Suma. 17 - Yus Papí: Shuarja̱i̱ Yus Yamaram Chicham Najanamu

Mikiayása yusri̱ enentáimtutai̱ je̱a̱

¹ Áishmaṉ ámiayi ni naari̱ Mikiayás. Nisha naintiar naintiar Eprain nuṉkanmaya̱uyayi.

² Tura nu áishmaṉ nukurí̱n chicharuk “Mir sian kuítian achirtámkarmatai wisha wajai̱n yajauchiniam yumiṉkiarturmame. Túrasha nekaata, nú kuitniakka wi achikmajai tuma asa winia uwejrui̱ awai” tímiayi. Tutai nukurí̱ chicharuk “Uchiru Uunt Yus péṉkernum yumiṉkramprati” tímiayi.

³ Nuya̱ṉka mir sian kuít awaṉtukim nukurí̱ chichaak “Ti arantúkmajai, páchitsuk winia uchirun enentáimtakum jú̱ kuitniaka Úunt Yusnan akankaitjiai. Núja̱i̱ṉkia kuít jiru unuikiar tura nakumkar najanamu yus najanatniuiti. Tuma asamtai yamaikia awaṉtajme” tímiayi.

⁴ Túrasha nú kuitniaka nukurí̱n awaṉtukmiayi. Túram ni nukurí̱ tusiantu kuítian achik jiru unuiktinian unuimiátran susamiayi. Nuya̱ṉka ántar yusan nakumak kuít jiru unuikmaja̱i̱ najana Mikiayása je̱e̱n ikiusmiayi.

⁵ Núnisaṉ Mikiayáska ni yusri̱ ainia nu enentáimtutai̱ je̱a̱ncha takakuyayi. Tura ni yusri̱ ainia nu pujurin entsatái̱n awaṉkencha núnisaṉ je̱a̱ya̱ yusnasha najanmamtikiamiayi. Nuna tura ní uchirí̱niak najankamu yúsrun takarin atí tusa anaikiamiayi.

⁶ Kame nu tsawantinkia Israer shuarnumka úunt akupin atsá asamtai aṉkant aṉkant ni wakeramun péṉkeraiti tu enentáimiarmia núnisar túriarmiayi.

⁷ Kame Jutá nuṉkanmaya̱ Piriṉnumia̱ natsa Riwí shuar írar nui̱ pujumiayi.

⁸ Nu áishmaṉsha Jutá nuṉkanmaya̱ Piriṉnumia̱ṉka jiinkí̱ ni pujustintri̱n e̱a̱k naintiar naintiar Eprain nuṉkanmaani̱ wémiayi. Tura naintiar naintiar Eprain nuṉkanam wekas Mikiayása je̱e̱n jeamiayi.

⁹ Nuya̱ṉka Mikiayás anintrak “¿Tuyá̱ winiam?” tutai nisha aya̱k “Jutá nuṉkanmaya̱ Piriṉnumia̱ winiajai tura wikia Riwí shuaraitjiai. Túmaitiatan winia pujustintrun e̱a̱kun wekaajai” tímiayi.

¹⁰ Tutai Mikiayás chicharuk “Nui̱kia ju̱i̱ wiji̱a̱i̱ pujusta tura winia aparuá núnis ajasta túram winia yusur ainia nuna takarin atá. Kame ashí uwitin tias kuítian akitjiame tura yurumkancha pushincha amattajai” tutai waya̱miayi.

¹¹ Nuya̱ṉka nisha shiir enentáimias “ayu” ti Mikiayása je̱e̱n juákmiayi. Túruna ni uchirí̱ya núnis ajasmiayi.

¹² Tura Mikiayáska Riwí shuaran Yusna takarkur entsatai̱ pushin áentsramiayi. Túram Mikiayása yusri̱ ainia nuna takarin ajasmiayi. Túruna Mikiayása je̱e̱n pujusmiayi.

¹³ Nuiṉkia Mikiayássha enentáimias “Yamaikia nékajai, Uunt Yus shiir awajtak núkap surustatui. Warí Riwí shuar winia yusur áiniana nuna takarin ajaschaik” tímiayi.