriarmia nuya̱ṉka peṉké kanacharmiayi.

Israernum chíkich aents nupetkacharmatai ikiukmia

²⁰ Túmainiakui Uunt Yus Israer shuaran kajerak chicharainiak “Yaunchu atumí úuntri̱ji̱a̱i̱ umiktin chichaman najanawarmiaj nuna ju̱ aentska peṉké uminiatsui.

²¹ Wisha núnisnak Jusuí jaak uunt nuṉka mátsatkamu ikiukiarma núnaka jí̱i̱rnaka akuptúkchartatjai.

²² Warí ni uuntri̱ Winia umirtukarmia núnisaraṉ Israer shuar Winia umirtukartatuak núja̱i̱ṉchuka umirtukchartatuak nuna nú aentsja̱i̱ Israer shuaran nekapsartatjai.”

²³ Tuma asamtai uunt nuṉka mátsatkamu armia núnaka Uunt Yuska nu chichamaik mash ji̱i̱r akuptsuk nui̱ṉ ikiukiarmiayi. Núnisaṉ Jusuí amukat tusasha tsaṉkatkachmiayi.