Suma. 13 - Yus Papí: Shuarja̱i̱ Yus Yamaram Chicham Najanamu

Sansun akiinma

¹ Uunt Yus iismasha nu arant Israer shuarka tunaan túruki̱ wénakui Uunt Yus kuaraintia uwí Jiristíu aentsun íktus iniaisarmiayi.

² Kame Tan shuarnumia̱ Manua náartin Suranmaya̱ pujumiayi. Tura ni nuwe̱sha kaa asa uchin peṉké takuchuyayi.

³ Tura Yusa suntari̱ nu nuwa̱n wantintiuk chicharuk “Amesha kaa asam uchi peṉké takuchuitme túrasha yamaikia ajaprukam uchi takustatme.

⁴ Tuma asam yamaikia íimiasta. Wíniusha tura awartiusha umaraip. Núnisaṉ imiatkímpra ainia nusha yuáwaraip.

⁵ Kame nekaata ajaprukam uchi takustatme túrasha ni intiashí̱ṉkia tsupirnarchattawai. Warí nukurí̱n init eṉketuk nasaréu Yusai̱ akantúkma átatui. Tuma asa Jiristíu aentsnumia̱ṉka Israer shuarnaka aṉkant awajsartinian naṉkamattui” tímiayi.

^6-8 Kame Manua nua̱ri̱nkia Yusa suntari̱ chichareak “Uchi takustatme tura anearam yurumáta” timiai nuna ni áishri̱n ujakmiayi. Nuya̱ṉka Manua Yusan seak “Yusa suntari̱ tana nu uminkiati tura ataksha Yusa suntari̱ akupkata ii uchirí̱ itiur tsakatmartataj nuna jintintramatai” tu seamiayi.

^9-16 Nuyá̱ Manua nua̱rí̱ ajanam takakmá pujan ataksha Yusa suntari̱ tarimiayi. Túrunamtai Manuan werí Yusa suntari̱ji̱a̱i̱ chichasat tusa untsukmiayi. Nuya̱ṉka “Uchi itiur tsakatmartataj nu jintinkiartuata” tímiayi. Tutai Yusa suntari̱ Manua nua̱ri̱n “Emka timia nunak ataksha taku ame núwemka úmaksha tura yurumkusha aneartiniaiti” tímiayi. Tura Manua Yusa suntarí̱n chicharuk “Yurumkan iniarmam nákarsata” támaitiat Yusa suntari̱ chichaak “Wíniaka nuka surutsuk antsu Uunt Yus takamtsuk áestuatarum” tímiayi.

¹⁷ Tura Manuaka Uunt Yusa suntarí̱n aníak “Ame támena nu uminkiamtai ame shiir awajsámi ¿ame náarmesha yait?”

¹⁸ Tutai Uunt Yusa suntari̱ aya̱k “¿Urukamtai winia naarsha nekaattsam wakeram? Winia naarka nekaachminiaiti” tímiayi.

¹⁹ Takui̱ Manuaka chipiu matsatmanumia̱n chikichkiniak uchichin achik tura ni arakri̱ncha kayanam awa̱s Uunt Yusan áestuamiayi. Nuna túramtai Manua ni nuwe̱ja̱i̱ imiá wajainiai̱ṉ Uunt Yusa suntari̱ nekaachminian iniaktusarmiayi.

²⁰ Kame áestutai̱nmaya̱ ji keek nayaimpinmaani̱ wakkui Uunt Yusa suntari̱ṉkia nui̱ ajapén pachinia nisha imiá wajainiamunam wakamiayi. Manua ni nuwe̱ja̱i̱ nu túman wáinkiar tikishmar tsuntsumawar nijia̱i̱ji̱a̱i̱ nuṉkan antiṉ pujusármiayi.

²¹ Nuya̱ṉka Uunt Yusa suntari̱ṉkia Manuanka tura ni nuwe̱ncha peṉké wantintiukcharmiayi. Túrunamtai nú aishmaṉka Uunt Yusa suntarí̱ya nuna Manua nekamiayi.

²² Nuyá̱ Manua ni nuwe̱n chicharuk “Yus wainkia asar nekas jakattaji” tímiayi.

²³ Tutai nuwe̱ áishri̱n aya̱k “Uunt Yus iin mantamataj tákuṉka ii súamuncha tura chipiu takamtsuk áestamuncha shiir enentáimtuscha̱a̱yi. Tura ii wáinkiajnia ju̱nasha iniakturmascha̱a̱ji. Núnisaṉ ju̱ túrunatniuncha ujatmákcha̱a̱ji” tímiayi.

²⁴ Nuyá̱ nuwa̱sha uchin takus Sansun anaikiamiayi. Tura uchi tsakaki̱ wéakui Uunt Yus shiir awajsámiayi.

²⁵ Tura Suraja̱i̱ Estaura ajapéri̱n Sansunai̱ni̱ Yusa Wakaní̱ Tan matsatkamunam iniaktutaṉ naṉkamamiayi.