Suma. 11 - Yus Papí: Shuarja̱i̱ Yus Yamaram Chicham Najanamu

Israera sumamtikin Jeptí

¹ Jeptikia Karaatnumia̱ aents mesetan unuimiátra ti kakarmauyayi. Nisha tsanirmatai nuwa̱ uchirí̱ tura aparí̱ṉkia Karaatauyayi.

² Tura Karaata nua̱ri̱sha uchin takusarmiayi. Nuya̱ṉka tsakarár Jeptin ji̱i̱ki̱ akupáiniak chicharainiak “Ámeka ii aparí̱ amastinia nuya̱ṉka achikchattame. Warí ámeka chíkich nuwa̱nmaya̱itme” tiármiayi.

³ Tutai Jeptikia ni yachí̱ armia nuyá̱ pisarmiayi túruna Tup nuṉkanam pujusmiayi. Nui̱ naki aents matsamármia nuja̱i̱ Jeptikia iruntrar wekasarmiayi.

⁴ Nu túruna ai̱ Amun aents Israer shuarja̱i̱ mesetan najanawarmiayi.

⁵ Amun aents Israer shuarja̱i̱ mesetan najanawarmia nui̱ Karaatnumia̱ uunt armia nuka Jeptí itiatai tusar Tup nuṉkanmaya̱ weriarmiayi.

⁶ Tura Jeptin chicharainiak “Wetái ame ii uuntri̱ aminiam túram Amun aentsja̱i̱ mánaikminiam” tiármiayi.

⁷ Tura Karaatnumia̱ uunt armia nuna Jeptí chicharainiak “Átumchak winia aparu je̱e̱ya̱ nakitrurum ji̱i̱ki̱ akuptúkmarum. ¿Urukamtai yamaikia itiurchat pujakrumsha winia tarutniuram?” tímiayi.

^8-27 Jeptikia kakaram asamtai “Amun aentsja̱i̱ mánaikiarmi tusar ii uuntri̱ atá” Israer shuar tiármiayi. Tutai nisha “Ayu” tímiayi. Nuya̱ṉka Amun aentsu akupniúri̱n papin akuptak ¿urukamtai iiji̱a̱i̱ mániatniusha wakeram? tu áatramiayi. Tutai nisha áimiuk “Israer shuarka Ejiptunmaya̱ winisar ii nuṉke̱n atantramkiaruitji tuma asamtai nuṉka awaiṉkik tusar wakeraji” tímiayi. Nuyá̱ ataksha Jeptí akupniun papí áateak “Ejiptunmaya̱sha tímiaja̱i̱sha itiur táaruit nuna mash ujakmiayi. Tura akupniun chichareak ‘Israer shuarka Muap aentsu nuṉke̱ncha tura Amun aentsu nuṉke̱ncha ata̱i̱charuiti antsu áyatik nuní̱ naṉkaamaktin tsaṉkatrukta’ tusar seawarmiayi túrasha nuní̱ naṉkaamaktinian tsaṉkatkacharmiayi. Núnisaṉ Amur aentsu akupniúri̱ Sejunnasha seawarmiayi túrasha naṉkaamaktia tútsuk Israera shuari̱n mesetan najatawarmiayi. Túrasha Yus nupetmamtikiak nu nuṉkancha súsarmiayi. Túrasha yamaikia traisiantu uwí naṉkaamasai̱ kame ¿urukamtai nuka yaunchu tíchaitrum?” Jeptí Amun aentsu akupniúri̱n tímiayi.

^28-40 Túrasha Amun aentsu akupniúri̱ṉkia Jeptí timia núnaka peṉké antukchamiayi. Nuya̱ṉka Jeptí Yusan seak “Mesetnumia̱ nupetmaka winiái̱ je̱a̱ruí̱ya̱ winia iṉkiunkattsa niiya̱ jiinkimia nuka Uunt Yusna átatui tuma asamtai takamtsuk áestuattajai” tímiayi. Nuna ti ikiuak suntari̱n yaruak Amun aentsja̱i̱ mániktaj tusa wémiayi. Nuya̱ṉka waketki̱ winis ni nawantri̱ chikichik amia nu ni je̱e̱ya̱ jiinkí̱ nin iṉkiuṉtaj tusa winian wainkiamiayi. Tura winia je̱a̱ruí̱ya̱ jiinkí̱ iṉkiunkattsa winian wainkiaṉka Uunt Yusan takamtsuk áestuattajai tiniu asa Jeptikia tí kuntuts enentáimpramiayi. Nuyá̱ nuwa̱chikia ni amikri̱ nuwa̱ armia nuja̱i̱ ashinkiar nuatnakchatniuapitjia tusa jimiará nantu útas wekasamiayi. Tura jimiará nantun iniaṉkas támatai Jeptikia chichaak “Uunt Yusá Áminiu atí tímiajna núnaka yamái umikjiai” tímiayi. Tuma asamtai Israer shuarnum nuwa̱ natsach ainia nuka chikichík uwitin kuatru tsawant Jeptí nawantri̱n enentáimtin áiniawai.