Suma. 16 - Yus Papí: Shuarja̱i̱ Yus Yamaram Chicham Najanamu

Sansun unuukamu

^1-3 Chíkich tsawantai̱ Sansun Kaasa péprunam we yajauch nuwa̱ja̱i̱ kanarmiayi. Nuya̱ṉka Káasanmaya̱ aents nuna nekaawar je̱a̱ṉka téntakar pepru wá̱i̱ti̱a̱i̱ri̱ncha nákararmiayi. Kashi asamtai tsawa̱a̱kui jatektai tusar ú̱mprukar nákasarmiayi. Túmainiai̱ Sansunka kashi nantaki̱ wéak pepru wá̱i̱ti̱a̱i̱ri̱nkia ukuiniar takamtsuk jukí̱ naint Eprunnumaani̱ íimiak ana nui̱ iwiakmiayi.

^4-5 Nuna ukunam Sansun Jiristíanmaya̱ nuwa̱n Sureknumia̱n Tariran anajmarmiayi. Nuya̱ṉka pepru uuntri̱ armia nu Tariran weriar chicharainiak “Uruku asá timiá kakarmait tura itiurá nupetkamniait nusha nekarata. Túrawakminkia úuntri̱ti chikichik chikichik mir sian kuit amasártatji” tiármiayi.

^6-9 Tutai Tarira Sansunan chicharuk “¿Urukamtai timiasha kakarmaitiam ujatkata?” tímiayi. Tutai nisha chichaak “Siati chapik yamarmaja̱i̱ jiṉkiatáwarmataiṉkia kakarmachu ajastatjai” tímiayi. Takui̱ Jiristíanmaya̱ aents chapikian ikiatkarmiayi. Túrawarmatai Tarira Sansuna jiṉkiar chichareak “Jiristíanmaya̱ aents mantamatai tusar winitrámainiawai” tímiayi. Tutai Sansunka yúpichu chapiknaka tsuriar ayamprumakmiayi.

^10-14 Túramtai Tariraka Sansunan tí kajerkámiayi. Tura ataksha chichareak “¿Tui̱ kakarmarmesha aa?” tímiayi. Tutai ataksha chichaak “Chapik yamarmaja̱i̱ jiṉkiatáwakminkia kakarmarka meṉkakattawai” tímiayi. Takui̱ chapik yamarmaja̱i̱ jiṉkiá ataksha chichareak “Jiristíanmaya̱ aents winitrámainiawai” tutai ataksha chapiknaka tsuriar ayamprumakmiayi. Nuyá̱ Tarira natsa̱a̱r kajerak chichareak “Urukakmea timiasha kakarmaitiam” tusa ataksha aniasmiayi. Tutai nisha “Intiashur chapikmarma siatia nu mamushja̱i̱ chapikmaram mámush numi tsupikmanum jiṉkiam nuṉká akunáwakminkia kakarmarka meṉkakainti” tímiayi. Tura Sansun kanarmatai ni timia nuna mash tura Jiristíanmaya̱ aents winitrámainiawai tutai mash tsuriar nantaki̱ ataksha ayamprumakmiayi.

^15-17 Túramtai Tariraka kajek “Anentachu asam wíji̱a̱i̱ṉkia áyatik nakurame. Anaṉkrakum tusa urukakmea timiá kakarmaitiam ujatkai” tusa tuke tsawant itit awajmiayi. Tíitram yajauch jakamnia nekapmiayi. Nuya̱ṉka Sansun tíitram chichareak “Intiashur tsupirturakmiṉkia náṉkamas aentsua núnisnak kakarmachu ajasaintjiai” tímiayi.

¹⁸ Tarira nuna nekáa Jiristíanmaya̱ aentsu chichama akuptuiniak “Pai yamaikia winitiárum” tímiayi. Sureknumia̱ uuntri̱ armia nuka wininiak kuítian akiktatji tiarmia nuna ikiatkarmiayi.

¹⁹ Kame Tariraka Sansunan ni makui̱n muuke̱n awantás ikianar áishmaṉkan untsukmiayi. Túram tariar ni intiashi̱ siati chapikmarman tsupirar kesá kesá piniu awajsarmiayi. Nuya̱ṉka ni kakarmari̱ ikiukin asamtai ní nua̱ri̱ṉ wáitkiatan juárkimiayi.

²⁰ Túrawarmatai Tarira Sansunan chicharuk “¡Jiristíu aents winitrámainiawai!” tímiayi. Tutai Sansun mesekranmaya̱ shintiar enentáimiá ájasaṉ “Yaunchu uruk wémaj nútiksan jíinkin pisartatjai” tu enentáimsamiayi. Túrasha Uunt Yus ikiukmia núnaka nekamachu asa tu enentáimsamiayi.

²¹ Túrunamtai Jiristíu aents Sansunan achikiar ji̱ ukuitrar Kaasa péprunam júkiarmiayi. Túrawar yaṉkú jiruja̱i̱ jiṉkiawar neketai̱niam takakmasat tusar sepunam apujsarmiayi.

²² Tura kesá kesá piniu awajsámaitiat ataksha intiashru térmiayi.

Sansun yapajmiák jakamu

²³ Túrasha Jiristíu aentsu uuntri̱ armia nu ni yusri̱ Takunan áestuawar wararsatai tusar iruntrarmiayi. Túrawar chichainiak “Ii yusri̱ ii nemasri̱ Sansunan ii uwejé̱n íkturmasji” tiármiayi.

²⁴ Tura ashí aents Sansunan wáinkiar ni yusri̱n shiir enentáimtuiniak “Ii nuṉke̱n émeseak ii aentsun untsurín kajeṉkárua nuna ii nemasri̱ Sansunan ii yusri̱ ii uwejé̱n íkturmasji” tiármiayi.

²⁵ Kame ti warasar pujuinia ásar “Sansun ji̱i̱ki̱ itiatárum wíshikiakur warasarmi” tiármiayi. Tuíniakui Sansunan sepunmaya̱ ji̱i̱ki̱ itiar najankamu yusa je̱e̱ pauri̱ ukuamunam ajapén awajsarmiayi. Nui̱ wajakui̱ aents wishikiarmiayi.

²⁶ Tura natsa nin eṉkeki̱ jumia nuna Sansun chicharuk “Uunt je̱a̱ pauri̱i̱n achimsa wajastaj achimtikrukta” tímiayi.

²⁷ Nu je̱a̱nmaṉka ti untsurí áishmaṉsha tura nuwa̱sha piak matsamármiayi. Tura Jiristíanmaya̱ aentsu uuntri̱ armia nusha ashí matsamármiayi. Tura yakiṉkia menaintiú mir aents áishmaṉja̱i̱ nuwa̱imiak Sansun wishikiainiamun iyaak pujuarmiayi.

²⁸ Tura Sansun Uunt Yusan kakantar seak “Winia Uunt Yusru, waitneasam enentáimtursata. Jiristíanmaya̱ aents ji̱ru ukuitruraru ásarmatai ji̱ruí̱ yapajmiáktaj Yusru jú̱chik kakarmaram surusta tusan seajme” tímiayi.

²⁹ Nuna ti Sansun uunt je̱a̱ ajapén ukuamuri̱n takas iis chíkich pauri̱ṉkia untsuuri̱ji̱a̱i̱ tura chikichniaka menaari̱ji̱a̱i̱ achik wajas

³⁰ chichaak “Wiji̱a̱i̱ métek Jiristíutirmesha jakatarum” ti jú̱u̱ kakantraṉ shitiá uunt je̱a̱n yumpuaruk Jiristíanmaya̱ aentsnaka úuntri̱ntiuk aents nui̱ pujuarmia nunasha ashí amukmiayi. Tura iwiaaku pujus kajeṉkármia nuja̱i̱ naṉkaamas nekaska nu tsawantin kajeṉkármiayi.

³¹ Nuní̱ turuna jakamtai ni shuari̱sha ni yachi̱sha Sansuna aya̱shi̱n jusatai tusar tariarmiayi. Tura júkiar Suraja̱i̱ Estaurnum ajapén ni aparí̱ Manua iwiarsamunmaṉ iwiarsarmiayi. Kame Sansunka painti uwí Israer shuaran sumamtikin pujusmiayi.