Sak. 3 - Yus Papí: Shuarja̱i̱ Yus Yamaram Chicham Najanamu

Jusuí Yúsnan pujurniu uuntri̱ ímiaja̱i̱k wainma

¹ Nuya̱ṉka Yúsnan pujurniu uuntri̱ Jusuin iniaktursamai. Kame nisha Uunt Yusa suntari̱ íimmianum naka wajamai. Tura Jusuin sumamtikiataj tusa Satanás ni untsuuri̱ni̱ wajan wainkiamjai.

² Tura Uunt Yus Satanásan chicharuk “Maa Satanásá Uunt Yus chichartamkati. Uunt Yus Jerusaréṉkan achikiua nuke chichartamkati. Wats ju̱ aentska ji keamunmaya̱ kaí̱ri̱ kapá̱a̱ jusamua ¿núchakait?” tímiayi.

³ Kame Jusuikia pushí ti wapikian entsaru Uunt Yusa suntari̱ íimmianum naka wajamai.

⁴ Nuya̱ṉka Yusa suntari̱ chichaak “Pushí wapikian entsarna nuka áitratarum” tusa nui̱ naka wajainian akupkarmai. Tura Jusuincha chicharuk “Íimsata ame tunaarmincha jurukjiame túran yamaikia tí peṉker pushin áentsrattajme” tímiayi.

⁵ Tura chichaak “Muuknumsha núnisrumek etseṉkrutai̱ péṉker etseṉkrumtikiatarum” tutai muuknumsha etseṉkrutai̱ péṉkeran etseṉkrumtikiarmai. Tura Yusa suntarí̱sha naka wajamai.

⁶ Tura Uunt Yusa suntari̱ Jusuin enentáimtikiuk chicharuk

⁷ Ashí Akupin Uunt Yus jú̱nis tawai “Wiji̱a̱i̱ péṉker wekaakmeka tura wi akupkámu umiktin chicham ashí umíakmeka winia Je̱a̱rui̱ tura Je̱a̱ru a̱a̱ri̱ wáinin átatme. Nu arantcha ju̱ aents wajana ju̱ja̱i̱ pachinkiattame.

⁸ Yúsnan pujurniu uuntri̱ Jusuiyá amesha tura ame tsaníakmaram Yúsnan pujurin ámiji̱a̱i̱ pujuinia nuja̱i̱ ukunam ártatna nuna nakumin árumin ju̱ anturkatarum. Nekaatarum, Winia takarniurun Kanawe̱n tutai jé̱e̱rtatna nuna utitiatjai.

⁹ Wats, kaya chikichkin siati yantamtinian Jusuin eem apujsajai. Tura nu kayanam chichaman jiruja̱i̱ áartatjai tawai Ashí Akupin Uunt Yus. Túran chikichkí tsawantini̱ṉ nu nuṉkanmaya̱ aentsu yajauchiri̱ṉkia ashí asakátrartatjai.

¹⁰ Tura Ashí Akupin Uunt Yus jú̱nis tawai. Nu tsawantinkia aṉkant aṉkant atumí amikri̱ uwa tura ikiu numi ejetari̱n ipiattarme” tímiayi.