Suma. 18 - Yus Papí: Shuarja̱i̱ Yus Yamaram Chicham Najanamu

Tan shuar Rais nuṉkan mamiknawarma

^1-10 Nu tsawantai̱kia Israernumka úunt akupin atsumiayi núnisaraṉ Tánnumia̱ shuarsha núṉke̱ncha ármiayi. Tuma asamtai Suranmaya̱n tura Estaurnumia̱n aents kakaram armia nuna nuṉka mamikmá ikiutárum tusar seṉku áishmaṉkan akupkarmiayi. Tura Eprain nainnium jeawar Mikiayása je̱e̱n Riwí shuar chichaamun anturkarmiayi. Nuya̱ṉka je̱a̱ waya̱war ju̱i̱sha warí pujuram tusar aniasarmiayi. Tutai “Wikia Mikiayása yusri̱n takarniuitjiai” takui̱ “ii wéajnia ju̱i̱sha ¿urukattajⁱ?” tiármiayi. Tutai Riwí shuarka chicharainiak “Werarmena nuka ashí umiktatrume” tiármiayi. Nuya̱ṉka wéar Rais péprunam jeawar mash nekararmiayi. Nu pépruka yúpichu chíkich péprunmaya̱sha arant tura chíkich aents armia núja̱i̱sha chichaska pujuchu armia nuna nekaawarmiayi. Núnisaṉ aentska warawarat tura tuke shiir enentáimias matsamin ármiayi. Tura nu aentska ataksha Suranam nuyá̱ Istaurnum waketkiar chichainiak “Werir jatékártai warí núṉkaka tí peṉkerchakait tura aentska yúpichu nupetkamnia áiniawai” tiármiayi.

Tánnumia̱ Riwí shuaran júkiarma

^11-26 Nuya̱ṉka Tánnumia̱ saisiantu aents mesetan iwiarnatkar Mikiayása je̱e̱n ataksha wéarmiayi. Je̱a̱ waya̱war ni yusri̱ nakumka kuít jiruja̱i̱ najanamun tura awaṉkémnasha tura ni je̱a̱ya̱ yusri̱ armia nunasha kasararmiayi. Tura Yúsnan pujurin Riwí shuar chicharainiak “¿Warí áitkiarum?” tiármiayi. Tutai nincha chicharainiak “Chikichik aents takarsatniuja̱i̱ṉkia chikichik iruntramu takarsatin nekaska timiá peṉkeraiti” tusar wakerumtikiar nincha júkiarmiayi. Túrasha Mikiayáska nuna nekáa niji̱a̱i̱ pujuarmia nuja̱i̱ Tan shuaran pataatukarmiayi. Tura Mikiayássha ti kajerkar chicharainiak “Winia yusru takarniúri̱sha tura winia yusur ainia nusha ¿urukamtai kasartururam?” tímiayi. Tutai Tan shuar chicharainiak “Iinkia tukartip máwa̱i̱j” tiármiayi. Nuyá̱ Mikiayáska suntar mesetan iwiarnatkaru ásarmatai peṉké itiurkachmin asa nekáa ni je̱e̱n waketkimiayi.

^27-29 Nuya̱ṉka Rais péprunam ashinkiar mesetan najatawar ashí aentsun kajeṉkar péprunka ekemákarmiayi. Setunnumia̱sha arant matsatainiak chíkich péprunmaya̱ aentsja̱i̱sha chichas pujuiniachu ásar yáiṉtincha atsuarmiayi. Raiska pakanan Pitrejúpnum tíjiu̱chiyayi. Nuya̱ṉka Tan shuarka yamaram péprun najanawar Tan anaikiarmiayi.

Najanamu yus awajaimiu

³⁰ Nuya̱ṉka Tan shuarka ní enentáimtutai̱n nakumkar najanamun awajaiyarmiayi. Tura Muisaisa tiraṉki̱ Jirsuna uchirí̱ Junatán ni uchirí̱ armia nuja̱i̱ achirar yajá yaruakma armia tímianai Tan shuarka yúsnan pujurin pujuarmiayi.

³¹ Nuna túruiniak Yus Shiir Awajtai̱ Je̱a̱ Sírunam amia nú tsawantinkia Tan shuarka Mikiayás nakumak najanamia nú yusan enentáimtuiniak awaja̱i̱ takusarmiayi.