Sak. 11 - Yus Papí: Shuarja̱i̱ Yus Yamaram Chicham Najanamu

¹ Maa Riwianú, wáitiram urainiarta tura ame sétrurminkia ji áesak amukarti.

² Maa sétur katuuka asamtai seprisá ámeka úttiá. Warí, péṉker numi ainia nuka emeskamu áiniawai. Maa Pasannumia̱ ensena numitirmesha kakantra úttiarum. Warí, kampuntin utúachmin tee ainia nusha ajarma áiniatsuk.

³ Ti péṉker sa̱a̱kri̱sha emeskarma ásarmatai murikiu wainniusha útainiawai. Jurtannumia̱ kampunniusha emeskarma ásarmatai úunt ya̱wa̱ uchirí̱sha útainiawai.

Peṉké yajauch murikiu wáinin ainia nu

⁴ Uunt Yus winia Yusur chichartak “Yusai̱ mátniun júkiartin ainia nu murik péṉker wáinkiarta.

⁵ Túrasha murikiun sumak Yusai̱ main ainia nuka asutiácharma núnis enentáimiainiawai. Tura murikiun súrin ainia nusha kuítriniaja̱i̱ tusar Uunt Yusa shiir awajénawai. Núnisaṉ murikiu wáinin ainia nusha ni murikrí̱n waitnentainiatsui.”

⁶ Núnisaṉ Uunt Yus jú̱nis tawai “Ju̱ nuṉkanmaya̱ aentsun nu arantka peṉké waitnentrachartatjai. Antsu nu aentsun aṉkant aṉkant ni írutramuri̱ni̱ṉ nuyá̱ ni akupniúri̱ni̱ṉ suan iniaisartatjai. Nuní̱ túram nu nuṉkan amuiniakuisha Wikia níya̱ṉka peṉké uwemtikrachartatjai” tímiayi.

⁷ Tura mátai̱niam júkiartin ainia nuna murikiu sumau sumakar waitrukta tusa apujsarman murikiun wáinkiarmajai. Túran jimiará wai̱n achikmajai. Emka wai̱kia “waitnenkartin” anaikiamjai tura chikichnaka “jiṉkiatai” anaikiamjai. Túran murikiun wainkiamjai. Jṉ. 10:1-18

⁸ Tura chikichkí nantunmaṉ menaintiú murikiu wáinniun ji̱i̱rarmajai. Tura nuna túrawaran tí kuntuts nekapramjai núnisaṉ nisha nakitrurarmiayi.

⁹ Tura murikiun chicharainiakun “Yamaikia nu arant atumín wáinniuka áchattajai. ¡Jákrumsha jakatarum! ¡Tura meṉkakrumsha meṉkakatarum! ¡Nuyá̱ juákartatna nuka aṉkant aṉkant nuamtak yunaiyawarti!”

¹⁰ Nuiṉkia winia wai̱r “waitnenkartutaiya” nuna ashí aentsja̱i̱ chichaman najanamiaj nuna asakákun achikian kupikmajai.

¹¹ Tura nu tsawantin chícham najanamu amia nuka nui̱ṉ amukámiayi. Nu túramun murikiun sunain armia nusha wáitkiaru ásar “Nekas Uunt Yusa chichame̱ya̱inti” tiármiayi.

¹² Takui̱ “Tura atumji̱a̱i̱ péṉkeraitkiuiṉkia, winia takatrui̱ akirkatarum. Núja̱i̱nchuka ánik iniaisatarum” tiármajai. Tutai traintia kuítian nekapmawar akirkarmiayi.

¹³ Nuiṉkia Uunt Yus chichartak “Nekas Winia anentainia ásar imia jú̱ kuítian akimiatrukarai. Ju̱ achikiam winia je̱a̱rui̱ kuit ikiutai̱ya nui̱ ikiusta” turutmiai. Túrutkui traintia kuítian achikian Uunt Yusa Je̱e̱n kuit ikiutai̱n eṉkea ikiumjai.

¹⁴ Tura chíkich wai̱r “jiṉkiatai” tu anaikiamua núnaka kupikian Jutá Israerja̱i̱ nawamnaikiar péṉker matsamtai̱n akaneakun kupikmajai.

¹⁵ Nuiṉkia Uunt Yus chichartak “Pai, nu arantcha murikiu wáinin enentáincha nuna u̱yuntrí̱ juruktia.

¹⁶ Warí, murik pisarmataisha páchichun núnisaṉ meṉkakamtaisha e̱a̱chun tura jápanum iniáa jáakuisha tsuáchun nuyá̱ pimpikniuncha ayurchan antsu aya péṉkeri̱ ainia nuna nawe̱n kupir namaṉke̱n yua nuna Wi ju̱ nuṉkanam murikiun wáinniun chikichkiniak apujsattajai.

¹⁷ Murikiu wáinin yajauch aents murikiun utsaṉ ikiua nuka anearti. Puya̱k ni kunturi̱ tura untsuurí̱ ji̱n ijiuti. Tura kunturi̱sha kaartí. Núnisaṉ ni untsuurí̱ ji̱sha kusurti” turutmiai.