Sak. 6 - Yus Papí: Shuarja̱i̱ Yus Yamaram Chicham Najanamu

Kuatru karu mesetnum mánitiai ímiaja̱i̱k wainma

¹ Ataksha paṉkái̱ íimiaj tukamán jimiará naint ámanum ajapéni̱ṉ kuatru karu jiiniainian wainkiamjai. Nu naintkia yaṉkú jirunu armai.

² Emka káruka kawái kapanniunam tura nuyá̱ káruka kawái mukusanam nenamu armai.

³ Tura karu menaintiua núnaka kawái pújunam nuyá̱ karu kuátruka kawái yantsa tura tsake tsake apujturmanum nenamu ármayi.

⁴ Nuya̱ṉka Yusa suntari̱ wiji̱a̱i̱ chichama nuna chicharkun “Winia uuntru ausha ¿warí ainia?” tímiajai.

⁵ Tutai Yusa suntari̱ chichartak “Ju̱ka nayaimpinmaya̱ kuatru nase tui̱ ainia nuyá̱ Ashí Nuṉka Uuntri̱ pujamunmaya̱ jiiniainia nu áiniawai.

⁶ Tura kawái mukusa kárun japíakainia nuka arakaani̱ wénawai. Núnisaṉ kawái puju ainia nuka mukusa kawain nemarainiawai. Ántsaṉ kawái yantsa ainia nuka nuṉkaani̱ ashiniui.

⁷ Antsu kawái kapanniuka jíintrar nuṉkan wárikmas téntaktinian wakeriarmai.” Túmainiakui Yusa suntari̱ chicharainiak “Ashí nuṉka wekaatusrum téntaktarum” timiai. Tutai tímiatrusaṉ túrawarmai.

⁸ Nuya̱ṉka untsurak chichartak “Iisiana, arakaani̱ wénana nuka nui̱ Winia Wakantrun shiir enentáimtikrutrarai” turutmiai.

Jusuin akuptai̱ tawaspan susamu

⁹ Uunt Yus chichartak turutmiai

¹⁰ “Papirúnianam achirar yaruakma Jertai, Tuwías, nuyá̱ Jetayas ataksha waketrar káunkar Yus súamu juuktá. Túram nu tsawantini̱ṉ Supuníasa uchirí̱ Jusíasai̱ jukim ni je̱e̱n wetá.

¹¹ Nuyá̱ kuri kuitji̱a̱i̱ tawasap najanam Yúsnan pujurniu uuntri̱ Jusuí Jusatáka uchirí̱ etseṉkrumtikiata.

¹² Tura Ashí Akupin Uunt Yusri̱ chichartamuk ‘Ju̱ áishmaṉka náari̱ṉkia Kanawe asa numia áintsaṉ jé̱e̱rtatui. Tura ni kaṉkapé̱ya̱ je̱e̱r Yusa Uunt Je̱e̱n je̱a̱mtiatui túramui’ titiá.

¹³ Ni Yusa Uunt Je̱e̱n je̱a̱mtatui tura naṉkamantu úunt akupin pujus pujutai̱ri̱ya̱ akupkáttawai. Ni pujana nui̱ṉ Yúsnan pujurniusha pujustatui. Nuiṉkia mái̱mtek shiir chichasar pujusártatui.

¹⁴ Yusa Uunt Je̱e̱n tawaspan takusartatna nuka Jertai, Tuwías, Jetayas nuyá̱ Supuníasa uchirí̱ Jusías amasmaiti tusar enentáimtiartatui.

¹⁵ Núnisaṉ arantia̱ káunkar Yusa Uunt Je̱e̱n je̱a̱martatui. Nuja̱i̱ atumsha winia Ashí Akupin Uunt Yus atumíin akuptúkua nu nekaattarme. Túrasha atumí Yusri̱ Uunt Yus nekas tímiatrusam umirkurminkia núnis túrunattawai” tímiayi Sakarías.