Sak. 1 - Yus Papí: Shuarja̱i̱ Yus Yamaram Chicham Najanamu

Yus Israer shuaran untsuamu

¹ Kame Taríu, úunt akupin jimiará uwí tura uchu nantu pujái̱ Itiu tiraṉki̱ Pirikíasa uchirí̱n Yúsnan etserniun Sakaríasan Uunt Yus chicharuk

² “Uunt Yus atumí we̱a̱trí̱n ti kajerkarmiayi.

³ Túrasha Wini̱n waketkiarti Ashí Akupin Uunt Yus tawai tura Wisha atumí̱n weakartatjai Ashí Akupin Uunt Yus tawai tiartá.

⁴ Atumí we̱a̱trí̱ya̱ núnin áirap. Yaunchu Winia chichamprun etserin armia nu atumí we̱a̱tri̱n etserkar Ashí Akupin Uunt Yus jú̱nis tawai. ‘Atumí yajauch enentáimtairi̱ tura yajauch túrutairmesha iniaisatarum’ tuíniamaitiatan nékachu ajasár peṉké anturtukcharmiayi.

⁵ Tura atumí we̱a̱trí̱sha ¿tui̱ṉ pujuinia yamaikia? Núnisaṉ Wíniana nuna etserniusha ¿tuke iwiaakuk pujuartata?

⁶ Túrasha Winia chichamprun tura akupkámurun Wíniana nuna etserniurja̱i̱ jintíamajna núnaka ¿atumí we̱a̱trí̱ṉkia antukcharmakia? Tuma ásar ataksha enentáimprar chichainiak ‘Ashí Akupin Uunt Yus ii túramuja̱i̱ tura wekasamuja̱i̱ métek asutiámji’” tiármiayi.

Kawainium ekemtan unuimiátra ímiaja̱i̱k wainma

⁷ Uunt akupin Taríu akupin ajas jimiará uwí pujamunam nántuka aunse Sepat nantu tsawantka paintikuátrutin Pirikíasa uchirí̱ Yúsnan etserin Sakaríasan Uunt Yus jú̱nis tímiayi. Sakaríaska Itiua tiraṉki̱nti.

⁸ Kashi ímiaja̱i̱k ju̱na wainkiamjai. Pakanam mirtu numi írunmanum ajapén aents kawainium ekeemtan unuimiátra kawái kapanniunam eketka wajan wainkiamjai. Nuna úkuri̱ni̱ kawái kapanniusha tura mukusasha núnisaṉ pújusha untsurín wajararmai.

⁹ Nuya̱ṉka “Winia uuntru, ju̱sha ¿warí ainia?” tutai Yusa suntari̱ chichartak “Ju̱ warí ainia núnaka wi iniaktustatjame” turutmiai.

¹⁰ Kame aents mirtu numi írunmanum ajapén wajama nu chichartak “Ju̱ka ashí nuṉka wekaatuktarum tusa Uunt Yus akupkarma nu áiniawai” turutmiai.

¹¹ Aents kawainium ekemta unuimiátra arma nu Yusa suntari̱ mirtu numiniam ajapén wajan chicharainiak “Ashí nuṉka wekatukji túramsha ashí nuṉka itit awajsachma aṉkant awai” tiarmai.

¹² Nuyá̱ Yusa suntari̱ chichaak “Ashí Akupin Uunt Yusá sataintia uwí Jerusaréṉsha tura Jutanmaya̱ péprusha kajerkaram pujuráiniamna ausha ¿urutái tsaṉkurarmesha waitnentrartatam?” timiai.

¹³ Takui̱ Yusa suntari̱ wiji̱a̱i̱ chichama nuna Uunt Yus waitneṉkratamuja̱i̱ ti shiir ai̱kmai.

¹⁴ Nuya̱ṉka Yusa suntari̱ winia áujtimia nu chichartak “Kakaram étserkum chichaakum ‘Seun náintian tura Jerusaréṉnasha Wikia ti akasmattajai’ tawai Ashí Akupin Uunt Yus.

¹⁵ ‘Kame tiikia kajerkacharmajai túramaitiat uunt mátsatka itit awajsachma ainia nuna Winia aentsru itiurchatri̱n nuna arant awajtúsaru ásarmatai ti kajerkaran suira kaje̱ntukarjai.’

¹⁶ Tuma asamtai Uunt Yus chichaak ‘Yamaikia Jerusaréṉkan waitnentran ataksha enentáimturarjai. Tura nui̱ Winia Je̱a̱rka je̱a̱mnaktatui tura Jerusaréṉsha ataksha je̱a̱mnaktatui’ tawai Ashí Akupin Uunt Yus.

¹⁷ Nu arantcha ataksha kakantra étserkum Ashí Akupin Uunt Yus chichaak ‘Winia péprur ainia nuiṉkia wariṉkísh naṉkaamas írunuk pimiasuá wáinkiartatui. Núnisaṉ Seúnnaka Uunt Yus ataksha atsaṉkrattawai tura Jerusaréṉnaka ataksha achiktatui titiá’” tímiayi.

Kachu ímiaja̱i̱k wainma

¹⁸ Nuyá̱ paṉkái̱ íimiaj tukamán kuatru kachun wainkiamjai.

¹⁹ Tura Yusa suntari̱n anintrakun kachu ainia ju̱sha “¿Wariniak nakumena?” tutai chichartak “Jú̱ kachuka shuar Jutan tura Israeran núnisaṉ Jerusaréṉnumia̱n tsakiṉmakarua nu áiniawai” tímiayi.

²⁰ Nuya̱ṉka wárikmas kuatru aentsun úweje̱ja̱i̱ṉ warinkisha ti péṉker najanin ainia nuna Uunt Yus iniaktursamai.

²¹ Túrunamtai “Ju̱sha warinia káutkara” tusan anintrúsmajai. Tutai chichartak “Kachu áiniana nuka Jutan tsakiṉmakarua nu áiniawai. Kame Jutanmaya̱nka túruiniamsha paṉkái̱ íimsatniuncha tujintkiarmai. Túrasha ju̱ka uunt mátsatkamu ainia nu Jutan wajatrarma nuna kachuri̱n kupirar kuramtikiar tsakiṉmaktai tusar káunkarai” turutmiai.