Suma. 15 - Yus Papí: Shuarja̱i̱ Yus Yamaram Chicham Najanamu

Tímnatnumia̱ aentsun Sansun yapajkiarma

^1-5 Trikiu jú̱u̱ktin tsawant jeamunam chipiu uchichin jukí̱ Sansuna nua̱ri̱n íistaj tusa Tímnatnum wémiayi. Túrasha we̱a̱rí̱ chicharuk “Yamaikia chíkich áishmaṉ nuatkaiti tuma asamtai íischamniaitme antsu chíkich nawantur nuna uchichia nuna amastájai” tímiayi. Nuya̱ṉka Sansun tí kajek “Jiristíu aentsnaka nekas itiurchat awajsartatjai” tímiayi. Nuya̱ṉka traisiantu ku̱janchman achik jímiar jímiar apatkar jiṉkiak ji akaamun ujuknum jiṉkiatak Jiristíu aentsu arakri̱ irunmia nuní̱ akupkámiayi. Túram trikiu nuyá̱ uwa ántsaṉ uriwiu arakmaanash ashí áestukarmiayi.

^6-8 Túrunamtai Jiristíanmaya̱ aentska ya emesmakuit tusar péṉker anintrúsar Sansun nuwé̱ surutkamu asa tura nuna nekaawarmiayi. Nuya̱ṉka Sansuna we̱a̱rí̱ je̱e̱n weriar Sansuna we̱a̱rí̱ncha tura emka nuwe̱ncha mantuawar ekemákarmiayi. Tura Sansunka núna nukap kajek Jiristíanmaya̱ aentsnaka ataksha núna nukap kajeṉmiayi. Núnisaṉ ashí yapajmiákan umiimiam peṉké iniaisachartatjai tímiayi. Nuna tura ikiuak Etamnum kayá wa̱a̱ amia nui̱ pujuumiayi.

Mir Jiristíun Sansun Réjiniam máwarma

^9-13 Nuya̱ṉka Jiristíanmaya̱ aentska Jutanam káunkar matsamtúkar Rejia tímianai jeakarmiayi. Túrunawarmatai Jutanmaya̱ shuar anintruiniak “¿Urukamtai mániktai tusarmesha kaunkarum?” tiármiayi. Tutai nisha chichainiak “Ni túraya nuja̱i̱ métek asutiátai tusar Sansun achiktai tusa taarji” tiármiayi. Nuya̱ṉka Jutanmaya̱ menaintiú mir shuar nuna ujaktai tusar Etamnum kayá wa̱a̱nam pujá asamtai Sansunan weriarmiayi. Tura chicharainiak “Jiṉkiarar jukir Jiristíu aentsnum suruktatji túrasha matka máshtatji” tiármiayi. Tiar jimiará chapik yamarmaja̱i̱ jiṉkiawar júkiarmiayi.

^14-16 Tura Réjiniam jeawarmatai Jiristíanmaya̱ aentska Sansunka jukitiai tusar winisár warainiak charaatum ajarmiayi. Túmainiai̱ aya aneachma Uunt Yusa Wakaní̱ kakarmari̱ Sansunan tarurmiayi. Túrunamtai chapiknaka tsuriar umpuru jaṉké̱ tepan wainiak nuja̱i̱ Jiristíanmaya̱ mir aentsun mámiayi. Nuya̱ṉka chichaak “Umpuru jaṉke̱ja̱i̱ Jiristíanmaya̱ aentsun umpurua nútiksaran kajeṉkárjai” tímiayi.

^17-20 Chichasua umik Sansun umpuru jaṉke̱nka ajapa iniais “Yusan seak Yusru kitiakrui̱ jakattajai” tímiayi. Takui̱ nuya̱ṉka Yus nuṉkaya̱n entsan jí̱i̱kmiayi túrunamtai nuna umar Sansun ataksha kaka̱a̱rmiayi. Sansun painti uwí Israer shuara sumamtikin pujusmiayi.