Suma. 1 - Yus Papí: Shuarja̱i̱ Yus Yamaram Chicham Najanamu

Israer shuar Kanaannum matsamkarma

^1-8 Kame Jusuikia jaka asamtai Kanaan aentsja̱i̱ mániatniuncha yamaisha yaki émtukat tusar Uunt Yusan aniasarmiayi. Tuíniakui Jutá shuar émtukartatui tutai Jutá shuarka iiji̱a̱i̱ jimiartukarmi tusar Semiun shuaran ipiaawarmiayi. Nuya̱ṉka Jutá Semiun shuarja̱i̱ tsaniṉkiar Kanaan tura Píris aentsja̱i̱ mánainiak nupetkar tias mir aentsun Pisiknium máwarmiayi. Antsu Jerusaréṉ péprunka ekemátkarmiayi. Kame Atuni Pisikkia yaunchu sataintia akupniun túramia nui̱ Uunt Yus nincha nútiksaṉ asutmia nuna nekamiayi. Túrasha úunt akupin Atuni Pisikkia achikiar Jerusaréṉnum jukimiu nui̱ jakamiayi.

^9-15 Nuya̱ṉka Jutá shuarka Kanaan aents naintiar naintiar Nekep nuṉkanam tura pakanam matsamármia nuja̱i̱ mánaitian naṉkamawarmiayi. Núnisaṉ Eprun, Sesai, Ajimián tura Tarmai pépruncha mesetan najatawarmiayi. Nuya̱ṉka Tiwir péprun mesetan najatainiak Karep chichaak “Ju̱ péprun nupetkanka winia nawantrun Áksan susattajai” tímiayi. Tura ni kaná uchirí̱ Utuniár nupetmaku asa nuna nuatkamiayi. Nuya̱ṉka chíkich tsawantai̱ Aksa yumirmat seam ni aparí̱ Karep susamiayi.

^16-21 Tura Muisaisa we̱a̱rí̱ shuarka kampuntin atsú Jutá nuṉkanam pujusártai tusar Jutá shuarja̱i̱ ashinkiarmiayi. Nuya̱ṉka Jutá shuarka Semiun shuarja̱i̱ Kanaan aents Sepatnum pujuinian mesetan najatawar pépruri̱nkia emestukarmiayi. Núnisaṉ Kaasa pépruncha, Askarúnnasha tura Ikrunnasha atá̱i̱ nérentin ajasármiayi. Kame Uunt Yuska yaya̱maitiataṉ aents pakanam matsamármia núnaka karu jiruja̱i̱ najankamun takarainia ásarmatai nupetkacharmiayi. Tura Karepnaka yaunchu Muisais timia nútiksaraṉ Eprun péprun súsarmiayi. Túrasha Piṉjiamín shuarka Jípius aents Jerusaréṉnum matsamármia nuna jí̱i̱rtinniaka tujintkiarmiayi.

^22-26 Nuya̱ṉka Jusé shuarka Pitir péprun mesetan najatawarmiayi. Tura áishmaṉ péprunmaya̱ jíiniun achikiármiayi tura chicharainiak “Ju̱ péprunam waya̱tin yáimkiakminkia máshtatji” tiármiayi. Nuya̱ṉka péprunam waya̱war ashí kajeṉkarmiayi antsu áishmaṉ yaiṉkiarmiania núnaka shuári̱ntiuk mácharmiayi. Tura nu áishmaṉka Jet aentsu nuṉke̱n we péprun najana Tsáapnin anaikiamiayi.

^27-36 Túrasha Manasés shuarka Kanaan aents Pitseannum Tanaknum Túrnum Ipriamnum Mikitiu tura nui̱ tíjiu̱ch matsamármia nunasha jí̱i̱rtinian tujintkiarmiayi. Antsu Israer shuar kakaram ajasárka Kanaan aentsnaka nupetkarmiayi túrasha jí̱i̱rtinniaka tujintkiarmiayi. Núnisaṉ Eprain shuarsha Kanaan aents Jesernum matsatainiaṉka jí̱i̱rtinian tujintkiarmiayi. Ántsaṉ Sapurún shuarsha Kitrun tura Najararnum Kanaan aents pujuinianka jí̱i̱rtinian tujintkiarmiayi túrasha kakaram takamtikiarmiayi. Núnisaṉ Aser tura Neptarí shuarsha Kanaan aents ni pujuiniamunam pujuinianak jí̱i̱rtinian tujintkiarmiayi. Tura Amur aentssha Tan shuar ni nuṉke̱n waya̱wara̱i̱ṉ tusa peṉké tsaṉkatkacharmiayi. Tuma ásar Amur aentska Jíris nainnium Ajarúnnum tura Sarpimnum matsamármiayi túrasha nuna ukunam Jusé shuar nupetkar kakaram takamtiksarmiayi.