Suma. 10 - Yus Papí: Shuarja̱i̱ Yus Yamaram Chicham Najanamu

Israera sumamtikin Tuura

¹ Nuyá̱ Awimirík jakamtai Isakár shuarnumia̱ Tutú tiraṉki̱ Juá uchirí̱ Tuura Israer shuaran uwemtikran aṉkant awajsataj tusa náamprukmiayi. Niṉkia Samirnum naintiar naintiar Eprain nuṉkanmaani̱ pujuyayi.

² Tura paintitráis uwí Israer shuaran sumamtikin pujus sumamtikmiayi. Nuyá̱ jakamtai Samirnum iwiarsarmiayi.

Israera sumamtikin Jair

³ Nuyá̱ Tuura jakamtai Karaatnumia̱ aents Jair sumamtikin ajasmiayi. Nisha paintitús uwí Israer shuarnum sumamtikin pujusmiayi.

⁴ Kame nú aishmaṉka traintia uchin yajutmakuyayi tura nusha traintia umpurunam ashí ekemin ármiayi núnisaṉ aṉkant aṉkant péprurtin ármiayi. Tura núnaka yamaiya̱ ju̱i̱sha Jair tuke tuíniawai. Nuka Karaat nuṉkanmaiti.

⁵ Nuyá̱ Jairsha jakamiayi. Jakamtai Kamun nuṉkanam iwiarsarmiayi.

Amun aents Israer shuaran waitkiamu

⁶ Túrasha Israer shuarka Paarja̱i̱ Astarten enentáimtuiniak Uunt Yus íismaka ti yajauchin túrawarmiayi. Túmainiak Sírianmaya̱n Setunnumia̱n Muápnumia̱ncha Jiristíanmaya̱ncha nuyá̱ Amun aentsu yusri̱ áiniana nuna enentáimtuiniak Uunt Yus enentáimtustinniaka peṉké kajinmatkiarmiayi.

⁷ Nuna túruiniakui Uunt Yus Israer shuaran ti kajerak Jiristíu tura Amun aentsun íktus iniaisarmiayi.

⁸ Túramu asa nu tsawantinkia Jurtan entsa amaini̱ Amur aentsu nuṉke̱n Karaat nuṉkanam Israer shuar matsamármia núnaka Amur aents asutíniak tiasiúchu uwí wáitkiasarmiayi.

⁹ Tura Jurtan entsa amaini̱ Jutá nuyá̱ Piṉjiamín tura Eprain aents matsamármia nuja̱i̱ Amun aents mániatai tusar katitrarmiayi. Nuna túruiniak Israer shuarnaka tí waitkiasarmiayi.

¹⁰ Títruiniam Israer shuarka Uunt Yusan seainiak “Nekaska Ame enentáimtutsuk Paar enentáimtakur Amiincha ii Yusri̱ya tunáa túraitji” tiármiayi.

¹¹ Núnis tuíniakui Uunt Yus Israer shuaran aya̱k “Atumsha Ejiptu aents tura Amurnumia̱sha Amunnumia̱sha Jiristíanmaya̱sha

¹² tura Setunnumia̱sha Amaríknumia̱sha nuyá̱ Maun aents wáitkiasma pujusrum seatkurmin Wi atumín ¿aṉkant awajsachmakjarum?

¹³ Túramaitiatrum Wíniaka iniaitiusrum ántar yus enentáimtusu asakrumin Wikia yamaikia nu arantka yáiṉchattajrume.

¹⁴ ¡Kame waitsa pujakrumka átum enentáimtamu áiniana nu yus werirum seatarum! Nu yaintmaktarum” tímiayi.

¹⁵ Nu tutai Israer shuar Uunt Yusan chicharainiak “Nekas tunáa túraitji. Túrasha Ame iin ¿warí itiurtámkattsamea wakeram? Nuja̱i̱ métek túrata. Túrasha ju̱ tsawantini̱ṉ waitneasam yáiṉkratkam aṉkant awajkartusta” tiármiayi.

¹⁶ Nuna tiar Israer shuarka chíkich yusan enentáimtiarmia núnaka utsaṉkar Uunt Yusan enentáimtusarmiayi. Túrawarmatai Uunt Yus Israer shuaran wáitiamuri̱n peṉké katsuntrachmin nekapeak ataksha waitnentar yáiṉkiarmiayi.

¹⁷ Túramtai Amun aentska ujanairar Karaat nuṉkanam matsamkarmiayi. Núnisaṉ Israer shuarsha Míspanam matsamkarmiayi.

¹⁸ Kame Karaat nuṉka uuntri̱ armia nu iruntrar nuamtak chichainiak “¿Ya mesetan Amun aentsja̱i̱ naṉkamatta? nuka Karaat shuara uuntri̱ ajasti” tunaiyarmiayi.