Suma. 14 - Yus Papí: Shuarja̱i̱ Yus Yamaram Chicham Najanamu

Sansun nuateamu

¹ Nuya̱ṉka Sansun Tímnat péprunam wémiayi. Tura nui̱ Tímnatnumia̱ nuwa̱n Jiristíanmaya̱ aentsu nawantri̱n wainkiamiayi.

² Tura waketki̱ ni aparí̱n tura nukurí̱ncha ujaak “Tímnatnumia̱ nuwa̱n Jiristíu nawantri̱n wainkiajai. Wats yamaikia sumartukta nuatkatjai” tímiayi.

³ Túrasha ni aparí̱ tura nukurí̱sha chicharainiak “¿Amé aentsu nawantri̱nkia tura íi pepruri̱ṉkia núwa̱ka atsawak. Jiristíu tsupirnakcha Naṉ. 17:10-14 aentsu nawantri̱ nuattinia?” Tútaisha Sansun ni aparí̱n chicharuk “Yamaikia sumartuktarum warí wikia nin wakerajai” tímiayi.

⁴ Kame aparí̱sha núnisaṉ nukurí̱sha Jiristíanmaya̱ aentsun itiurkesha emeskattsa Uunt Yus túrimia núnaka nékacharmiayi. Nu tsawantinkia Israer shuarnaka Jiristíu aents nupetak pujuriarmiayi.

⁵ Nuya̱ṉka Sansun ni aparí̱ji̱a̱i̱ tura nukurí̱ji̱a̱i̱ Tímnatnum wéarmiayi. Tura wésar Tímnata uwa ajarí̱n jeawaru ai̱ aya aneachma úunt ya̱wa̱ uchirí̱ júruur ajakí̱ winitmiayi.

⁶ Tumai̱ Sansunan Uunt Yusa Wakaní̱ kakarmari̱ tarurmiayi. Túram warinkisha takakchiat chipiu uchichia nútikias úunt ya̱wa̱n achia̱rmiayi. Túrasha ni túramia núnaka ni aparí̱ncha tura nukurí̱ncha ujakchamiayi.

⁷ Nuya̱ṉka Tímnatnum we nuwa̱n áujsamiayi tura nuwa̱sha Sansunan wakerukmiayi.

^8-9 Tura ishichik tsawant naṉkaamasu ai̱ Sansun nuatkattsa waketas úunt ya̱wa̱n maa áepkimia nuna iyumiayi. Tura nui̱ chini nerean wainiak ashí míshkiri̱n umarmiayi. Tura aparí̱n amainiá̱ṉkar nincha ajamsarmiayi túrasha tuya̱na ashiin núnaka ujakcharmiayi.

^10-13 Nuatma namper nájanmanum niji̱a̱i̱ tsaniṉkiar iniaṉkasarat tusar traintia áishmaṉkan itiariármiayi. Tura Sansun nu áishmaṉka chicharainiak “Námper siati tsawant átatna nui̱ nekaatniun wi títiatjana nu nekaachrumka traintia pushí riniu tí peṉker iwiarkar najanamu tura traintia pushí tí peṉkeran nampernum entsatai̱ sumakrum surustatrume tura nekaawakrumni̱ṉkia antsu nuiṉkia wi atumín nuna amastatjarme” tiármiayi Sansun.

^14-20 Tura Sansunka nú nekaatniun áishmaṉkan ujakármiayi. Túrasha nekaatniun tujintkiar Sansunka nuwe̱n chicharainak “Nú nekaatniusha ¿warinia taa? nu etserchakmeka ámeka amé shuarja̱i̱ takamtsuk ekemánkattame” tiármiayi. Tutai nuwa̱ Sansunan chichareak “¿Warí tusamea tame nuka urukamtai wíniaka ujattsum?” tímiayi. Tutai nisha chichaak “Winia aparnasha ujakcharuitjiai túmaitiatnak ¿aminkik ujaktatjam?” tímiayi. Tutai nampertinkia ashí tsawant útas pujusmiayi túmakui̱ amúamu tsawantin ujakmiayi. Tura nisha núnisaṉ nu áishmaṉkan ujakármiayi. Tura nu áishmaṉsha Sansunan ujakármiayi. Nuna nekaawarmatai tura nincha ni nua̱rí̱ ujakárman nekáa asa nuya̱ṉka traintia aentsun maa nuna pushiri̱n atantrar nampernum pujuarmia nu áishmaṉkan súsarmiayi. Nuya̱ṉka kajek aparí̱i̱n waketkimiayi túramtai Sansuna nua̱ri̱nkia chíkich áishmaṉ nui̱ pujumia nuna súsarmiayi.