Sak. 8 - Yus Papí: Shuarja̱i̱ Yus Yamaram Chicham Najanamu

Uunt Yus Seúnnum ataksha pujustin

¹ Ashí Akupin Uunt Yus winia chichartak

² “Ashí Akupin Uunt Yus jú̱nis túramprume ‘Seúnan akasmakun ti kajekmajai.’

³ Uunt Yus jú̱nis tawai ‘Wikia Seúnnaka atak ímiatrusnak awajsájai. Jerusaréṉnumsha matsastatjai. Nuyá̱ Jerusaréṉka Nékaskea Nú Pepru tunattawai. Núnisaṉ Ashí Akupin Uunt Yusna Naint Yusna Akantúkma Naint tunattawai.’

⁴ Kame Ashí Akupin Uunt Yus chichaak ‘Ukunmaṉka nuwa̱sha áishmaṉsha tí nukap tsawant pujusáru ásar weamsarsha wai̱ ushukrusar Jerusaréṉka jinti̱n wekasartatui.

⁵ Núnisan nu pepru jinti̱n uchi áishmanchisha nuwa̱chisha mete piákar nakuruiniak kanea kanea ajartatui.’

⁶ Ashí Akupin Uunt Yus chichaak ‘Wi ukunam túrunattawai tájana nuka átumka juákaru árumna nu nekaspash Yus tímiatrusat tárume. Warí Wíji̱a̱i̱ṉkia nuka peṉké itiurchatchaiti’ tawai Ashí Akupin Uunt Yus.

⁷ Ashí Akupin Uunt Yus chichaak ‘Ashí nuṉkanmaya̱n etsa̱ tatainmaani̱ya̱n tura etsa̱ akatainmaani̱ matsatainiancha wi shuar ásarmatai uwemtikrartatjai.

⁸ Túran Jerusaréṉnum ikiankan matsasártatjai. Niṉkia Wi shuar ártatui tura Wikia ni Yusri̱ asan nekas tájana nuna umikian niji̱a̱i̱ péṉker túrin tuke átatjai.’

⁹ Ashí Akupin Uunt Yus chichaak ‘Átum Ashí Akupin Uunt Yusa Je̱e̱n ataksha je̱a̱mkatai tusar pújakmari̱n aeprutan naṉkamawarmia nuyá̱ juárkimiuk yamaiya̱ tímiaja̱i̱sha Yúsnan etserin étserma ántarmena nútirmeka kakaram ajastarum’ tíniuiti.

¹⁰ ‘Warí, ju̱ tsawant jeatsa̱i̱ṉkia aents takakmasmanum nuíchuka waaka takakmasmanumsha akiktinkia peṉké atsumai. Tura ni nemasri̱ ti írunu asamtai waya̱tniusha tura jíiniunusha aṉkantka wekasatniuka atsumai. Kame Wiki aentsnaka aṉkant aṉkant nuamtak shuari̱ji̱a̱i̱ṉ kajernáimiamtikiarmajai.

¹¹ Túrasha yamaikia jú̱ aents ishichik juákarainia jú̱naka yaunchu túrawarmaj nútiksanka túrashtatjai’ tawai Ashí Akupin Uunt Yus.

¹² ‘Warí arakan arakármatai úwasha péṉker nerekartatui núnisaṉ nuṉkasha tí péṉker neremtikiartatui. Túmakui̱ nayaimpikia nuṉkan sanamtiktiatui. Kame ju̱ aents ishichik juákarua jú̱naka ju̱na mash takusarat tusan tsaṉkatkartatjai.

¹³ Wats Jutá shuartiram núnisrumek Israer shuartirmesha nekaatarum. Ashí nuṉkanmaya̱ja̱i̱ iismasha átumka yajauchiniam yumiṉkramu ámarme antsu yamaikia nuya̱ṉka aṉkant awajsattajrume. Túram chíkich ainia nuna péṉker yumiṉkiaru ajastatrume. Tuma asamtai sapijmiatsuk kakaram takastarum’ tawai.

¹⁴ Uunt Yus chichaak ‘Yaunchu atumí we̱a̱tri̱ akajtukarmatai Wi yajauch enentáimturarmiaj núnaka yapajniáchuitjiai’ tawai Uunt Yus.

¹⁵ ‘Antsu Jerusaréṉnaka tura Jutancha íksanak péṉker awajsartatjai. Tuma asamtai átumka nu tsawantinkia sapijmiakairap.

¹⁶ Tura átumka jú̱nis túratniuitrume. Atumí írutramurmiji̱a̱i̱ nekasa nu chichastarum. Tura súmamtikiakrumsha péṉker túramuja̱i̱ ashí aṉkant pujustinia nu túratarum.

¹⁷ Núnisaṉ atumíiya̱ṉka chikichkisha aents írutramuri̱n yajauch awajsatniun enentáimtuscharti. Núnisrumek Yusa naari̱ antra pachisrum jú̱naka nekas túrattajai títin wakerukairap. Warí, Wikia núnaka peṉké muí̱jiajai’ tawai Uunt Yus” tímiayi.

Uunt Yus Jerusaréṉkan shíirnum yúmiṉkiamu

¹⁸ Nuyá̱ Ashí Akupin Uunt Yus winia chichartak

¹⁹ “Jutá shuartiram nantu kuátrutin tura séṉkutin nuyá̱ siátitincha núnisaṉ tiástincha ijiarmáitrumna nuka ti shiir enentáimkiuram warasrum nampermatai ajatrámsattarme. Tuma asarum nekasa nu tura itit awajsachma pujustin aneatarum.

²⁰ Ashí Akupin Uunt Yus jú̱nis chichaak ‘Untsurí aents tura chíkich péprunmaya̱sha nuna naṉkaamas atumíin káunkartatui.

²¹ Tura péprunam matsatainia nusha chíkich péprunam wéar chichainiak “Uunt Yus waitnenkarturat tusar seawarmi. Túrar Ashí Akupin Uunt Yus e̱a̱karmi. Wisha wéajai” tiártatui’ turutmiayi.

²² ‘Túrawar untsurí aents tura untsurí nuṉka mátsatkamunmaya̱ kakaram ainia nusha Jerusaréṉnum tariar Ashí Akupin Uunt Yusan yaintkiat tusar e̱a̱kartatui.’

²³ Ashí Akupin Uunt Yusan chichaak ‘Nu tsawantinkia yajaya̱ tias shuar chíkich chichamtin ainia nu, chikichik Israer shuaran pushiniam achik emetawar “Atumji̱a̱i̱ wemí tusar wakeraji. Yus atumji̱a̱i̱ pujá tama antukuitji” tiártatui’” tímiayi.