Rut 4 - Yus Papí: Shuarja̱i̱ Yus Yamaram Chicham Najanamu

Puas Rutja̱i̱ nuatnaikiamu

¹ Puassha pepru wá̱i̱ti̱a̱i̱ri̱n we pujumiayi. Tumai̱ Rútan nekas ámin waitmakminkia pujawai timia nu shuar naṉkaama wainiak untsuk itiá apujsamiayi.

² Tura Puas pepru uuntri̱ armia nuna tias aentsun untsukar káunkarmatai chicharainiak “nui̱ pujustarum” tutai pujusármiayi.

³ Nui̱ Puas nuwá̱ shuari̱n chicharuk “Nuimí Muápnumia̱ waketki̱ taa ii yachi̱ Irimiríkia nuṉke̱n súrawai.

⁴ Tuma asamtai wi ju̱na ujajme, yamái ju̱ aents tura pepru uuntri̱ eketainia ju̱i̱k nekas ame sumaktaj tusa wakerakmeka sumakta. Tura nu sumaktin nakitiakminkia wi sumaktaj, paant turuttia. Warí wini̱ya̱ tura aminí̱ya̱sha nu arant chíkich sumakminkia peṉké atsawai.” Tutai ni nekas shuari̱ chichaak “nuiṉkia wi sumaktájai” tímiayi.

⁵ Takui̱ Puas chichaak “Nuimí nuṉke̱ súmakmeka nú tsawantini̱ṉ Muápnumia̱ nuwa̱ Rut, jakáa nuwé̱ waje̱ nuatkata. Túram nuṉke̱sha uchirí̱niuk atí tusam yajutmatrata.”

⁶ Tutai Rútan nekas wainkiamnia nu shuar aya̱k “Winia atí tusan sumakchamniaitjiai. Winia uchirna nuna emeska̱i̱j tusan peṉké sumakchattajai antsu wi sumaktiniaitiaj nuna ámin tsaṉkateajme” tímiayi.

⁷ Kame tí yaunchu Israer shuara túrutairi̱ nuṉkan niniu átinian chíkich aentsun súakka nekas iwiaraji tusar sura nu ni sapatri̱n ukuiniak súmana nuna suu ármiayi. Muis. 25:5-10

⁸ Tura ni shuari̱ Puásan chicharuk “Nuiṉkia amek sumarmakta” tinia sapatri̱n ukuiniak susamiayi.

⁹ Tura Puassha pepru úuntri̱n núnisaṉ péprunam pujuarmia nuna chicharainiak “Átum yamái pujarmena ju̱ íimmianum Irimiríknan, Kiriunnan tura Majrunnan ashí Nuiminiu juakua nu nuṉkan súmajai.

¹⁰ Áintsanak Muápnumia̱ Rútan Majruna nuwé̱ waje̱n aishri̱ naari̱ áintsaṉ yachi̱niu ainia nusha ni pujutái̱ri̱sha sakara̱i̱ṉ tusan yamái átum íimmianum waje̱n nuateajai” tímiayi.

¹¹ Tu takui̱ pepru wá̱i̱ti̱a̱i̱ri̱n ashí wajarmia nu núnisaṉ pepru úuntri̱sha chichainiak “Nekas ii ántamunam chichakume. Ju̱ nuwa̱ nuatkamka Uunt Yus Rakiran tura Rían Israer shuar ti pampaṉti tusa tsaṉkatkamia núnisaṉ amesha Épratanam tí paantin atá tura Piriṉnumka páantin awajnásta.

¹² Jutá Tamarai̱ yajutmarma Páres untsurí pampaṉmia tímiatrus Uunt Yus ju̱ nuwa̱chiniam núkap pampartinian tsaṉkatramkati” tiármiayi.

¹³ Nuyá̱ Puas Rutja̱i̱ nuatnaikiar pujusár Uunt Yus yáiniam Rut uchin áishmaṉchin takusmiayi.

¹⁴ Takusmatai nuwa̱ nui̱ pujuarmia nu Nuimin chicharainiak “Uunt Yus shiir awajsamu atí. Yamái amé aentsun ayamprutmaktinian suramsayi. Nu Israer shuarnum tí paantin atí.

¹⁵ Nisha ámin waitmaktatui tura úuntach ajasákmincha péṉker yaintmaktatui. Warí siati uchi aneṉkrattairi̱ji̱a̱i̱ṉkia naṉkaamas ame najatim anenmawa nu uchin takusai” tiármiayi.

¹⁶ Tura Nuimisha ni najati̱ uchichíri̱n miniakas jurukí̱ péṉker wáitniuyayi.

¹⁷ Nuyá̱ Nuimí tiraṉki̱ akiiniayi tusar ni írutramu armia nu nuwa̱ Uwit anaitiukarmiayi. Uwitkia Isái aparí̱yayi tura Isaikia Tawitia aparí̱yayi.

Tawitia apachri̱ ju̱ áiniawai

¹⁸ Páresaiya̱ akiiniawaru ju̱ áiniawai, Páres Esrunan yajutmarmiayi.

¹⁹ Esrun Raman yajutmarmiayi. Ram Aminiatápan yajutmarmiayi.

²⁰ Aminiatáp Nasunan yajutmarmiayi. Nasun Sarmunan yajutmarmiayi.

²¹ Sarmun Puásan yajutmarmiayi. Puas Uwitian yajutmarmiayi.

²² Uwit Isain yajutmarmiayi. Tura Isái Tawitian yajutmarmiayi.