Sak. 14 - Yus Papí: Shuarja̱i̱ Yus Yamaram Chicham Najanamu

Uunt Yus ashí nuṉkanam akupkáttsa táratin

¹ Uunt Yusa tsawantri̱ jeatémayi. Tura atumnia írunna nuna atarar atumsha íimprumni̱ṉ akantúnairartatui.

² Warí, nu tsawantin ashí nuṉkanmaya̱n Jerusaréṉja̱i̱ mánikiarat tusan irurartatjai. Túram nu péprun nupetkar ni je̱e̱n utsantuawar ashí kasarar ni nuwe̱ncha yajauch awajtúsartatui. Túrawar nui̱ pujuinia núnaka jímiapetek akankar chíkich nuṉkanam yarumainiak tura chikichnaka nui̱ṉ ujukartatui.

³ Nuya̱ṉka Uunt Yus nu uunt nuṉka mátsatniunmaya̱ ainia nuja̱i̱ mesetnum tuke mániniuya núnis mániktatui.

⁴ Nu tsawantinkia etsa̱ tatainmaani̱ Jerusaréṉnum íṉkiuasmak Uriwiu naintia nui̱ Uunt Yus tarimiattawai. Túramtai Uriwiu naintkia etsa̱ tatainmaani̱yá̱ juarki̱ etsa̱ akatainmaani̱ ímianai jímiapetek nakakáttawai. Túrunamtai naint nakakma arakaani̱sha muchitiakui tura chíkich nakakma nu nuṉkaani̱sha muchitiakui paka ti waṉkaram tépaku ajastatui.

⁵ Warí, nu naintia pakarí̱ṉkia Asara tímianai jeattawai. Tura Jutanam Usías úunt akupin pujái̱ u̱u̱rkui pisakmiarumna núnisrumek pisaktatrume. Túmaki̱ winia Yúsruka Uunt Yuska Niniu ashí tunaarincha áiniana nuja̱i̱ tátatui.

⁶ Tura nu tsawantinkia tsáapnisha, tsetseksha tura ti michasha nayaimpinmaya̱ yaasha atsuttawai.

⁷ Núnisaṉ kiritniuja̱i̱ tsáapnin yapajniáttawai. Túmak tsawái̱ tee ajakui káshikia tsáapnin átatui. Tura yáunchusha túrunachu nuyá̱ ukunmasha túrunashtatna nu tsawantnaka aya Yusak nékawai.

⁸ Nu arantcha Jerusaréṉnumia̱ iwiaaku entsa jíintrartatui. Túruna ajapén chikichik kanaakmari̱ṉkia etsa̱ tatainmaani̱ nayantsanam ayaku átatui. Tura chíkich kanaakmari̱ṉ etsa̱ akatainmaani̱ nayantsanam akaikittiawai. Tura mái̱ entsaka esatái̱sha tura yumitincha ku̱yu̱chu ártatui.

⁹ Nuiṉkia Uunt Yus ashí ju̱ nuṉkanam akupkáttawai. Nu tsawantinkia Uunt Yusak aya Níṉkiti tura ni náari̱nkia chikichkiniak átatui.

¹⁰ Tura Kepa péprunmaya̱ juarki̱ Jerusaréṉ nuṉkaani̱ Rimiunka ímianai nuṉka pakamnattawai. Túrasha Jerusaréṉka yakí̱ ji̱i̱tkia juákmatai Piṉjiamín wáiti̱ya̱ nuyá̱ juarki̱ Emka wáitiya̱ ímianai núnisaṉ Tsukin wáiti̱ya̱ nuyá̱ Ananéran kumpintri̱ya̱ nui̱ juarki̱ tura úunt akupin uwa nekeṉkar yumiri̱ jutaiya ímianai nui̱ṉ matsamsarma átatui.

¹¹ Tura nui̱ matsamártatna nuka atakka yajauchiniam yumiṉkramu áchartatui. Antsu Jerusaréṉnumka itit awajsachma aṉkant matsamsartatui.

¹² Jerusaréṉja̱i̱ mániatai tusar matsamtúkartatna nuka Uunt Yus suṉkurja̱i̱ asutiáwaram wájasaraṉ ni aya̱shí̱sha ji̱sha nui̱ṉ tura iniai̱ṉkia wene̱nmaṉ miniarártatui.

¹³ Nu tsawantiṉkia Uunt Yus aentsun tí sapijmiamtikiar enentái̱n nékakcha awajsártatui. Túram nuamtaik achiniáirar mániawartatui.

¹⁴ Núnisaṉ Jutanmaya̱sha aents Jerusaréṉnum mániattawai. Nuna tura ashí nuṉkanmaya̱ ayaam pujuinia nuna kuítri̱n tura kurincha nuyá̱ entsatáincha tí nukap irurartatui.

¹⁵ Núnisaṉ ashí taṉku matsamkamunam írunna núnaka kawaincha kamiyuncha umpurunash nú suṉkurak iniantrattawai.

¹⁶ Tura ashí peprunmaya̱ aents Jerusaréṉkan kajeráiniak mesetan najatiarmania nuyá̱ juákartatna nuka uwir uwir Úunt Akupniun Ashí Akupin Uunt Yusan tikishmátrartai tura Ákmaka matsamtai̱ namperan najatatai tusar Jerusaréṉnum ashí kauniartatui.

¹⁷ Tura Úunt Akupniun Ashí Akupin Uunt Yusan tikishmátratai tusar Jerusaréṉnum káunkacharua nú aentsnumka yumisha yuturkachartatui.

¹⁸ Ántsaṉ Ejiptunmaya̱ aents nuna túratai tusar táiniachkuiṉkia yumisha yuturchartatui. Ákmaka matsamtai̱ namperan najatatai tusar uunt mátsatkamu aents káunkacharun Uunt Yus asutkiaja̱i̱ métek Ejiptunmaya̱ aentsun asutiáwartatui.

¹⁹ Kame Ejiptuka tura ashí uunt nuṉka mátsatkamu Ákmaka matsamtai̱ namperan najatatai tusar Jerusaréṉnum táiniachuṉka tímiatrusaṉ asutniáwartatui.

²⁰ Nu tsawantinkia kawái kuntujnum tuntuitiai̱ netuamunmaṉka “Uunt Yusna shiir akantúkma” tu áatramu ártatui. Tura Uunt Yusa Je̱e̱n ichiṉkian írunna nusha tura Yus áestutai̱niam piniṉ írunna nusha Yusna akantúkma ártatui.

²¹ Ashí ichiṉkian Jerusaréṉnum tura Jutanam írunna nuka Ashí Akupin Uunt Yusna akantúkma ártatui. Tura aents Yusan taṉkun áestuattsa káunainiaka ashí nu ichiṉnan achikiar nuja̱i̱ iniarkartatui. Kame nu tsawantinkia Ashí Akupin Uunt Yusa Je̱e̱nka yaaksha suruktin peṉké atsuartatui.