Sak. 13 - Yus Papí: Shuarja̱i̱ Yus Yamaram Chicham Najanamu

Najankamu yus nuyá̱ anaṉkartin unuikiartin ainia nu

¹ Kame nu tsawantinkia Tawit shuar tura Jerusaréṉnum pujuinia nuna tunaari̱n núnisaṉ mui̱jmiai̱ ajakárman nijiartin púkuni chíṉkiamu átatui.

² Núnisaṉ nu tsawantinkia ju̱ nuṉkanam najankamu yus írunna nuna náari̱nkia ashí asakátrartatjai. Kame nu túramka atakka núnaka peṉké enentáimtuschartatui” tawai Ashí Akupin Uunt Yus. “Núnisaṉ ju̱ nuṉkanam najankamu yúsnan etserin írunna nunasha tura yajauch wakanniasha amuktatjai.

³ Kame ‘ukunam ju̱ túrunattawai’ tusa yaaksha étserkuiṉkia aparí̱ nukurí̱ji̱a̱i̱ nin yajutmararuk ‘Uunt Yusa náari̱ji̱a̱i̱ waitruá etserka asam jakattame’ tiártatui. Tura ni uchirí̱ étserkui aparí̱ nukurí̱ji̱a̱i̱ nin yajutmararuk naṉkiji̱a̱i̱ ijiú weak máwartatui.

⁴ Nu tsawantinkia ashí Yúsnan etserin ainia nuka etserainiaksha ímiaja̱i̱k wainkiamuri̱n natsantrartatui. Túmak anaṉkartuatai tusarka nuap tarach aparmánka atakka peṉké entsarchartatui.

⁵ Nuyá̱ chichaak ‘Wikia Yúsnanka etserchaitjiai antsu wikia arakmawitjiai. Tuma asan úchichinmaya̱ṉ aya nuṉká arakmatnak pujurniuitjiai’ títiatui.

⁶ Takui̱ anintruiniak ‘¿Nuiṉkia urukakmea uwejmíncha tsupimiawaruitiam?’ Tutai ‘Winia amikru je̱e̱n jú̱naka áitkiarawarmai’ títiatui.

Murikiu wáinin mánkiar murikkia tsakiṉmakarma

⁷ Maj, puyá̱a̱, Winia murikiu wáinin tura áishmaṉ Winia a̱i̱rua nu ijiuarta” tawai Ashí Akupin Uunt Yus. “Tura murikiu wáinniun mantuattajai túram murik pisarartatui. Antsu uchichincha nekapsan amukchartatjai.”

⁸ Uunt Yus tawai “Ashí nuṉkanam jú̱nis naṉkaamastatui. Aents irurma menaintiú nakakmanumia̱ jimiará tesamua nu amukar meṉkakartatui. Tura nakakma ampirma nu iwiaaku juáktatui.

⁹ Núnaka aya kuítiak ajasat tusar tura aya kúrik juákat tusar jinium áesainia núnisnak wisha jinium áesan nekapsattajai. Nuiṉkia winia náarun pachisar untsurainiakui wisha anturkaran ‘Átumka wí shuaraitrume’ tiártatjai. Tutai ni chichartuiniak ‘Uunt Yuska ii Yúsri̱nti turutiartatui’” tímiayi Uunt Yus.