Sak. 7 - Yus Papí: Shuarja̱i̱ Yus Yamaram Chicham Najanamu

Ántar ijiarmátin tura nekas ijiarmátin

¹ Tura nuiwi nantutini̱ṉ kuatru tsawant Taríu úunt akupin ajas kuatru uwí pujái̱ Sakaríasan Uunt Yus chicharkamiayi.

² Nu tsawantin Pitirnumia̱ shuar Sareséran núnisaṉ Rijimiríkian tura ni shuari̱ji̱a̱i̱ Uunt Yusa Je̱e̱n Uunt Yus iin yaintmakat seautárum tusa akupkarmiayi.

³ Tura Ashí Akupin Uunt Yusa Je̱e̱n Yúsnan pujurin núnisaṉ Yúsnan etserin ainia nu inintrarum seṉku nantu jeakui ijiarmár útniuyajnia nu yamaisha ¿túratjiash? tusar akupkarmiayi.

⁴ Nuya̱ṉka Ashí Akupin Uunt Yus winia chichartak

⁵ “Ashí ju̱ nuṉkanmaya̱ shuar tura ashí Yúsnan pujurin ainia nusha jú̱nisam ujakárta. Átum sataintia uwí matsamsarum seṉku nantu jeamtai tura siati nantutíncha ijiarmárum kúntuts enentáimsarum útmiarum nusha ¿nekas aya Wíniakek shiir awajtústai tusarmek túriniuyarum?

⁶ ¿Núnisrumek yurumkurmesha tura úmakrumsha atumek shiir awajmámkuram túrichukiarum?

⁷ Kame Jerusaréṉnumsha pepru ayaam irunmia nui̱sha tura Nekep nuṉka nuyá̱ Sejera nuṉkanmasha aṉkant waras pujuarmia nui̱ emka Yúsnan etserniuja̱i̱ Uunt Yus ujakármia ¿nú chichamkechukait?” tímiayi.

Israer shuar umikchamunam Seun emeskamu

⁸ Tura Uunt Yus Sakaríasan jú̱nis tímiayi

⁹ “Ashí Akupin Uunt Yus jú̱nis tawai. Nekasa nuja̱i̱ métek sumamtikiatarum. Tura atumí yachi̱ji̱a̱i̱ ashí shiir awajnáiyakrum waitnennairatarum.

¹⁰ Waje̱sha, mitiaikiasha, yajaya̱ táarusha, kuítri̱ncha ainia nusha ántrarum atankuram wáitkiasairap. Tura yaaksha ni yachi̱n yajauch enentáimtuscharti.

¹¹ Túrasha antuktinian nakitrarmiayi. Tura kajenak antuktinniasha nakitiáinia ásar kuishincha akiriarmiayi.

¹² Ni enentái̱sha tiamanti kaya timiá katsurma núnin ajasármiayi. Túrunawar Ashí Akupin Uunt Yus umiktin chichaman ni Wakaní̱ji̱a̱i̱ Yúsnan etserin yaunchu pujuarmia nuní̱ akupkámia nunasha antuktinian peṉké nakitrarmiayi. Tuma asa Ashí Akupin Uunt Yus tí kajekmiayi.

¹³ Kame untsuamash anturtukcharu ásarmatai ni untsurainiakuisha Wisha núnisnak anturkachartatjai tawai Ashí Akupin Uunt Yus.

¹⁴ Antsu ashí uunt nuṉka mátsatkamu nisha nékashtai̱ ainia nui̱ nase tí kakaram umpuak itiurá nútiksaran nincha tsakiṉmakarmajai. Ni jíintrarmatai núṉkaka atsá aya jú̱nik awajnásmai. Túrunamtai tátincha tura wétincha chikichkisha atsumai. Warí timía péṉker nuṉkauyayi túmaitiat ni túrawarmaja̱i̱ atsá aya jú̱nik awajsaruiti” tímiayi.