Sak. 4 - Yus Papí: Shuarja̱i̱ Yus Yamaram Chicham Najanamu

Jimiará uriwiu ímiaja̱i̱k wainma

¹ Yusa suntari̱ wiji̱a̱i̱ chichama nu waketki̱ taa aents kanar tepan ishintiána nútikias ishintiátramai.

² Tura chichartak “¿Warí wáiniam?” túrutkui chicharkun “Asuiti ekemákar ekentai̱ kúriji̱a̱i̱ṉ najanar yakiní̱ṉkia asuiti yaratai̱ amamuk ekettsar nuna yakiní̱ṉkia asuiti yarar ekemátai̱ siati asamtai asuiti wétincha naṉku siati najatamun wainjiai” tímiajai.

³ Nuna yantamenka jimiará uriwiu wajainiawai. Asuiti yaratai̱ amamuk eketmanum chíkichkia menanmaani̱ tura chíkichkia untsuurnumaani̱ wajainiawai.

⁴ Tura tuke áujmatki̱ wéakun Yusa suntari̱ wiji̱a̱i̱ chichama nuna chicharkun “Winia uuntru ¿Ju̱sha warí ainia?” tusan anintrúsmajai.

⁵ Tutai Yusa suntari̱ wiji̱a̱i̱ áujmatu chichartak “Ju̱ warí ainia nuka ¿nékatsmek?” túrutkui “Atsá winia uuntru nékatsjai” timiajai.

⁶ Nuya̱ṉka jintintrak chichartak “Ju̱ka Uunt Yus Surupapíran chichaman akuptana nuiti. ‘Suntarja̱i̱nchu núnisaṉ kakarmaja̱i̱nchusha antsu Winia Wakantruja̱i̱ tawai Ashí Akupin Uunt Yus.

⁷ Maa timiá uunt naintiá ¿amesha yáitiam? Túrasha tímianu ámini̱ṉ Surupapír paka awajtámsattawai. Niṉkia amúamu kaya peṉkeri̱nia nu apujeak untsumuk “¡tí shiirmachichukait, tí shiirmachichukait!” ajattawai’” tímiayi.

⁸ Nuyá̱ Uunt Yus ataksha chichartak

⁹ “Yusa Uunt Je̱e̱ tépakmari̱nkia Surupapír ní uweje̱ja̱i̱ṉ aeprukmai. Tuma asa amúaksha ní uweje̱ja̱i̱ṉ amuktatui. Tura nu túrunamtai antsu nui̱ṉkia Wíniaka Uunt Yus atumíin akuptúkua nu nekarattarme.

¹⁰ ¿Yaaksha imiancha núnis enentáimtus warinkisha nakitrait? Túrasha Surupapír takatan naṉkamnamtai wáinkiar nu aentsuk ti shiir enentáimsartatui. Tura ju̱ siati ainia ju̱ka Uunt Yus ashí nuṉkanam wekaana nu ji̱ áiniawai” turutmiai.

¹¹ Nuya̱ṉka Yusa suntari̱n chicharkun “Asuiti ekemákar ekentai̱niam ayamach uriwiu numi chíkichkia menanmaani̱ tura chíkichkia untsuurnumaani̱ wajainiana ausha ¿warinia nakumainia?” tusan anintrúsmajai.

¹² Tura ataksha chicharkun “Jímiar naṉku kúriji̱a̱i̱ṉ najanamunam asuiti kuria núnin jiinia nuja̱i̱ ayamach uriwiu numi kanawe̱ jímiaran wajainiawai. Nu kanawe̱ ¿warinia nakumena?” tusan anintrúsmajai.

¹³ Tutai chichartak “Ju̱ warí ainia nuka ¿nékatsmek?” túrutkui “Atsá winia uuntru nékatsjai” timiajai.

¹⁴ Tutai chichartak “Ju̱ka jimiará aents Yusa akantúkma Ashí Nuṉka Úuntri̱niuan takarin ásar wajainiawai” turutmiai.